السلام عليكم ورحمة الله وبركاته


كل عام وانتو بخير بعد الزحمه

طبعا انا حسبتها لو بعطي كل واحد عيديه فلوس والله اللي يبيلي ميزانيه بنت كلب وكل اللي موفره من رواتبي وفوق هذا ديون الى بكره الصبح ... خير وانا جايبكم وناسيكم ... والا مسؤول اصرف عليكم لا ابوكم لا ابو اللي فكر يعيدكم والله منتو وجه <== طيب وراك عصبت ما احد قالك يبي شي

المهم حبيت تكون عيديتي لكم موضوع متواضع من سموي الكريم

اخترت نجم موضوعي اليوم لاعب انا اقدره كثير محبوب عند عشاق ناديه ولو وسط المباراة خربت اخلاقه وقلبها كيرم يحبونه ويمشونها له

لاعب تجد له عشاق بكل العالم وبمختلف الميول ... لاعب هو ملك واسطوره ... عندما تتكلم عن ايطاليا فمن الصعب والصعب جدا ان يمر حديثك بدون ذكر اسم هالاعب ..

خلوق ... هادئ ... اذا احد قالك وش معنى قيادي ... تابع هالاعب واوصف له وش يسوي

يستطيع قيادة شعب باكمله ليس فريق فقط برودة اعصابه جنبته كثير من المشاكل نادر تشوفه متنرفز او يعارض الحكم او حتى مطرود لاعب تشوف وجهه ترتاح له

موضوعي اليوم انا متاكد انه سيخص عشاق هالاعب قبل عشاق اليوفي

لاني انا شخصيا اتابع اليوفي واميل له احيانا لاجله

انه ملك يدعى ... اليساندرو دل بييرو يدلعونه الملك اليكس و دل دل يا عمري انا

ما رح اتكلم عنه وعن سيرته بالطريقه الاعتياديه ... هي مقابله سويتها معه باحد الايام وحبيت انقل لكم وش اللي صار بهالمقابله <== رمضان خلص وبدا الكذب يشتغل

حقيقة هو لاعب يروقني كثيرا قلت ما لي الا اسوي معه مقابله حصريه لشبكة الزعيم حبايبي

قبل لا ابدا المقابله لاني ما شاء الله ملاحظ لي فتره ان فيه اعضاء كثير صارو يدققون على اي شي وطلعت فتاوى وصارت مشاكل من ورى اختلاف وجهات النظر لدى البعض
بسم الله بعرض لكم المقابله اللي دارت بيننا

طبعا كان فيه مترجم يوصل الحكي وينسق بيننا <== ما يبي يترك لنا ثغره ندخل عليه فيها انه كذاب

ســ / هلا وغلا اليكس بشبكة الزعيم معنا الاعضاء كلهم مشتاقين لسماع صوتك اشر لهم بيدك

- هلا وغلا دحمي <== عادي يمون علي كنت معه بثانوية تورينو
بصراحه اتشرف اني اكون معكم على الشبكه ... واول ما عرفت انك انت اللي بتقابلني فضيت عمري على طول

ســ / السؤال المعتاد بالبدايه ... بطاقتك الشخصيه !!

- اسمي اليساندرو دل بييرو ... مواليد 09-11-1974 ... اسم امي *****

** تم تحرير الاسم من قبل الهلالي 11 تماشيا مع العادات

بديت مع نادي بادوفا من عام 91 - 93 لعبت معهم 14 مباراة وسجلت هدف واحد ... حاليا اعتبر اسطورة لليوفي ورمز الوفاء لهذا النادي الكبير

ســ / متى بدأت تتعامل مع النت والتكنولوجيا وهالامور !!

- يا رجال التكنولوجيا طفشنا منها قبل لا توصلكم انا ما لي بالنت كثير ... احب ادخل مسن كثير عشان اخلص اعمالي ... شبكة الزعيم بصير ادخلها من بعد هالمقابله ... من يوم عرفت النت وانا على مواقع الرياضه اعشق كرة القدم جدا

ســ / لو سجلت لك يوزر بالشبكه وصبغتك اخضر لمدة ساعه بس ... وش تسوي !!

- انت متخيل اني بقول بحاول اقدم افكار واطور المنتدى ومدري ايش
لا لا روقنا يبو طبعا اول شي بلغي جميع روابط الدوري الايطالي غير اليوفي واولها رابطة الانتر ... بسوي بحث كل واحد حش فيني سابقا بوقفه
وبصبغ لون المنتدى ابيض واسود


ســ / على طاري الابيض واسود طقمكم اذا جيتو تسوونه تخلون القماش اسود وتحطون خطوط بيضاء والا العكس زي سالفة الحمار الوحشي يعني على مر السنين

- تدري بخليها بنفسك زي ما الكل بنفسه يعرف وش سالفة الحمار الوحشي وماني معلمك

ســ / سجلت هدف رائع ورائع جدا بالتشامبيونز ليغ ... كنت تتوقعه !!

