الان أولى ثانوي درجاتها على ما أعتقد أنها ما تدخل في المعدل التراكمي لـ شهادة الثانوية بـ شكل عام , على حد علمي .
أنت الان شد حيلك وحاول تتعدى مرحلة أولى ثانوي بـ أي معدل .
في ثاني ثانوي أبدأ صفحة جديدة سواء في مدرستك أو غيرها
أنا أعرف شخص أكبر من مني بالعمر ولكنه متأخر درسياً لانه كان يرسب في المتوسط والابتدائي لكنه في الثانوي شد حيله وجاب معدل تقريباً 98% ودرجة جيدة في القدرات والان هو في السنة الثانية في كلية الهندسة بـ جامعة الملك سعود .
معانتك هذي مسويها ولد عمتي الان هو في أولى ثانوي ومخرب أوم أمها في النصف الاول كل اسبوعين يحظر مره وفي الاختبارات النهائية فقط يسلم الورقه فيها اسمه و دوره في قاعة الاختبارات نقل المعلومات بين أصدقائه , الان سحب ملفه وحاول ينقل لـ مدرسه أهليه و رفضوا والحين جالس بالبيت (نوم ولعب بـ كود 6 
) ويقول بـ أعيد أولى ثانوي السنة الجايه وللاسف هو المفروض الحين يدرس بـ 3 ثانوي لانه قد رسب في المتوسط . ولد أختي كان يدرس في البدائع عندكم في مدرسة تحفيظ القران أبوه تعين في الرياض وأضطر يدرس في مدرسة عاديه وهو الان بـ ثاني متوسط ويصيح عند أمه و أبوه يقول ما أبي المدرسه العاديه (يقول يكروفوني بالواجبات) مب دلع زي التحفيظ على حد قوله , نحاول معه يقتنع و يقتنع بعد فترة يرجع لـ نفس الموال , أنا قلت لـ أختي أتركيه فترة وساعديه بـ حل الواجبات و تنظيم وقته و راح يتعود على الكرف والتغير .
المهم أن الشخص مـا يتحطم لانه فشل بالعكس يحاول يعيد الكره ويعرف أخطائه ويتفاداها , ولاتفقد الثقة بـ نفسك أنت وش تفرق عن غيرك من الي نجحوا وحققوا نسب عاليه , الفرق فقط أنه كان يركز بشكل جيد ومجتهد أكثر في التعلم والمذاكره .
بالنسبة لي أتمنى منك أن تستمر بالثانويه العامة "علمي" وتشد حيلك وتجتهد صحيح أنك راح تواجه صعوبه في بعض المواد مثل "رياضيات - فيزياء - كيمياء - انجليزي" لكن تستطيع أن تتغلب على صعوبة هذي المواد بالتركيز عليها من أول الدراسه ومذكرتها بـ شكل دوري حتى لاتتراكم عليه (وصدقني المعلومات الي فيها ماهي بذاك الصعوبة) وتستطيع أن تستعين بـ مدرسين خصوصيين أو دورات تقوية في هذي المواد حتى تفهم بعض مواضيعها .
أفضلك أن تستمر بـ تخصص العلمي لانك إذا تخرجت من هذا التخصص راح تتاح لك كل التخصصات اذا كانت معدل متميز .
إذا كنت لك ميول واضحه جداً و واثق من نفسك انك تستطيع التميز فيها مثلاً عندك ميول في اللغة العربية والنحو فـ أنصحك بـ اكمال تعليمك في القسم الشرعي وتتخصص في الجامعه بـ تخصص لغة عربية وهكذا .
