أما عن الأكل الخاص بالعيد و مكوناته فيقول :
غالباً ما يكون " جريش " أو " رز تمّن " , و هذه هي الأكلات السائدة و الوحيدة أيضاً
و ذلك يعود للعوز و قلةِ ذات اليد,حتى أنهم لا يعرفون اللحم و ما في عُرفه حتى وهم في العيد .
أما الجريش فيتكون من لبن + زبد + جريش + بزار .
و رز التمّن : فهو كالرز العادي و لكن يُضاف له التمّن أو ما تسمى" المسمنه " وهو نوع من البزار المحلي .
و عن ملابس العيد قال :
الرجال يفصلون ثوباً واحد و يكون هو ثوب الرجل من العيد إلى العيد و يكون إما :-
( " أبو شخص " أو " الخام " أو " زبده " ) و تلك هي أنواع القماش التي يفصلون منه ثيابهم .
أما النساء فلباسهم يكون :
" روز " أو " جنينه " أو " طبطاب " أو " ثوب مضلع أسود " أو " ثوب خمري " أو " قماش خد الحصان " .
وعن الألعاب الشعبية الخاصة بالعيد يقول
كانت هناك عدة ألعاب نمارسها يوم العيد , و لكن أشهر هذه الألعاب :
- أم خطوط ( يلعبها الذكور فقط ) .
- الحدل ( يلعبها الذكور فقط ) .
- البيّه ( يلعبها الذكور فقط ) .
- الدزقه ( للذكور و الإناث ) .
- مصاقيل ( للذكور و الإناث ) و هي ما تسمى في الوقت الحالي لعبة " الطبه " أو " التيله " .
- الكعابه ( للذكور و الإناث )
و طريقتها : يأخذون ( كعابة الغنم ) و تكون بوجهين , وجهه فيه حفره و يسمى ( خرق )
و الآخر أملس و يسمى ( مسح ) , و يختار اللاعبان كلا منهم أي وجهه يريد و الفائز "
من يظهر له الوجهه الذي اختار" , و في الوقت الحالي يلعبها الصغار ولكن بالعملة المعدنية .
و أما عن العيديات التي كانوا يحصلون عليها يقول : كنا نردد عباراتٍ خاصه في وقتِ جباية العيديات كعبارة : " حققونا بققونا , لا جاء أبونا حققناكم " ! و إن لم يجدوا إجابة من أحدهم أو إعراضاً منه يقولون له : " قولوا مهناش , خلونا ننحاش " ! 
أما عن ماهيّة العيديات فيقول : في الغالب تكون إما : ( "قريض" أو "حلاو ملبس" أو "سبال" ) و من لم يجد أي منهن يكتفي بتمر "ميّبس" . ثم يضيف قائلاً : كان كلاً منا يحرصُ على أن يكون ثوب العيد( مخباته ) كبير , كي ينال نصيب الأسد من العيديات 
.
و عن الفرق بين عيد الماضي و الحاضر قال :
" مختلف في كل شيء " ثم سكت . حاولت أن استثيرهُ كي يواصل الحديث فاكتفى بجملته السابقة "
مختلف في كل شيء " و زاد فلا الفرحة هي الفرحة ولا الناس هم الناس .
التوقيع / 
غيمة عطش
س / يُمه كلمينا عن أستقبالكم للعيد زمان أول كيف
كان ؟ وطريقة زينتكم وذكريات العيد ؟
ليلة العيد.. يابنيتي الحريم يبعدن عن البيوت ويجتمعون البنات ويرقصن ويلعبن لعبة الغميمة ..
يقول الشاعر :
شفتها نهار العيد ترقص وتلفح
............................ والعين خرساء والمبويسم ذبوحي
ويوم أوحيت حسـك تهرجين
............................ ريعت ترييعت خالوج لحاشي
( الشاعر يسمع بالشعر وزن وقافية ولا اروع ) ومما قيل في نهار العيد : لاجاء نهار العيد وأن طقوا التيل .. .................................... ماعندهم من غاليً يلبسونه
طقوا التيل : قاموا يرقصون ..
