21/01/2011, 02:15 AM
|
 | زعيــم نشيــط | | تاريخ التسجيل: 31/12/2007 المكان: هلالي مانشستراوي
مشاركات: 601
| |
أبشركم صرت عآآآآآآطل
السلام عليكم ورحمة الله وبركاته
المشرف : ألو السلام عليكم
أنا : هلا وعليكم السلام ورحمة الله , يالله حيه ؟؟
المشرف : الله يحييك كيفك بدر ؟؟
أنا : بخير ولله الحمد الله يسلمك
المشرف : ماسمعت اليوم أخبار جديدة ؟!
أنا : لا والله ليه وش صاير
المشرف : والله يابدر عندي لك أخبار ماهي زينة
أنا : الله يستر وش هي ؟؟
المشرف : اليوم صدر قرار بتوقيفك عن العمل
أنا : !!!
المشرف : معاي يابدر
أنا : أنا إيه معك لييه !!
المشرف : والله خلاص وقفوا العمل في البرنامج وسرحوا موظفين اليوم كدفعة أولى أنت منهم والدفعة الثانية على آخر الشهر
السالفة طال عمركم أني موظف في أحد البنوك طبعاً موب رسمي عن طريق شركة متعاقدة
وللأسف حنا نعاني مشكلة كبيرة من خلال هالشركات ومعاناة مايعلم بها إلا الله
خلوني أقولكم السالفة من الأول قبل سنة تقريباً قدمت إستقالتي من عملي السابق
اللي كان في أحد المجمعات التجارية (مول) بسبب قبولي في هالوظيفة اللي هي في
البنك طبعاً كنت أبي (النحشة) بأي وسيلة من العمل في المجمع لأسباب كثيرة
وما أنسى أن الوالدة الله يحفظها كانت تبيني أطلع لأي وظيفة غيرها ولو براتب أقل
المهم برى الأسواق والمجمعات التجارية خصوصاً أن باقي لي سنة ونص وأخلص
الجامعة وإن شاء الله بحصل الوظيفة الأفضل
أستبشرت خير لما عرفت أنهم قبلوني قبول مبدأي ورحت للبنك عشان المقابلة
سويتها ولله الحمد وعدت على خير
نجي للُب الموضوع الآن
لما خلصت من المقابلة أرسلوني لشركة عشان أوقع للعقد , الشركة اللي راح أشتغل
عن طريقها في البنك رحت لهم وأعطوني صيغة العقد عشان أوقعها
وللأسف انصدمت منها !!!
وعشان ما أطول عليكم العقد صار عقد إذعان !!
يعني بالمختصر المفيد البنك حفظ لنفسه كامل حقوقه والشركة المشغلة أيضاً
لكن بالنسبة للطرف الثالث اللي هو أنا لي الله !!
أحد البنود كمثال في العقد يقول :
أن للشركة أو البنك ما أذكر بالضبط له الحق بإنهاء عمل الطرف الثالث اللي هو أنا في أي وقت !!
وهذا مثال بسيط للظلم يعني مالك حق أنك تراجعهم أبداً في هذا الموضوع
وطبعاً ماتقدر تعترض على أي بند لأنهم بيقولون موب عاجبك في ألف غيرك بيعجبهم
مع العلم أن إداري من جنسية عربية في البنك أقصد إداري في قسمنا حاول فصلي سابقاً
بسبب تافه جداً مايستحق إنذار حتى لكن كان فيه مدير سعودي جزاه الله
ألف خير عني وقف في وجهه وبقوة وساندني وعدى الموضوع على خير
نسخة بدون تحية لوزير العمل
نسخة بدون تحية لكل مسؤول قادر يوقف المهازل في القطاع الخاص ولا سوى شي
نسخة بدون تحية للبنوك والشركات ومُلاكها اللي تاركين الطاسة ظايعة والضحية الشباب السعودي المكافح
نسخة بدون تحية لصالح كامل اللي يقول أن الشباب السعودي مرفهين ويبون شغل في مكات أو مدري وش قال
هذا أنا وفيه غيري وش كثرهم وأعرفهم شخصياً من زملائي يدرس الصبح في الجامعة وفي المساء يشتغل !!
للأسف مافيه أي حقوق بالنسبة للطلاب الجامعيين اللي يشتغلون في المساء
والوظايف قليلة جداً جداً بالنسبة لهم ومافيه ألا بالأسواق والمجمعات
اللي توفر وظايف مسائية بس واللي أنا شخصياً لو وش ماصار مارجعت لها أبداً
آسف اذا طولت عليكم وآسف اذا أزعجتكم وآسف اذا صار الموضوع موب مرتب
لكن هو شي بخاطري وصدري وقلت خلنا نفضفض شوي
وبالمناسبة هذا أول موضوع لي تقريبا بالمجلس 
اخر تعديل كان بواسطة » ™MŘ.βάđя في يوم » 21/01/2011 عند الساعة » 03:06 AM |
الوضع الشجري
