#1  
قديم 11/04/2011, 10:15 AM
موقوف
تاريخ التسجيل: 22/04/2007
المكان: جمهورية الرياض الشعبية
مشاركات: 1,002
الحياة في المزرعة ^_^

مدخل
" في خضم مشاغل وهموم الحياة ، يوجد وقت لكوب من القهوة" فيلسوف امريكي معاصر


الحياة في المزرعة


احد تفرعات الوادي داخل المزرعة (خلفية السماء معدله بالفوتوشوب)


تقسيم الزرعه

مزرعتنا كبيره الى حد ما ، وهذا يعود الفضل فيه لجدي ، ما خلا قبيله جنوب الوادي ما نابشها وخذا اراضيها ، على صغر قبيلتنا في نجران الا انها الاكثر اراضي ، المهم ميزة مزرعتنا العزيزه ان ما لها جيران ، لان الوادي شمالها وجبال اليمن جنوبها ، وغربها ارض حدودية للحرس وشرقها اراضي اثريه تتبع للاخدود وهيئة الاثار ، وهي تنقسم الى اقسام :
البستان : ويضم اشجار الحمضيات ، والتين ، والعنب ، والمانجو ، والموز ، والتفاح ، والجواف .
الوادي : ويضم اشجار النخيل وعددها قرابه (200 نخله ) .
البئر الشرقيه : وعندها البيت ، والعريش ومجالس الرجال .
الحديقة : وتضم شجيرات زينه، والورد ، وبعض النباتات الصغيره مثل الفراوله وهنا نبته ما احب طعمها والنعناع والريحان وخرابيط العجايز، وفيها حيوانات للزينه زي الطواييس والحمام الابيض والسخافات هذي.
الملعب : ويضم ملعب كورة وطايرة ومسبح غبي .
الجرب: وتضم مزارع الطمام والخيار والبطاط والكوسه والباذجان والورقيات ومن هالكلام.
المحاويش: وتضم محاويش الغنم والبقر والبل والخيل وبيت الطيور حق الدجاج والدجاج الرومي والبط والوز والارانب .

بعد سرد هذا التقسيم تعالوا نضحك شوي

اول ضحاياي



اول ضحيه لي في هالمزرعه كان ديك غبي جدا ، الديك هذا يا احول يا خبيث طينه ، الرجال يجي كل يوم للعريش اللي انام فيه ويجلس يصايح وياذن وباقي على الصلاة ساعتين ، واقوم انا مستعجل خايف الصلاة تفوتني ولما اناظر الساعه احقد عليه ، المهم اليوم الاول مشيتها والثاني واللي بعده الين خلاص ما قدرت اتحمل ، مسكته وقلت له شوف تقولي ساعتك البيولوجيه مخرفه ، تقولي مواصل ، تقولي عندك مشاكل عائليه مو شغلي قسم بالله اشوفك مره ثانيه هنا العن خيرك وفكيته، ونفس الشي جاء وجلس يصايح على راسي وقت الشفع وهج ، واللي ذابحني انه ينام النهار كله ويصحى في الليل مدري مسوي فيها بومه والا هو راعي نت والا متاثر بالشعب السعودي ، عاد انا وصلت معي وقلت علي الحرام اني ذابحه ذابحه هالديك ، وافصل سلك المكيف الصحراوي واوصله في سور العريش واخلي الفيش عندي ونمت هذيك الليله وكعادته اخونا في الله جاء وصفق بجناحيه (تذكرت طائر النورس صفق صفق صفق بالجناحين وحلق) المهم واول ما صاح شغلت الكهرب ، وما اشوف الا الرجال ينتفض ويدخن وانا اقول وراك ما تصيح يالبومه وطفيت الكهرب واذا به جثة هامدة ، المهم اني صحت للكلب حق المزرعه وجاني يهز ذيله قلت خذ عشاك بالهناء والشفاء واكمل نومتي وتصدقون فاتتني صلاة الفجر