- اوف اوف يا هو هدف ابن كلب كنت قاصده بس بصراحه ما توقعت يجي بهالروعه ... الجميع اندهش ...



حتى انا يوم دخل هدف قلت اخس ماني عاقل ... ولا اراديا رحت اركض وشقلبت حسيت بعدها اني فعلا ماني عاقل



** الصور المتحركه تم زرفها من توقيع فارس الزعيم

ســ / وش سبب حركتك المشهوره انك تطلع لسانك بفرحتك بالهدف !!

لا عادي لا تدقق ام العيال خاقه مع لساني ودايم تتغزل فيه احب اوريها اياه بعد الهدف عشان تشجعني وتتحمس


ســ / قبل الختام ... موقف طريف حصل لك ... ما ادري اذا عندكم بايطاليا موضة لا يحضرني الان لكن عندنا زمان تركنا هالحركه بسرعه تذكر لك واحد !!

- مدري انت كذا تبي موقف سريع سريع ... تدري خذ هالموقف

مرة كنت انا وتوتي ومالديني رايحين ناكل بمطعم وانا اللي عازمهم ترى ما امزح تحسبوني اني بكشخ عليكم لا جد انا اللي كنت عازمهم

المهم وديتهم مطعم كشخه وحركات واكلنا اكل شي بصراحه المهم يوم جا الويتر عطانا الفاتوره ... انا اخذتها وحطيت له فلوس وحطيت له زياده على اساس يفهمها وياخذ الباقي له

المهم عطيناه اياها وقلت للشباب مشينا قالو اوكي ... المهم طلعنا نمشي للباب واحنا نمشي وانا اللي اقز ابو الشباب اللي عطيته الحساب يلحقنا انا اشرت للشباب استعجلو شوي بالمشي عشان يفهم انه ياخذ الباقي له وسوو نفسكم ما تشوفونه

المهم هم اسرعو بالمشي وخوينا يلحق وراهم لين طفش يوم وصلو الباب تهور الويتر وناداهم ... قال لو سمحت لو سمحت شوي بس

انا التفت عليه ونفسي اسطره انه يا غبي افهم منت وجه نعمه فلوس وجتك خذها

قلت له هاه وش تبي ...

قالي معليش بس الحساب اللي دفعته طلع ناقص يورو لو سمحت كمل حسابك

وانا اللي اقمط ام العافيه ... وتوتي ومالديني تسدحو من الضحك


** شكرا لك يا ملك على وقتك ولنا لقاءات ثانيه ان شاء الله


بالعكس تشرفت وانبسطت معك ... ويا ليت تزورنا قريب


** كلمة اخيره لمحبيك بالمنتدى


حاب اعلن عن تكفلي بحضور 10 اشخاص على حسابي كل مصاريفهم يجون يحضرون مباراة لليوفي على الطبيعه ويرجعون لبيوتهم

طبعا العشر اشخاص انا مكفل الهلالي 11 يختارهم من عنده ... افضل 10 ردود بموضوعه تتكلم عني هم اللي بيفوزون <== يبي يهيضكم تردون

==============================

كل ما قريتوه فوق هو مجرد خرابيش على قولتهم ... شوية سوالف يعني حاولت اتكلم فيها قليلا عن لاعب محبوب عند الكثير

ما حبيت اطول بالمقابله لاني ما حبيت اطول بالموضوع

ما كان ودي اخلي الموضوع بس وش رايكم بهالاعب ... واحط لكم بعض انجازاته واهدافه

كثير المواضيع اللي تتحدث عن سيرة لاعبين ومتوفرة بكثرة عند الاعضاء

لكن هي فكره حبيت من خلالها ان اطرح اسم لاعب معين بطريقتي ... وانتم من تتكلمون عنه وعن سيرته ورايكم فيه

يعني المجال مفتوح لكم ولكم كامل الحريه ضمن نطاق وحدود الادب وبدون مشاكل مواضيع الدوري الايطالي المعتاده

من اراد ان يشارك برايه واضافة اي لقطه او صورة متحركه لهالاعب يشرفني وينورني لو حسيت ان الموضوع بدا يخرج عن ما وضع له انا اول من ساطالب المشرفين باغلاقه لذلك رجاء لا تحدوني على ذلك

ساترك المجال لاقلامكم وردودكم قبل الختام تقبلو تحياتي اخوكم الهلالي 11 ( عبدالرحمن )



هدف دل بييرو الخرافي على زينيت بالتشامبيونز