حياكم الله احبتي الكرام وهذه بعض الحروف والمشاعر التي احببت ان اتواصل بها معكم بعد فترة من الزمن اصبت فيه بشح في الكلمات والحضور .. ولعلها ان تكون بداية للانطلاقة بكم ومعكم
قبل أيام مررت بجانب احد الساحات الازفلتية التي كنا نلعب فيها كرة القدم قبل ما يقارب العشر سنوات , فشدني وجود شباب يلعبون الكرة , فاقتربت منهم متذكرا تلك الأيام الخوالي , ووقفت إلى جانب الساحة بسيارتي أشاهد المباراة ,فإذا بي أرى بين اللاعبين 3 من الزملاء الذين كنت العب معهم ! حقيقة تعجبت من مواصلتهم الركض على الازفلت رغم تقدم السن والعهد! وحاولت أن أتخيل نفسي اركض بينهم بخفة ويلهمسون .. وأسدد بقوة رودي .. وأتفنن بمهارة التايب .. وفي خضم هذه الأفكار والأحلام تلقيت كورة صاروخية كادت تودي بما تبقى من حياتي لولا لطف الله .. وكأنها تقول لي زمان يا فن >>>شعنده أبو يعقوب .. فحركت سيارتي قائلاً هذه حال الدنيا ومتسائلاً هل أنا المخطئ حينما غيرت حياتي وتجاوزت تلك المرحلة بما فيها ؟ أم أن هؤلاء الثلاثة هم المخطئين لأنهم بقوا كما هم مكانك راوح لمدة 10 سنوات؟ ولكن والحقيقة تقال أنهم مازالوا يتمتعون بـ لياقة جيدة .. المهم أنني غادرت المكان وأنا اردد قول الشاعر :
ياأيها اللاعب المحلوق شاربه ** هذا زمانك إني قد مضى زمني
شاهدت أباء من الظلم أن تطلق عليهم صفة الأبوة لما يتمتعون به من بلادة إحساس وقلة ذوق حيث إنهم غير مؤهلين لتربية الدجاج ناهيك عن تربية الأطفال ! ومنهم رجل اقل ما يطلق عليه انه ثور بحق وحقيق !! حيث أن القدر جمعني به في مكان عام وكان معه ابن له من العمر 10سنوات تقريباً هذا الابن المشاغب كان خالي من الأدب حيث لم يترك كلمة بذيئة في القاموس ولا حركة وقحة في الأخلاق إلا أتقنها بدرجة الامتياز مع مباركة من والده السامج الذي ما زاد على أن قال (( ها الولد من وين يجيب ها الكلام )) وهو يضحك على خيبته وخيبة ابنه !! وكان ضحاياه عامل هندي وآخر مصري ليس لهما حول ولا قوة ..
حقيقة كان الدم يفور في رأسي وان أشاهد تصرفات الابن والأب وتمنيت لو أن لي درة كدرة عمر بن الخطاب رضي الله عنه حتى ابطح ذلك الرجل على بطنه فوق الأرض وأمام الملأ واجلده بالدرة على ظهره هو وابنه إلى أن يقولا أصبحنا وأصبح الملك لله .. وأقول لهما " متى استعبدتم الناس وقد ولدتهم أمهاتهم أحرارا " .
مع كثرة ما نسمع من المصائب والمشاكل أصبح الواحد منا يخاف على نفسه وان كان يحمل سيف عنترة وقلب كليب , ولا أخفيكم أنني صرت أتوجس خيفة من كل إنسان غريب مدرعا بقولهم احترس من الناس بسوء الظن لأن القانون لا يحمي المغفلين , -وبالفعل القوانين الوضعية لم توضع لحماية المغفلين إنما وضعت لحماية الهوامير حسب اللغة الدارجة في هذا العصر -! ما دعاني لكتابة هذا هو أن شخص بالشارع طلب منى جوالي ليجري مكالمة وأول شيء تخيلته بعد طلبه هو شكلى وأنا ألاحقه من شارع إلى شارع وأنا اصرخ حرامي حرامي ولان الجوال لم يهن علي قلت له كم الرقم فأعطاني الرقم واتصلت به واقتربت منه أكثر حتى يكون قريباً مني لأنقض عليه مع أي حركة خيانة تصدر منه .. لكن ولله الحمد تم الأمر بسلام.