ثاني الضحايا



تذكرون ولد اختي اللي اسمه علي ، هذا من يوم نزلت الديره وهو ساكن عندي ، وياني كارف ابوه كرف هالولد ، المهم ان حنا نلعب لعبه ، نحط لنا قوطي ببسي بعيد ونجلس ننصع فيه برشاش والا بندق يعني المتوفر ، المهم اثناء تنصعانا جات مهره سوداء مسيومه بميتين الف يالربع(احد يشتري) وخذت القوطي في فمها قلت لولد اخوي تتحداني انصع القوطي وهو في فمها قال اتحداك ياخال المهم انا اللي ارمي بدون ما اسمي الا والله والمهره منبطحه ترافس ، وعلي يقول ياويلك من جدي وربي يلعن شكلك وانا والله ابتلشت وقلت له يارجال بنعالجها قال كيف تعالجها تنفخ فيها الروح والا ترسلها التخصصي تعال نروح نخلص عليها ونرحمها من العذاب ، المهم رحنا لها واخذت القوطي والقى الرصاصه خارقتها واناظر المهره وما فيها شي وفزت وما فيها الا ضرسين طيرتها قام ولد اخوي يقول شفت ياخال حتى خيلكم رخوم يموتون من الخرعه المهم قلت له احجز لها موعد عن حق الاسنان فقال ولد اخوي كيف شعورك ياخال لما تكون خايف مره من ابوك وتلقى انه ما صار شي قلت شعور الهلال يوم بغى الغرافه يطلعه وفزع لهم ربي في الاخير .


نادي نجران



مقر نادي نجران ما يبعد عن مزرعتنا واجد ، المهم اني في يوم كنت راكب فرس وجالس اتمشى في الوادي ، ومشيت من جنب النادي ، وسلمت على الربع هناك ، المهم تعرفون اللعب هذاك اللي اسمه حمادجي العبد ، مدري وش اصله بس يتكلم عربي الوصخ ، المهم خذ لجام الفرس وجلس يتمدح فيه وانا اقول تامر عليه ياحمادجي وهو يقول لا مشكور وجلس ثم تنهد وقال الخيل فيها خيرات كثيره بلهجه تضحك جدا فضحكنا كلنا عليه وقلت له ياشين السرج عالبقر ياحمادجي ...
المهم اني سلمت على الحسن اليامي وهو يصير لي من صوب عمة ابوي وقلت له ياولد صدق انكم بتنزلون للدرجه الاولى قال واذا جلسنا يعني يتدعمنا انت ووجهك والا تشجع قلت لا قال اجل ليش مهتم قلت اسولف بس ياخي قال الا قلي باقي تشجع النصر قلت ايه قال تذكر يوم هزمناكم خمسه قلت شحال عمتي ياالحسن (ما يصرف) المهم ان الفرس قامت تبي تعلف من ملعب النادي فقلت لها لا تعلفين من ملعبهم يمكن تنزلين الدرجة الاولى في الاسطبل السنوي قال الحسن صادق اعلفي في ملعب العريجا يمكن تصيرين صديقة نفسك (وصخ ما تعوق معه ) المهم واثناء الحديث جاء المدرب مدري مساعده مدري من هو اجنبي وجلس يهايط على اللاعبين ويقول ارجعوا للتدريب ، قسم بالله ياعيال ما اكذب عليكم ان حمادجي قاله اقول لا يكثر بس من زين خططك انت بعدها تفطسنا ضحك عليه وراح المدرب وجاب الرئيس صالح ال مسلم وعلى فكره تروه قمه في التواضع هالانسان المهم جاء وسلم وما عرفني وقال لو سمحت اخوي هذا مقر نادي اطلع ان والحصان ذا حقك قلت اول شي هذي فرس مو حصان ثاني شي انا مو اخوك انا عبد العزيز بن هادي فناظرني وقال ارحب ابو هادي وربي ما عرفتك وبعد السلام والهياط قال وش عندك هنا قلت خلاص جاي احل عندكم اسكن على قلوبكم قال ووين ابوك قلت في مكه قال سلم عليه ولو اني عارف انه مو مقتنع فيني ، فقلت له ليه في احد مقتنع فيك انت وهالنادي المعفن ، ومره ثانيه لا تجلسون تهايطون على الحكام ، قال والله ما فيه زيكم يالنصراويين يهايطون على الحكام الا ياولد تذكر يوم هزمناكم خمسه فقلت ايه يالربع تامرون شي ومشيت .