اما الشباب نفس الكلام يرحون بعيد عن الديرة كلها عشان ما يضربون من الرجال الكبار ..
يوم الحناء :
أول شي حناء الشعر :
نحني الراس من العصر - اللي من بكرا العيد - ونروح للعيد بالحنا
بعد ما نحني الشعر نحط " المفرق " ( وهي صبغة لونها أحمر يوضع على فرقة الشعر) ..
طبعاً أمي أذا حنت شعورنا أنا وخواتي تجدله و " تغللنا " يعني تربط الشيلة على رووسنا بقوة ..
يقول الشاعر :
رأس العشيرة يجي خمسين ..
.................................. غير المزاديم والحوية
اللي يبيــها يجــيب ألفـــين ..
.................................. وعبيدً حقه الفلــــــوه ..
العشيرة : بنت
يجي خمسين : لها شعر وجدايل
المزاديم : الجدايل اللي تصير قدام عند الأذن .. ( وش عندهم غليص )
الحوية : الجدايل اللي من وراء
الفين : المهر
عبيد : أخو البنت ويكون نصيبة من المهر ( السياق ) فرس ..
والشعر طبعاً كسو الرحمن يابنياتي ..فضيل
أنا يوم كنت بعمركن كان شعري يجلس معي ...
مير مثل بنات هاللحين صار العيال والبنات شكل واحد ..
اليديـــن :
أول يوم من العيد مايمدينا نحني يدينا .. لأننا نلعب ونرقص فنخلي حنا اليدين لثاني يوم من العيد ..
نحنيها كلها وجه وقفى وونقش الحناء نقش ثم تربط أمي يديننا بقماش عشان ماينحاس الحناء ..
والمتزوجة بذيك السنة تحني رجليها ..
ثيــاب الــعيد : كنا نخيط ثيابنا عند ( سلمى العايض ) الله يرحمها ويغفر لها .. كانت مصممة الأزياء لهم .. << وش عندها التركية
وأهم الموديلات ..
1- (مقاطع ) تكون منقوشة ونضع بها تخاريص حمر(حرير)
والنقش يكون على كل الذراع .. ويكون غالي الثمن ..
واللي ما تنقش ثوبها تشتري جاهز وتلبس الكموم ..
2- ثياب القيطان
ويكون فيها خشخاش ويلبس فوقها ثوب اسمه سيف العدل
(اسود مخطط) يشابة الثوب الخليجي الآن ..
3- اما السروال..
يكون فيه نقش من تحت .. والرجال بعد لهم زيها ومنقوشة ..
4- الغطوة.. ( الطرحة )
يكون بها هدب طويل ولونها أسود .. وأهم وحده هي غطوة خشم البلبول ..
.. انا ماأريد امريكتكم
............................ وأبي نايف المدلول
وأبي هامــــة ً حمــــراء
.......................... من تحت خشم البلبول ..
الــذهب :
1- معاقيد وهي عبارة عن (ضفادع ومراتسل ورعاف ) ومفردها معقودة .. وبذاك الوقت هي أغلى الذهب ياصل سعرها لــ 300 أو 400 ريال .. ( كل ماقلت يُمه وش معنى ضفادع ومراتسل اشرحي قالت هذولي هن تسذا أساميهن يعني مثلي مثلكم مدري وش هن ) 2- الرشوش - خلاخيل هالخلاخيل ماتوحين إلا دنينهن (يعني ماتسمعين إلا صوتهن ) .. 3- كفوف - خصور ( تنحط باليد عبارة عن خرز) .. 4- زنود فضة - الفردة ( تنحط من الخشم الى الأذن لونها فضة) 5- المورقات (مقطوعة ذهب أبيض)_ الهامة _ خماخم كباراسمهن الفوانيس الحمر ( الخماخم : فيما معناه الحلق أو التراجي ) 6- الخواتم عبارة عن (شرقي و محمر) .. 7- سبات احمر وابيض .. مجول لكن فيه فصوص وشرقي ( المجول : هي الغوايش أو البناجر ) .. الله يرحم زمان أول أجل مثلكن الحين لو عندكن مالبستنها
فــجر الــعيد ..
