ورى مــــا عــلــيــــــــك طـــــــاقـــــيــــــــــة ؟!!! - نادي الهلال السعودي - شبكة الزعيم

البارق · #1 24/01/2003, 01:40 PM

[c]بسم الله الرحمن الرحيم

أخواني ............ أعزائي

السلام عليكم ورحمة الله وبركاته.. وأسعد الله صباحكم وجميع أوقاتكم بكل خير..

طبعا جالس في المنتدى مالي شغل غير التقفيل والحذف

ومن كثر ما مليت منها

قلت خل ندور لنا شيء جديد..

طبعا جلست أقلب في جنبات المنتدى ( ما يمديكم على جنبات

) لقيت لي صورة ما ادري وش سنعها ألا وهي هذه الصورة :

وبعد الضغط عليها فتح لي شيء ومكان قابل للكتابة قل خل نجرب ونكتب .. وهو اللي طلع اللي تشوفون قدامكم..

وأنا أقول وشلون الناس يكتبون مواضيع ..

أثر ما يبيلها شيء..

المهم عندي قصة طريفة وكنا نسمعها من زمان ونتسلى فيها .. وكان ما يهمنا فيها إلا كونها قصة أو طرفة !! ولكن اكتشفت إن لها معاني ثانية وإنها صارت شبه حقيقة .. وفي طريقها لتكون الحقيقة..

القصة هي :

كان يا ما كان في الكنكان

أقصد .. يقولون وانتبهوا لكلمة يقولون .. إن فيه قرد ونمر.. وكان هذا النمر طايح ( ن ) في القرد ضرب أو في رواية تلزيخ وفي رواية صمتية ( مردغة ) ..

أي أنه كان يتمردغ فيه أيما مردغة

..

طبعا.. كان كل ما شاف القرد يقول له : تعااااااال

ليش ما عليك طاقية ؟؟!!

وبعدها خذ يا مردغة..

وهو على هالحال كل يوم ..!!

..

طبعا القرد .. من كثر ما (( مل )) من المردغة .. راح يشتكي النمر .. عاد ماله في هالحالة إلا كبير الغابة ( الأســـــــــد )

..

قال له تكفى يا طويل العمر ;) أنا داخلن على الله ثم عليك .. ورمى شماغه وعقاله في حضن الأسد

قال الأسد .. سم آمر وطلبك مجاب يالقرد <--- طبعا عشان اللي طلب منه الطلب قرد يعني ما يقصد إنه يتهزأ فيه..

قاله القرد السالفة .. وقال إن النمر ما غير يتمردغ فيني كل يوم .. وأنا بعييييييييييييط..

قال الأسد : مافيه سبب ..؟؟ يعني ليه يضربك ..!! قال القرد : ما فيه شيء بس هو ما غير يقول لي : ورى ما عليك طاقية..

قال الأسد .. خلاص .. بشوف النمر وأرد لك ..

قام طويل العمر الأسد .. وراح للنمر وقال له عن السالفة .. وهل صحيح ما سمع <---- أسلوب تحقيق والا هو داري ..

قال النمر : إيه <----- شين وقوي عين

..

قاله الأسد ليش ؟؟؟!!!!!!

قال النمر : ياخخخخخخخخخي ما احبه .. ما اطيقه .. ما هضمته .. أو ما بلعته

يعني ما خش مزاجي .. وودي اضربه كل دقيقة ماهوب عاد كل يوم ..

قاله الأسد : طيب .. بس على الأقل جب له سبب للضرب يكون مقنع ماهوب ليش ما عليك طاقية ..

قال النمر : مثل إيش يعني ؟؟!!! <---- الله من الدباشة ..

قال الأسد : يعني قله مثلا .. رح جب لي تفاحة

وإذا راح وجابها لك كانها تفاحة حمراء قله ليه ما جبت لي صفراء .. وكانها صفراء قله ليه ما جبت لي حمراء ..!!! وبكذا تقدر تضربه بس بسبب مقنع نوعا ما

..<---- ويلوموني في الأسد بعد حكييييييييييم..

طبعا الأسد .. راح للقرد ( لأنه راحمه ) وقال له السالفة .. ووش اللي بيطلبه منه النمر ..

وقال له : لكن إذا طلب منك تفاحة .. قل له تبغاها حمراء والا صفراء ..

<---- ما قلت لكم حكييييييييم

طبعا .. وفي اليوم التالي .. كان القرد يناقز على بعض الشجرات ( كعادته ) شافه النمر .. قال له : تعاااااال

جاء القرد وقال له .. سم وش بغيت ..:sad: :sad:

قال .. يالله .. رح جب لي تفاحة..

القرد تذكر التعليمات .. قال : وش تبي تفاحة حمراء والا صفراء

..

النمر صار وجهه

قال .. أقول .. ورى ماعليك طاقية

ورجع مرة ثانية للضرب..

وكانك يا ابو زيد ما غزيت..

عاد المقصد من سالفتي ذي أو القصة سياسي

<----- شفتوا وشلون الواحد يستدرجكم..

أقول .. هذه القصة ماهي إلا واقعنا المرير .. واستعداد دولة الكفر ( أمريكا ) لضرب العراق .. فبدايةً كانت تحتج في ( عدم السماح للمفتشين بدخول العراق ) وبعد جهد سمح العراق لهم بالدخول ..

ثم احتجت على ( رفض العراق للمفتشين بدخول بعض الأماكن ) وبعد جهد ومفاضات كذلك سمح لهم ..

ثم الطامة الكبرى .. وهي أنه ثبت خلوها من الأسلحة النووية أو أسلحة الدمار الشامل.. ولكن أمريكا مع بريطانيا مصرة على أنها موجودة..!!!!!!!

يعني باختصار .. ودهم يضربون العراق بأي وسيلة .. ولا لقوا سبب مقنع..!!!!!

والله لا يهمنا في هذه المسألة إلا شعب العراق وأهل العراق لأنهم المتضررون الوحيدون من ذلك .. وربما أيضا أصابنا نصيب منهم..!!

فربما تتذكرون في حربهم مع طالبان.. سقطت قنبلة على إقليم (( بلوشستان )) السني .. وهو البعيد كل البعد عن طالبان ومواقعهم وحكومتهم..!!

وراس مالها تبرير مثل وجيههم بيقولون : آسفين ... كان باب الطيّارة مفتوح .. والقنبلة ما احد ماسكها و (( تدربت )) - أي تدحرجت - ولا ردها شيء إلا ديرتكم..

..

ولكن نقول ... اللهم رد كيدهم في نحورهم..وأشغلهم بأنفسهم.. واللهم إنا نعوذ بك من شرورهم..

هذا ما جال به خاطري.. وللجميع أحلى تحية وأزكى ســـلام ،،،

أخوكم / البارق

[/c]