كورة برناوي


في مباراة الاتفاق والهلال الاخيره كنت انا وولد اختي علي نتابعها ، وعلي هذا هلالي متعصب عنصري متشدد ، ومتحمس مع المباراة وانا اشجع الاتفاق ، المهم يوم تقدمنا على الهلال الشوط الاول وبدا الشوط الثاني وانا اقوله ورى ياسر ما يسجل ، قال مدري عنه ياخي لكن عندي احساس انه بيسجل مدري ليه ، قلت له تبونه يسجل صدق حطوا على المرمى لوحه مكتوب عليها استراحه الخرج وراح يدل القول ، المهم انه ترك المباراة وناظرني قال موافق لكن بشرط قلت وش قال نحط على المرمى لمبات حمراء عشان برناوي يدله ، الا صدق ياخال باقي البحث جاري عن كورته والا لقوها ، ثم قال انا سمعت ان ناسا لقتها في كوكب زعبيل (كوكب النصراويين فقط) ، وانا اقول هاها ها اضحك لك يعني قال لا جد تدري في ادغال افريقيا لقوا كورة برناوي وخذها الزعيم حقهم وبعد ما وداها لساحر القبيله قال لهم السالفه وما فيها ان ولدكم برناوي يبلغكم تحياته ويقول الخليجيه طلعت صعبه ، تدري ياخال قلت اقول لا يكثر بس قال لا مو بديت انت خلني انا باقي ما انتهيت ، تدري ياخال ان الشي الوحيد اللي رصدته وكالة الارصاد عندنا هو كورة برناوي وقالت بعدها يبصير عج ، تدري ياخال وما امداه يكمل الا وياسر مسجل قول ، قال تدري ياخال انكم تبطون عظم لين تجيبون مثل ابو قحط ، الا على طاري ابو قحط سلم لي على الذابح .


تلقيح النخل


مهنة تلقيح النخل متاعرف عليها في نجران ان اللي يأدونها هم العبيد او من كانوا عبيد في يوم من الايام عشان ما يزعل منا الملك فيصل ، المهم اني كنت القح نخلنا في يوم من الايام ومر بي شايب من شيبانا يبغى ابوي ولقاني في راس النخله ، قال ايييه ياولدي كلن يرجع لاصله وضحك علي هو وولد من عياله وبدون تردد قلت له صدقت والله ياعم ناس اصلها في روس النخل وناس اصلها في القاع تحتي ، فسكت وقال لا حول ولا قوة الا بالله اعوذ بالله من لسانك ياهالولد ، قلت من بدى بالمزح يصبر على شينه ، امر وش تبي قال وين ابوك قلت في مكه قال وش يسوي في مكه قلت يلعب كورة يعني وش يسوي في مكه ياعم يطلب ربه قال ادري بس يقضي وقت كثير في مكه وتارك ربعه ومزرعته للمبزرة ، قلت والله ناس شرواه تدور للاخره وناس شروى من تحتي يدورن للدنيا ، قال انت ما تستحي تراددني وانا اكبر منك قلت وانت ما تستحي تراددني وانت في بلادي ، قال انزل طيب كلمني من قريب قلت حنا قوم لا رقينا ما ننزل ، قال انتو قوم اعماكم الهياط ، قلت وانتو قوم ضيعتوا الصراط ، قال ولده خله ياوالدي ذا عبد العزيز ما تعرفه فك فينا منه وقل له وش حنا نبي قال الشايب ابوك واعدني يعطيني من لقاح النخل عندكم القح به نخلنا قلت ابشر بما بغيت والنخل واجد خل ولدك الرخمة ذا يرقى حداها وياخذ حاجته قال الولد ياولد انا اخصائي باطنية وش بيني وبين النخل ومصعادها ، قلت وانا مهندس اجهزة طبية وادل مراقي العز ، قال انت خبل وش ذنبي ، قلت وانت رخمه وش ذنبي ، قال الشايب سر مشينا ما نبي من ذا السربوت شي ، المهم اني نزلت وارسلت اليمني حق المزرعه بلقاح لهم ولنخلهم وقلت قل له لو ارسلت علينا جيناك لكرامتك علينا وخل عنك عزة قريش .