عاد لاجاء فجر العيد يبدون يطبخون العيد من بعد صلاة الفجر مثل ( جريش- قرصان- مرقوق- عصيد - حنيني (عليه اقبال أكثر من الشعبيات).. وكل صنف وله شكل : مثلاً الجريش تحوضه وتحط بوسطه (طاسة او غرشة) فيها سمن ويأخذون ويغطون بها ويأكلون .. بعد مايخلصون الطبخ نلبس ونتزين ونطلع لصلا العيد الرجال برا والمحراب ذاك الوقت عبارة عن حصاة كانوا يصلون على أرض بيضاء .. قبل لا يخلص بناء المسجد ... بعدها الرجال يجتمعون من ( الزايد مروراً بالمسيلمية وللفرس إلى الرسيس 
) ( بالله ياريري وش عرفهم للزايد والرسيس ) و يجتمعون برا وياكلون عيدهم .. والحريم يدخلن جوا بواحد من البيوت .. ويتعيدون الصبح بدري ثم يتفرقون ثم اللي تبي ترجع بعد المغرب ترقص لحد مايطيب خاطرها .. بعد كذا كلاً يروح لاهله .. وعيديتنا ثاني يوم من العيد .. نجتمع حنا يالبنات ونتقهوى ثم نتخارش ( نقط ) على 10 ريال أو 5 ريال ونشتري علب الأناناس والكمثرى هي حلاونا ذاك الوقت بعدها نبدأ نحني يدينا .. والقروش ذاك الوقت عبارة عن ( فرنسي - سعودي - نقود خضر ) ... ( طبعاً الفرنسي هذا من بقايا شهر عسل جدتي يوم ودها جدي لفرنسا ) وهذا هو عيدنا زمان أول يوم حنا بنات قبل نعرس
ختمت جدتي ذكرياتها بقولها ..
ياراعي القبر يامرحوم ..
........................... لو تنهض الراس وتراعي ..
ياليتك حاضرً زمان اليوم ..
.......................... لا تنهض الراس وتراعي ..
يابنتي الدنيا تغيرت الحين والناس تطورت ..
طيب يُمه يالغاليه كلمة توجهينها لأعضاء الزعيم ؟
وش زعيمة بعد ... هذا الهلال يمه وهالسوالف بنزلها بالكمبيوتر الله يجزاكم خير ذكرتوني بزمان أول زمان شبابي وياملا العافية ياحفيدتي والله الله ببنتنا يالشبكة خلوها تأخذ راحتها وخاصة في ماجاء في باب الشتشته 
<< أبد ترى ماقلت لها يمه قولي هالكلام ورددي من وراي
دعواتكم لجدتي (حلوة اللبن ) بالصحة والعافية ويطول بعمرها ويحفظها لنا يارب .. جاني ذبات من جدتي وانا أحاورها بس كنت أحط هالفيس >>
فاصلـهـ ..
طبعاً كل السوالف هذي لجدتي قبل زواجها يوم سألتها عن عيدهم بعد
الزواج قالت مابوه أختلاف عن أعياد هالوقت الا شي بسيط ..
الف شكر لكل من قام على هذا الموضوع
والشكر موصول لطاقم المنتدى الاستشاري
وكل عام وأعضاء الزعيم والشبكة بالف خير
عيدكم مبــارك ..
عمار يالمجلساوية عمار
العيد برؤيه جنوبيه على لسان والدتي الله يطوّل بعمرها 
في البداية يمه ودنا نتعرف على عادات أهل الجنوب أيام العيد قديماً كيف كنتم تستقبلون العيد؟
في ليلة العيد يكون بالبيت حالة (استنفار) كُلنا صغار وكبار مبسوطين أخواني مع أبويه وأنا وأخواتي مع أمي
ليلة العيد كُنا أنا وأمي وأخواتي نقوم بأشغال صعبه نجهز الصلل ونلمـّع الدلال
والبراريد ولمعتها تنشاف من راس المجلس الدرج نصبغه والجدار نصهّره
فرش غرفة أستقبال الضيوف لازم يتغيّر كُل عيد واذا انتهينا من شغلنا اجتمعنا
انا و أوخواتي عند أمي عشان تحط لنا الحنا إستعداداً لـ أول أيام العيد
حالياً يمه اجتماعتنا بالعيد غالباً ماتكون بإستراحات إجتماعتكم أيام أول وين كانت ؟
بـ حكم أن جدش هو الكبير ولأن جدي أبو أبويه كان ساكن عندنا
فكانت الجمعه الرئيسيه ببيتنا نجتمع ونفطر مع بعض ونجلس نسولف
وبعدها نروح نعيّد ع الجيران وبقية الأقارب .
