سلام الله عليكم ورحمته وبركاته .

الاجواء في الرياض تعطي الواحد شعور انه في سنتياغو ماشاء الله مطر وغبار وغيوم وحر
المهم امس وقفت الموتر في موقف ما دايم اوقف فيه .. وجاني هندي دايم اشوفه اذا وقفت بذاك الموقف
وقالي غسل سيارة ؟ قلت له مافي مشكله غسل بس انا في ابغى غسيل كويس ميه ميه جوه بره انت شيل مفتاح ؟
قال لا انا في قبل انتا في غسيل 2 سيارة انا خلاص بعدين في شيل مفتاح انا معلوم انت تأخير كتير >> مراقبني الاخ

المهم ابو الشباب لا جاء اخذ مني المفتاح ولا حاجة لكني يوم طلعت لقيت مساحات السيارة مرفوعه
>> هذي علامة التغسيل عند ابو هنود
ولقيت السيارة مغبرة من ساسها الى راسها غبار بن لذينا !! والدينا مطر وغبار

عاد الحين مدري بكره اذا شفته وقال وين 10 ريال وش اقوله
والا وش رايكم اسحب على ذاك الموقف من ساسه >> اوم القعاطه

بعد هذي المقدمة العصماء والقضية البلهاء ودي اطرح قضية لها فتره وهي تشل تفكيري وتؤنب ضميري !
الا وهي ان حياتنا اصبحت بزنس أند بزنس صرنا لا نتكلم الا بالغة المال ولا نتفاهم الا بالنسب ولا نؤمن الا بالارقام !
ماعاد هنا لغة للحب ولا لغة للوفاء ولا لغة للصداقة !!
كل شيء صار بمقابل !! اعزمني اعزمك .. دق علي ادق عليك .. وصلني اوصلك .. سلفني اسلفك .. حبني احبك
يعني جلست افكر ادور شي بالدنيا اقدر اقول انه ماله مقابل مالقيت !!
صار الواحد قبل ما يطلب شي من احد لازم يفكر كم بيدفع له مقابل هالشيء !

قبل سنوات واحد من الاصدقاء كان عنده جوال ايام الجوال جوال وخربت سيارته فظطر يرجع مع واحد من خوياه
يقولي لو أرجع بالموزين اصرف !! قلت له ليش ؟
قال من يوم ما اركب مع خويي يقول عطني جوالك وخذ اتصالات لين يوصلني بيتنا >>>اوم التحليل
وقيمة مكالمته اكثر من قيمة الليموزين لو وصلني

الحين عندي سؤال للاعضاء والعضوات فقط >> ليه في غيرهم
ابي احد يدبر لي شي بالدنيا تقدر تاخده بدون مقابل ؟

حتى يطمئن قلبي .

شكرا لكم .