وقت الفراغ



يوم نزلت نجران صار عندي وقت فراغ واجد ، وصراحة اني اقضي هالوقت بين قراءة الكتب او اشخبط وارسم او اجلس على النت ، وقرأت يمكن عشرين كتاب خلال شهر هذي عناوينها :

تفسير الاحلام والرؤى للامام الصادق .
تفسير الاحلام لابن سيرين .
ديوان الشنفرى .
فلسفة ابو العلاء المعري .
قصة الفلسفة.
الإله المطلق لليونانيين.
حقيقة صلب المسيح لمؤلف مستشرق.
ذهبت مع الريح (رواية امريكية)
اناكرنينا (رواية روسية)
خطأ آدم ليس خطأً لمؤلف فرنسي
النسبة الفاضله والعدد الذهبي .
الهلال الشيعي والاطماع الفارسية
كتاب الحيوان للجاحظ .
ايام العرب في الجاهلية .
ديوان ابي فراس الحمداني.
الفرسان الثلاثة (رواية كلاسيكية فرنسيه)
الاسباط الاثني عشر .
بوذا بين الروحانية والغش.
تحليل النظرية النسبية لانشتاين.
تاثير الكواكب في الارض الانسانية.
المفاضلة بين الشمس والقمر.
وروايات كثير وقصص قصيرة وبعض المقالات .....








مخرج
"تحت دثار الفرح جلباب من الحزن ، وتحت هذا الجلباب جلد من السعادة " الظاهر انه طه حسين
  #2  
قديم 11/04/2011, 11:42 AM
الصورة الرمزية الخاصة بـ سلطان الصولي
زعيــم مميــز
تاريخ التسجيل: 06/02/2011
مشاركات: 1,667





يَ لبيييييييييييييييييييييييه ! .
ياخي أنت لك قصه ثانيه ، ومواضيعك لها قعده خاصه .
بكل أمانه المواضيع الطويله ما أقراها إلا مواضيعك ياخي تخليني غصب أشوفها " ماشاءا الله عليك " .
بس ليتك ترجمت بعض الكلمات لأن البعض ما يعرفها .
شكراً لك .
  #3  
قديم 11/04/2011, 12:08 PM
الصورة الرمزية الخاصة بـ عاشق المسجد
محرر أخبار المجلس العام
تاريخ التسجيل: 13/07/2008
المكان: الواحة
مشاركات: 666
اقسم يالله اني ما اذكر قريت موظوع طويل يما ما بالمجلس
الا مواضيع عبدالعزيز
ياخي غصبن علي اكمل غصب
وشف المره الثانيه كثثثثثثثثثثثر من السطور ياخي وشو هالموضوع مايسوى كله سطرين وقضى
والا اقالك بتخليه طويل قلت خل نحط الكتب الي قريتهن << ماقلتلك اني اكثر واحد يعرف يستنتج
وانفس ما قال الي فوقي سلطان الصولي
انت لك قصه
ومواضيعك قصه ثانيه
بس عندي طلب قبل ارسل الرد
صورلنا اقوى فحل عندكم بالتلقيح
يعني اضخم واحد
يالبا الفحول والله
واحسن ما بالفحول اذا جن يحجرن عبدالعزيز
  #4  
قديم 11/04/2011, 12:20 PM
كاتب مخضرم بالمجلس العام
تاريخ التسجيل: 11/01/2001
المكان: الدائري الشمالي
مشاركات: 5,720
مرحبا عبدالعزيز

موضوع رائع ! والأروع المزرعة




إقتباس
احد تفرعات الوادي داخل المزرعة (خلفية السماء معدله بالفوتوشوب)

واضح الفوتوشوب بالحيل

رحمت الديك المسكين اللي راح شربة موية بسبب واحد يحب النوم


اتمنى انك وتعود وتحذف بعض العبارات اللي فيها نعرة جاهلية ! او مايعرف الأن بالعنصرية !!

