الرسالة الأصلية كتبت بواسطة حضور طاغي (مشاركة 18075139)

حياك الله اخوي الهامه

حبيت اعقب على نقطة الجمهور الهلالي بالرياض

بالنسبة للحضور الجماهيري بالرياض ,, انا من الناس اللي ((كانت)) تحضر وماتغيب عن اي مواجهة بالرياض

لكن من سنتين تقريبا ما حضرت بالرياض الا ست او سبع مباريات فقط فقط فقط


والاسباب الخصها لك ((بعض الاسباب خاصه ومتعلقه بملاعب الرياض واتحدى انها تكون موجوده برا الرياض)):

1- صعوبة الوصول للملعب,, بصراحه الروحة للملعب يبي لك تهيئة نفسية وتفرغ عمرك من العصر عشان تحضر والناس تراها مو زي بعض اللي فاضي كثر الله خيره ويقدر يحضر لكن اللي وراه اهل ومشاغل تلقاه يالله يلحق على الشوط الاول بالبيت..

ومو زي بعض الجماهير بالمناطق الثانيه اذا كانت مباريات الهلال عندهم على اذان العشاء تطلع من بيوتها ومده بسيطه توصل وتصلي العشاء وتدخل وتلقى مكانها


2-تعامل العسكر... انا بقول لكم موقف صار لي وبعدها انتم بتعرفون ليه ما لنا نفس ياحقين الرياض نحضر

مره من الممارير باستاد الملك فهد,, العسكري رفض اني ادخل المسواك معي بحجة اني اقدر افقع عين واحد فيه!!!

ياجماعه الخير فيه احد مسلم بالغ عاقل يقر باللي يسوونه العساكر مع الاوادم اللي تبي تدخل؟؟

الموقف هذا خويي اللي وراي مصوره بالفديو ونزلته بوقته بالمنتدى وبحاول انزله مره ثانيه


3- المباريات اللي تصير على الاستاد يصير فيه نوعية من اللي داخلين للملعب وكلنا نعرف من وين جو وليه جايين وبصراحه النوعيه هذه تخرب على الواحد ومايصير له نفس يحضر وصارت السالفه ظاهرة واتمنى القضاء عليها


4- أخيراً بصراحة من بعد ما حضرت للهلال مباريات في ملاعب خليجيه كرهت ملاعبنا الخايسه والانظمة اللي تعقد الواحد

الهلال والاهلي الاماراتي بدبي,, الهلال والسد بالدوحه,, الهلال والغرافه بالدوحه,, واخيرا الهلال والجزيرة بأبو ظبي>>نادي نموذجي مبني على اعلى طراز

يارجل بعض الملاعب وصل فيها الامر ان كنتاكي يوصل لك الطلب لحد كرسيك والملعب مكيف والكراسي نظيفه

وانت هنا يلعب فيك الحرقان من بسكوت ابو ولد والببسي الحار
وتحوم كبدك من فضلات الحمام والطيور اللي على الكرسي اللي قدامك وكرسيك وسخ وتكتمك الغبره اذا جيت تنظفه

وفوق هذا كله درجه الحراره بعد صلاة العشاء 39 ويطينها بالاخير اللي قدامك او اللي جنبك ويفقع مرارتك بالدخان >>عاد من زين الحظ دايم اطيح بمدمنين المالبورو الاحمر اللي واحد يشب الزقاره و18 اللي يدخنونها من قوة الدخنه اللي تطلع منها




ياعمي احنا نقصر غصب عننا ومو برضانا واتمنى ان الواحد يعيش الواقع المرير بالرياض وبعدين يحكم هل جمهور الهلال بالرياض يفشل والا يرفع الراس


اتمنى تتقبل وجهة نظري

تحيتي لكـ