تعودنا منك يمه بكل عيد تسوين لنا أكلة أهل الجنوب المشهوره (المبثوث) أنتم وش كانت أكلتكم الرئيسية
بالعيد أم ان أكل المبثوث صباح العيد شي مُتعارف عليه ؟
المبثوث مطلوب لأنه خفيف لكن من ناحية انها عاده لا لكن لأن أبويه كان يفضل المبثوث
كانت أمي تسوي الشي اللي يعجبه طبعاً ماننسى العريكه والتصابيع ومرقوق سمن
ولايحلى أكل العيد الا بوجود القهوه والشاهي والحلويات
طيب يمه بالنسبه لملابسكم وش كنتم تلبسون زمان وهل جربتي لبس الثوب العسيري ؟
أنا ماني عسيريه ليش ألبس الثوب العسيري , العسيري خليته لك
أما ملابس العيد بختصرها وأقول نلبس كُل شي جديد
ولا أنسى الـ منديل كنا نشتري مناديل ملونه ونكشخ فيها
والوحدان والخرصان وكانت أجمل لحظه لمّا نلبس هـ الأشياء
بما ان عندنا جيش من الأحفاد وانتي ماشاءالله عليك كل عيد تقولين ودوهم الملاهي
خلوهم يلعبون ويستانسون أكيد انك تحنين لـ الألعاب الشعبيه القديمه
وأكيد بالعيد لها نكهه خاصه , وش هي ألعاب العيد اللي كنتم تلعبونها ؟
والله ما أذكر اني كنت ألعب ألعاب كنا نجتمع احنا وبنات الجيران ونسولف هذي لعبتنا احنا يالبنات
لكن أذكر اني كنت اشوف اخواني يلعبون عكّل عكّل عكّيلا هذا اللي أذكره
دآئماً أول من يعايدني انتي بعدين أبوي وغالباً تكون العيديه فلوس تتراوح بين الـ 300
وساعات تنخفض الى 100 لا أعلم ما السبب ,
لكن الأهم ما أول عديه أخذتيها وفي الغالب تكون عباره عن ايش ؟
أول عيديه أخذتها كانت من والدي الله يطول بعمره وغالباً ماتكون فلووس وما نمانع اذا كان فيه معها حلويات
بين أيامنا وأيامكم سنوات أكيد كل شي تغير وتبدّل وش الفرق بين عيدنا الآن وعيدكم زمان ؟
أيامنا أول أجمل وأحلى ولا تسألين ليش أول كانت النفوس صافيه كنا كلنا أخوان ماكان فيه أحد غريب بيننا
أذكر كان عند رجالنا زمان عاده حلوه كُل رب عائله ياخذ عياله من الكبير للصغير مافيه أحد يجلس بالبيت
ويبدءون بزيارة أقاربهم من (الحريم) فقط يعني مثلا ابويه ياخذ أخواني
يزور عمته خالته جدته أمه خواته وزي كذا مايبقي حرمه يعرفها الا ويزورها ويعايد عليها
وبعد مايرجع كلنا نلتم حول ابوي ويعطينا عيدياتنا كنا نفرح فيها فرح عظيم رغم انها كانت
قليله جداً ماتـُـقارن بعيدياتكم اليوم
وفي ليلة العيد كان الكل ينام استعداد للعيد
أما هالأيام الوضع انقلب الليل نهار والنهار ليل
يمكن هذا أكثر شي يضايقني بـ أعياد هالأيام
وليلة ثاني العيد كانت تُسمى بـ (اليتيمه) لأن كل شي بالليل
يكون هادئ الناس كلهم نايمين من أرهاق الزيارات والدنيا تصير هاديه جداً وتكثر
فيها السرقات على اساس كذا سموها الليلة(اليتيمه)
يمه ودي أختم لقائنا بموقف حصل بالعيد ولازلتي تتذكرينه ؟
