نعم

لك الحق يا صالح في ان تشكو حالك ولكن ليس على حساب الوطن ومسؤولين الوطن في قناة دولة اخرى وحولها الشامتين....

مع احترامي يابو فهد وانا كلي محبة لك وتقدير وانا من كبار عشاقك ومشجعيك ولكن.... كلامك لا يصح...

فية نقاط وحقائق ودي اوضحها للمشجعين والجمهور اللي متعاطف مع صالح و اللي ما يعرف الكثير عن صالح النعيمة بعد الاعتزال وانا كنت قريب من اخبار صالح واعرف اخوانه وانسابه.

اولاً :

صالح النعيمة حصل على تكريم مميز وكبير وكان اكبر حفل اعتزال في وقته عام 1411هـ وانا حضرته بنفسي وشفت كل اللي حصل عليه من تكريم ومحبة ودراهم حتى لدرجه ان الارض اللي جنب بيت صالح في حي راقي بالرياض كانت ثاني يوم من التكريم مليانه سيارات من الهدايا في حفل التكريم

ثانياً:

صالح النعيمة حصل على ما يقارب من 5 مليون ريال مجموع هدايا حفل التكريم ومنها 4 مليون كاش ياليت يحصل لي نص مليون منها....ولكن الحمد لله على كل خير ونعمه...

ثالثاً:

صالح النعيمة اشتغل في مجال العقارات وكان يضارب بالملايين في العقار وعنده بيوت في كذا مكان نحلم جميعاً بأمتلاك نصف بيت من اللي عنده

رابعاً:

حسب اخر مأعرفة عن صالح النعيمة قبل 7 سنوات انه يعيش عيشة ميسورة جداً وانسابة من كبار رجال اعمال البلد لدرجة ان وحده من بناته ماخذها رجل اعمال مشهور جداً جداً وتشوفونه دائماً في الصحف

لكن المفاجئة هذا الكلام اللي اسمعه منه عن ضروفة ...!!

كل الناس خسرو وضاعت فلوسهم لكن مارمو المسؤولية على الغير وكبرو القضية وخلوها تقصير من الاخرين

الاسهم أكلت درهم نص الشعب السعودي ولا جو يلومون اللي اعطوهم الفلوس او من تسببو في الحصول عليها وقالو لهم ما عطيتوني

صالح انت اخذت حقك وماقصرو معك الكل وأسألو الامير خالد بن محمد عن اللي اخذه صالح

نعم الجميع يقدرك يابوفهد ويقدر تضحياتك ولكن ما هكذا تورد الابل يابوفهد

سامحوني يأخوان على هذا الموضوع ولكن من قهري من كلامه وتشهيرة بالمسؤولين في الهلال والمنتخب والي مالهم ذنب في اللي هو فيه وعلى قناة ابوظبي واللي تعطي انطباع ان الرياضة السعودية مافيها خير...!!