حقيقة اعتقد أن من مصائب هذا العصر أن يكون الإنسان خائفاً من عمل الخير بسب ما يراه من استغلال بشع من بعض ضعاف النفوس ومرضى القلوب لنواة الخير في قلوب الناس .. مما يجعل من اكتوى بنارهم يحسب ألف حساب قبل أن يسدى معروفاً لشخص لا يعرفه !
الأديب الماجد يعود بحروف خنفشارية تحتاج لردود طويلة تغضب الخال الماصل
مشكلت ناس كثير أن مهما تقدم الزمن تذهب وتعود وتجدهم في نفس المكان
تذكرت مديرة مدرستي الإبتدائية لازالت موجودة الى اليوم وهي عجوز رجلها والقبر
كانت عجوز وأنا طالبة عندها والى الحين في منصبها
لها فوق الثلاثين سنة في نفس المكان والمدرسة من سيء الى أسواء ولله الحمد
صاحبكم اللي يطامر في الأزفلت مثله مثل معلمات الأبتدائية الكل يتطور وهم محلك سر
أما التربية آه على التربية أتذكر قصيدة مجلس رجال لعبدالرحمن بن مساعد لين شفت هالأشكال
مو معناته نضرب الطفل لكن ما نضحك على غلطاته ونعلمة الصح عشان ما يستمر على الغلط
للأسف أن الأهل يحتاجون تربية أكثر من عيالهم
أما سوء الظن فللأسف أنه نتاج التربية وضحك الأهل على حبيب قلبهم لما يغلط ولا يدرون أنه تعلم الغلط منهم
فوجود هالمربين ينتج لنا جيل بلا أخلاق يجعلنا نسيء الظن حتى لانتعرض لمواقف لانحب أن نتعرض لها
كنت أسولف مع أمي عن الحرب فكان الناس تاركين بيوتهم ومتجمعين ببيت واحد
وكنت أضحك على حماقة تفكيرهم بدال ما يموت عايلة وحدة تموت عشر عوايل
المهم كنت أقول أنها فرصة للحرمية فقالت أمي ما كان فية حرمية أذكياء مثل الحين
لو هالشي في هالوقت كان كانت الحرب سوق جميل وفرصة ذهبية لهم
_________________________
يعطيك العافية أيها الماجد وجميل أن نرى حروفك من جديد
جميل ان تستحضر كلمات كهذه بعد معاناة من شح في الكلمات ..
انت لست مخطئي وهم ايضا لم يخطئو ولكنهم لم يتخلو عن ممارسة اختاروه هم لانفسهم ولم يفرضها عليهم وقت قد مضى
احبو ان يستمرو وكان لهم ذلك كما فهمت من كلامك وانهم لازلو يتحلون با لياقتهم وارواح مقبلة على الحياة با امل ..
اما انت ربما اخترت ان تشغلك الدنيا وليس انت من تشغلها عكسهم تماما لذلك سوف تشغلك دئما وتكتشف انك اضعت فرص كثيرة لانك سلمت نفسك واستسلمت لمشاغل الحياة التي لن تنتهي الا با موتنا ..<<< لحق على نفسك
الاباء << ها النقطة متشعبة واذا بديت اتفلسف فيها ايش با سكتني با الله ما اقول غير الله يعين ويسهل بس ..
أصبح الواحد منا يخاف على نفسه وان كان يحمل سيف عنترة
تعامل مع الناس من مبداء احسان النية عشان بس ما تصير تتوجس خيفة من كل غريب
الدنيا بخير طالما ان نظرتنا لهذه الدنيا هكذا فلن تخيب بإذن الله ..
حقيقة اعتقد أن من مصائب هذا العصر أن يكون الإنسان خائفاً من عمل الخير بسب ما يراه من استغلال بشع من بعض ضعاف النفوس ومرضى القلوب لنواة الخير في قلوب الناس .. مما يجعل من اكتوى بنارهم يحسب ألف حساب قبل أن يسدى معروفاً لشخص لا يعرفه !
بالنسبه للموقف الثاني .. بصراحة يقل احترامي للأب اللي يكون ابنه جالس يستعبط ويستهبل قدام الرجال .. وهو يعجز عن إسكاته ..
لأن قلة الأدب من الطفل .. يعني أنه لم يحترمك ..
وسكوت الأب عن قلة أدبه .. يعني أنه لم يحترمك أيضا ..
لا أطلب أن يقوم الأب بإنزال الخمسه على وجه الطفل أمام الضيوف ..