والله المواقف كثيره لكن ما اتذكر الا ولادة أمي بليلة العيد ولدت بنفسها وماكان معها أحد الا اني اخذت الطفل ومسكته معي الين جات عمتي بعد ما ارسلت واحد من اخواني يبلغها ويقول لها تجي تساعد امي . وباليوم الثاني قامت امي تطبخ وتستقبل الضيوف وهي ماكملت يوم 
من ولادتها الله يطعنّي عنها
بكذا أكون انتهيت من مقابلتي من والدتي في الجانب المتعلق بـ عيد أهل الجنوب
نختلف في المناطق وتختلف اللهجات والعادات ونبقى أحبه مُتحابين في الله
وكلُ عامٍ وأنتم بخير
التوقيع / عسيريه
في معرفة حلول العيد تقول أم فهــد . نعرف بان بكرا عيد لما ترسلنا امي للحوش او فوق سطح البيت ونجلس ننتظر اصوات البنادق ولما نسمعها نعرف ان بكرا عيد..
والسبب لان ما عندنا لا تلفزيون ولا رادي..وبعض بيوت القريه عندهم رادي فيعرفون ويقومون يرمون بفرحة العيد واحنا نعرف كذا..
طريقة استقبال العيد اول ما نعرف ان بكرا عيد كنا نصيح ونفرح ونحضن بعض من الفرحه.. بعدها نقوم نغير فراش بيتنا كامل ونصفطه ونحط فراش العيد..لانه كان عندنا فراشين ..فراش للايام العاديه وفارش للاعياد بس وكنا نحس ان بيتنا جديد.. واغلب البيوت كانت مثلنا تغير فرش بيتهم.. بعدها نتروش ونتحنا والساعه 10 الكل نايم.. بعد صلاة الفجر نتقهوى مع بعض ويروح ابوي واخواني لصلاة العيد .. واحنا يالحريم نبدا نتجهز ونلبس لبس العيد..بعد ما يرجعون من الصلاه نتجمع مع اقاربنا كلنا ببيت عمي الكبير ونفطر عنده بعدها كل كل واحد يرجع بيته ويستقبل المعايدين لين الظهر..بعد الظهر احنا نطلع نعايد الناس..
الاكل الخاص بالعيد وما يصنع منه وكذلك الملابس .
بالعيد ما فيه اكل جديد الفطور عريك وسمن وعسل وخبز نسويه بالميفى( التنور ) والغداء والعشاء ..لحم ورز وعصيد ومرق ونكون دايما معزومين .. ما فيه حلاوا مخصصه سوا الحلاوا اللي يجيبونها المعتمرين من مكه اللي لونها احمر واصفر بالنسبه للبس فكان ابوي يشتري اللبس من خميس مشيط وكان يفصله لنا واحد بالقريه..
الالعاب الخاصه بالعيد
البنات ما كانت عندنا العاب كنا نتجمع ونقص على بعض قصص ونتعالم وش سوينا ليلة العيد وكيف فرحنا باول ما عرفنا الخبر الشباب كانوا يلعبون بالدنينه او باصره او مطارده..
العيديـــــــــة . كانت عيديتنا فلوووس فكانوا يعطون خمسه ريال او عشره.. وذاك الوقت لما اشوف الخمسه ريال كأني اشوف خمسيه ريال الحين
الفرق بين العيد الان وعيد الماضي .
زمان كان كل شيء بسيط وكان الواحد وكنا نشوف الناس كلهم مبسوطين
وفرحانين وكانت الضحكه ما تفارق وجه الواحد..الحين مع ان كل شيء موجود
بزياده من فلوس وكل شيء متوفر الا ان حماس الماضي بالفرحه ماهو فيه
وصار اغلب العيد نوم عكس الماضي كنا نصحى الفجر ولا ننام الا بعد العشاء .
التوقيع / abo_nasser
★★ يتبــــع ★★
