السلام عليكم ورحمة الله وبركاته
كيف حال الاخبار والعلوم
ياخي المجلس ناآاآاآاآاآم نوم موب طبيعي ما ادري ليه
وانا قلت خل اعطيهم وحده من سوالفي
بسمالله نبدا :
بعد ما درست 9 سنوات بالتحفيظ بنفس الزملاء,
بديت الثانويه بمدرسه ما اعرف فيها احد ابد ابد, ورحت لمركز الاشراف لعلي القا واسطه ينقلن للمدرسه الي فيها كل الاقارب ,
لقيت واسطه , وبعد تنقيل الاوراق من مدرسه لمدرسه تم النقل بنجاح والحمدلله , نقلت للثانويه الجديده وما حسيت اني غريب لاني اعرف ناس كثارين .
بعد مانتهى الفصل الاول خرجت بنسبة 87 % مع رسوب بالفيزياء .
رجعنا للدراسه الفصل الثاني , وثاني يوم من الدراسه بالفصل الثاني رحت لمركز الاشراف ناوي اروح لثانوية التحفيظ , وكان خالي يشتغل بالاشراف وهو ال يضبطلي كل اموري , قلتله اني مليت من الدراسه بالثانويه العامه وانا اصلا كرتون بالدراسه يعني لو اجتهد لاقصى قوتي ما راح احصل نتيجه .
قلي خلاص الاسبوع الجاي اكلم امك واعطيه خبر اننا نقلناك .
الكلام هذا يوم الاحد من الاسبوع الاول , يعني باقي ثلاث ايام ويقضي الاسبوع الاول .
خربت العلاقه مع جميع المدرسين والطلاب والوكيل والمدير وتاخر صباحي ونوم وغياب << كل ذولي سويتهن بخمس ايام ثلاث من الاسبوع الول واثنين من الثاني ,
كلم خالي على امي وقاله ان النقل صعب او لايمكن , يعني خلي ولدتس ينسى انه ينقل ويبلع العافيه فثانويته الي هو به الحين .
قالت لي امي الكلام هذا , وانصدمت الصراحه لا المدرسه مالي وجه اكمل به ولا يوم , مافيه ولا واحد ما جدعت عليمه كم كلمه .
اقتنعت ان مافيه نقل للتحفيظ ورحت للثانويه العامه .
صرت دراستي بالثانويه كالتالي : اطلع الساعه ست ونص وانزل اخواني وآصل مدرستي سبع الا ربع , اول ما آصل اسدح المرتبه ونووووووووووووم لين الدرس الثاني او نهاية لاول , ادخل واكمل النوم لين الدرس الخامس , بعدين اسولف مع الي وراي لين نطلع من المدرسه .
درست 3 اسابيع بدون كتب كتبي كلهن بقراطيسهن جدد .
جت ايام الاختبارات , والدرجات مصفره كلهن ,
بعد يمكن 6 اسابيع جان وجع برقبتي , وجع موب طبيعي , هجرت السوني والكمبيوتر اسبوع عشان تطيب , والحمدلله خفت شوي ,
تدرون من وشو جان الوجع هذا , جاء من كثر النوم على الطاوله , و وضعية النوم خطا وانا اطول نايم بالفصل يعني تقريبا ساعه او ساعه ونص متصلات .
كل المدرسين معطينن جوي وتاركينن انا على راحتي الا واحد .
هالمدرس ذا هو كابوسي واكبر كوابيسي , هو مدرس الفيزياء , والي يقهرن زياده اني راسب عنده , وكل يوم انا وياه تحليت هرج , لين لقالي حل الي هو يتركن انام .
انا على نياتي انه خلاص بخلين انام , لكن يوم شفت درجات المشاركه صارت مصفره مثل الاختبار .
وكبر الكابوس لين صرت شايلن هم الفيزياء طول اليوم .
واكره يوم السبت والاحد عشان الفيزياء
لكن انا ودي القا حل الصراحه ان نفسي زهقت من هالمدرسه .
وقضت السالفه لكن وش رايكم منب غبي يوم تسرعت وخربت العلاقه مع الجميع , صراحه اني تحسفت اني تسرعت .
وسلام يالربع << على قولة المفقود اليامي < الا على طاريه هو وينه الحين
والسالم خير ختام
آسف على لاطاله