فهالشي رح يكسر ويهين كرامة الطفل .. قدام الناس ..
لكن المفروض أن ينبهه ويحذره أو يزعق عليه بالكلام ..
ولا راحوا الناس .. يجي دور العقال
//
مادمت أنك كنت من رواد الملاعب الإزفلتيه ..
فهذا يعني أنك كنت تشرب ( الميكروكروم ) شرب .. اللي لو حطيته على الجرح .. قعدت تناقز من الحرقان والوجع ..
الله يعينا من إصابات هالملاعب ..
عالعموم ودنـا نشوف شي من زمنك الجميل .. بأقرب لقاء على ملعب ثيل ..
( بالسابق كان عندي تصور أن جميع شباب المجلس العام .. مالهم خص بالكوره .. وأنهم كلهم كرووش ودببه ولأنكم فشلتوا في إثبات نفسكم داخل المستطيل الأخضر .. لجأتوا للمجلس العام.. لين ماشفتكم بالصيف .. وسمعت عن هدافكم أبو خشم .. وعن أبو يعقوب المجلس اللي هو أنت .. حتى تغيرت نظرتي تماما )
صار لي موقف زي كذا كنت في يوم عند صرافه وجاء باكستاني قال ابغى اشوف المخالفات اللي عندي بصراحه خفت وقلت رحت فيها
عاد اخوكم ذيب قلت صبر خلني اسوي استعلام عن الرصيد و صار 13.5 لا غير اول مره استانس وانا اشوف 13 ريال في حسابي يعني تراني طفران
ماتلاحظ ان كل اللاعبين اللي قلتهم هلاليين ..! ماشاء الله ياهلال ..!
بس من شروط المجلس العام انك ماتدخل الرياضة في مواضيعك والا علشان مشرف يعني ..!
المحور نبر ون شف بصراحة ..! شي يضيق الصدر اذا تركت شي ..! وانا مع اخوياك الثلاثة ولو ان الصحيح معك ..! يعني عاطفياً معهم .. وصدقياً معك ..<<<حلوه صدقيا ..! علشان محد يزعل بس ..
المحور التانى << قلب لبناني ..!<<<نفس الوزن تانى ولبنانى <<< غطيت على عبدالرحمن بن مساعد << ابصير رئيس الهلال <<< باقي اسهم والا تراك طولتها اقصد هذي اللي ين قوسين ((<<<<)) لاتفهمون غلط .. الحمدلله والشكر يارب ..! الله يعافيهم ولا يبلانا ..!
المحور السالس ..هالمرة مصري .. من جد الحين القانون يحمي اللي معه فيتامين و .. والحمدلله على سلامة جوالك ..! من جد ياخي ودك تسوي خير بس للاسف ..!
برايفت .. انا قلت برايفت لماجد مقبل وش تبون انتم تحددون ..! وش صار على الشاورما ...
لحظة لحظة ..! وش قصة دمي ازرق وابيض..؟! وسمعنا عن اعتزالك المجلس .؟! هل صحيح انك ستقبل اعطاء يوزر لاحد في حال اعتزالك ..؟! <<< راعي طويلة .. اذا تبي اسالة غيرها ترا ماعندي مانع املي لك الصفحة بس ترا ثلاث اربعها مكرره ..
شي حلو انكـ تزود الاماكن اللي كنت تزورهـا يوم انكـ شباب < وهذا يعتبر وفـاء للمكان اللي ضمكـ قبل سنوات .. مااعتقد انكـ مخطـأ بس الحياة تتغير ويتغير النظام فيها وحتى مشاكل الدنيا الدوام ومن قبله الجامعه يمكن تكون الهتكـ عن الممارسات اللي كنت تمارسها اول
**
ذكرتني بعمي ,, على كثر مايضرب ولده على كثر ماينهبل الولد ويزيد بكلامه المفروض من اول مايشوف شيئ غلط من ولده يعلمه مو يتركه لما يتعود بعدين يقول مدري من وين يجيب هالكلام! اجل ليش جايب عيال مدامك منت عارف تربيهم ؟!
**
والله معاكـ حق تخاف على جوالك <راح عليها جوال بالجامعه فيه ناس تخرب على ناس .. وماعدنا نفرق بين هالناس ,, علشان كذا الواحد يحذر من اي شخص بغض النظر عن نيته ..