إقتباس
المهم تعرفون اللعب هذاك اللي اسمه حمادجي العبد ، مدري وش اصله بس يتكلم عربي الوصخ ،


إقتباس
مهنة تلقيح النخل متاعرف عليها في نجران ان اللي يأدونها هم العبيد او من كانوا عبيد في يوم من الايام عشان ما يزعل منا الملك فيصل

كلنا عبيد لله ولا فرق بين ابيض ولا اسود ولاعربي ولا أعجمي الا بالتقوى !
ورحم الله الملك فيصل بن عبدالعزيز وجعل ماعمل في ميزان حسناته
  #5  
قديم 11/04/2011, 12:40 PM
الصورة الرمزية الخاصة بـ بلو كادي
زعيــم مميــز
تاريخ التسجيل: 30/06/2009
المكان: اللهم إني أسألك الأنس بقربك..,{
مشاركات: 3,473

حجز
................
  #6  
قديم 11/04/2011, 01:24 PM
مشرف سابق في منتدى الجمهور الهلالي
تاريخ التسجيل: 03/10/2008
المكان: الله كريم يمد الخير / و يساعد ..!!
مشاركات: 4,180


الله يالدنيا ياحمادجي يوم كان عندنا بحايل مع نادي الطائي .. كان معه مازدا 79 و أنواع الفرفرة بالشوارع كنّه من أهل حايل !

بس قصة الديك لحالــه الله يرجك يالسفاح


حيّــاك
  #7  
قديم 11/04/2011, 01:30 PM
الصورة الرمزية الخاصة بـ الهلالي دائماً
مشرف منتدى الجمهور الهلالي
تاريخ التسجيل: 20/01/2002
المكان: وسط المعمعه
مشاركات: 12,895
إقتباس
في مباراة الاتفاق والهلال الاخيره كنت انا وولد اختي علي نتابعها ، وعلي هذا هلالي متعصب عنصري متشدد ، ومتحمس مع المباراة وانا اشجع الاتفاق ، المهم يوم تقدمنا على الهلال الشوط الاول وبدا الشوط الثاني وانا اقوله ورى ياسر ما يسجل ، قال مدري عنه ياخي لكن عندي احساس انه بيسجل مدري ليه ، قلت له تبونه يسجل صدق حطوا على المرمى لوحه مكتوب عليها استراحه الخرج وراح يدل القول

!!!!!!!!!!!!!!!!!!

اخوي عبد العزيز ما ننكر موضوعك جميل واسلوبك حلو ونستمتع بطرحك ..
لكنك ( ولا ادري بقصد ام بدون قصد ) تدس السم في العسل !!
اخي الكريم نحن منتدى هلالي قُح ولذلك تجمعنا هنا وقد نتقبل اي عضو بصدر رحب
ولا نريد منه الا ان يحترمنا مقابل كل شيء ..
لكن اذا تجاوز الحد بالتاكيد سيكون الخيار ايقافه بدون تردد ..وغير مأسوف عليه .

هذا الرد للعلم والاحاطه !
بالتوفيق للجميع .
   

 

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML مسموح
Trackbacks are مسموح
Pingbacks are مسموح
Refbacks are مسموح



الوقت المعتمد في المنتدى بتوقيت جرينتش +3.
الوقت الان » 12:58 PM.

جميع الآراء و المشاركات المنشورة تمثل وجهة نظر كاتبها فقط , و لا تمثل بأي حال من الأحوال وجهة نظر النادي و مسؤوليه ولا إدارة الموقع و مسؤوليه.


Powered by: vBulletin Version 3.8.7
Copyright ©2000 - 2019, Jelsoft Enterprises Ltd

Google Plus   Facebook  twitter  youtube