شاهدت أباء من الظلم أن تطلق عليهم صفة الأبوة لما يتمتعون به من بلادة إحساس وقلة ذوق حيث إنهم غير مؤهلين لتربية الدجاج ناهيك عن تربية الأطفال !
إذا كان رب البيت للدف ضاربا ×× فشيمة أهل البيت كلهم الرقص
وينشأ ناشئ الفتيان فينا ×× على ما كان عوّده أبوه
مع آلاف القصص و الحوادث التي نسمعها..
و الأغلب حدثت معهم شخصياً..
أنا قبل 4سنوات.. سُرق جوالي من أمام بيتنا و بعد صلاة المغرب و تحت تهديد السلاح و كثرة العدد.!
فشئ طبيعي جدا جدا.. أن نخاف..!
بخصوص الجزء الأول .. يازين الواحد اللي يتذكر الشئ وهو في موقع الحدث ! يعني تروح مكان كنت تلعب فيه كورة من عشر سنوات ولاتكون الساحة اللي تنتظر تذاكر المباراة والفرفرة اللي مالها سنع ههههههههههه لا احد يدري بس
إقتباس
حتى ابطح ذلك الرجل على بطنه فوق الأرض وأمام الملأ واجلده بالدرة على ظهره هو وابنه إلى أن يقولا أصبحنا وأصبح الملك لله .. وأقول لهما " متى استعبدتم الناس وقد ولدتهم أمهاتهم أحرارا " .
هلا حي الله اديبنا ومشرفنا ابو مقبل بالنسبه للأيام الخوالي ولعب الكوره حلو ان فيه احد مستمر يلعب وينمي هوايته يوم بعد يوم .. مع ان الوقت الان والدنيا تغيرت وابعدت الناس عن بعض يكفي ان فيها تجمع وصداقات وتعلم فنون ومهارات بس اتوقع ما تخلو من الضربات والاصابات التي تبقى وصمه في جبين الذكريات الجميله ..
اما بالنسبه للتربيه مو اي احد يستحق انه يربي ومثل ماقلت ان هالأبو مايستاهل يربي دجاج .. التربيه شأنها عظيم وماتجي بين يوم وليلة .. البعض عندهم انا أمنت احتياجات طفلي وتابعت صحته هذا اهم شئ .. وباقي الأمور الولد يعلم نفسه .. الولد محتاج توجيه وغير كذا والأهم محتاج قدوه عشان يبني عليها شخصيته ..
اما بالنسبه لقضية سوء الظن انا كنت اول من المعارضين لها وديننا الحنيف يأمرنا بحسن الظن ولكن الله يرحم حالنا مع الزمن والدنيا تخوف لازم الواحد ياخذ حذره من احد غريب .. وبالنسبه للجوال معك حق انك تخاف لأن القصص اللي نسمعها والروايات خلت عندنا ردة فعل من هالأمور .. ومن هالمواقف انا اخاف من الحريم اللي يتسولون ومعهم اوراق لأن القصص تخوف بصراحه من تقمير وغيره فصرت اي وحده تسألني ما احط عيني بعينها او من بعيد .. مره وحده تناديني وانا طايره وهي وراي تقل سباق جري يابنتي يابنتي يوم التفت واحسب معها ورقه واثرها تسأل عن مصلى انا في وقتها انحرجت واعتذرت منها وقلت لها السالفه وقالت معتس حق يابنتي ..
اخوي ماجد عذرا على الإطاله ويعطيك العافيه على الموضوع المنوع والجميل كعادتك .. ولاتطوول علينا ..
حلو انك زرت مكان يجمع ذكريات وصداقات مدري بس مااتوقع انه خطأ منك الدنيا تتغير والتغير للأفضل احسن من الجلوس على نفس الحال لسنوات طويله
بالنسبه للتربيه هذا الابو يضحك على ايش بالله بدال ماتأدبه وتعلمه تضحك معه البعض فاهمين التربيه غلط الطفل بحاجه انه يعلم ويتعلم وينبه عن الخطأ بكل شي محتاج تربيه تصفه بمصاف الرجال إذا كبر مو يضحك معه على اشياء تحتاج توجيه و تأسيس وتربيه صح
بالنسبه لسوء الظن للأسف ماتنلام من كثر القصص اللي نسمعها والواحد مايعرف النوايا انا إذا طلبت مني وحده بالسوق انحرج واسكت فهي تحس اني مابي وتقول خلاص والله ودي اعطيها بس اخاف تاخذه او تسوي لي شي < تأثير القصص