ياخوان هذا الموضوع غير منقول القصة حدثت لي شخصيا وسارويها لكم بتفاصيلها :

سوزي هذي تعرفت عليها عن طريق احد مواقع التعارف بين الجنسين وبصراحة كان هدفي تعارف وصور بس ..
المهم الانسانة هذي اخذت ايميلي ودخلنا سوا على الماسنجر وبدينا ندردش ..الحمدلله مادخلت في اي سالفة جنسية مع اني كنت ناوي ..المهم من خلال السواليف عرفت ان الحرمة هذي عمرها 42 ومطلقة وعندها ولدين كانت تعيش حالة سيئة لظروفها الماليه في هذا الوقت كان البنك يطلبها 6000$ ..المهم لما شفت وضعها قلت ياولد خليني اعرض عليها الاسلام من خلال الشات
كنت اتكلم عن الاسلام وكانت ماترد بس كانت تقول لي keeb talking يعني استمر في الكلام
المهم تحمست اكثر وبديت اشرح لها اكثر عن سماحة الاسلام وطلبت عنوانها البريدي عشان ارسل لها كتب واشرطة وبالفعل ماترددت واعطتني اياه وقالت لي انا اثق فيك عشان كذا عطيتك اياه طبعا هم يخافون من هالشغلات ... المهم عطيتها بعض المواقع في الانترنت وتركتها وواعدتها بكره.
لما جيت بكره بدت تسال اسئلة عن الاسلام وحسيت من كلامها انها بدت تقتنع ..على طول طلبت منها رقم تلفونها قالت لي اانها ماتبغى تكلف علي فقلت لها ان هالشي ماهو ببلاش انا ابغى الاجر من الله
تفهمت الموضوع وعطتني تلفونها فاتصلت عليها مباشرة وبدينا نسولف عن الاسلام اكثر وانه الحل الوحيد لكل مشاكلها النفسيه والماليه حسيت انها تأثرت مرررره فاستغليت الفرصة وقلت لها ليش ماتجربين الحين وتشوفين كيف راح تحسين بالراحة مباشرة ..قالت اوكي انا جاهزه وابغى اسلم الحين ... طلبت منها انها تقوم تتروش وراح اتصل عليها بعد 5 دقايق ...
بالفعل اتصلت عليها وكانت قاعدة تنتظر .... قلت لها انتي جاهزة قالت ايه قلت لها الحين تنطقين الشهادة طبعا كنت شارح لها معناها فبديت القنها الشهادة حبة حبة
لما نطقت الشهادة سكتت شوي وسكت انا ...
بعدين بدت تبكي من قلب ياجماعة ...لمدة دقيقة او دقيقتين ..قالت انا احس اني ارتحت الحين
طبعا باركت لها وقعدت اشرح لها اركان الاسلام واهم شي الصلاة وارسلت لها موقع يشرح طريقة الصلاة بالصور ومن حسن الحظ انو كان عليها الدورة الشهريه اعزكم الله فبدت تتعلم الصلاة من يوم امس.....
كنت اتمنى اني اكون عندها علشان اوضح لها اكثر واكون معها فبديت ادور عن مركز اسلامي في ولايتها ومن توفيق رب العالمين حصلته في اقل من دقيقة من البحث وحصلت رقم تلفون للمركز فكلمت عليه على طول ورد علي واحد سعودي فشرحت له السالفة وعطيته رقم تلفونها ...
الرجال ماقصر كلمها امس وباركلها على الاسلام وطلب منها انه يزورها اليوم هو وزوجته فوافقت على طول وانا الى الان مادري وش صار عليهم.
ياشباب اللي حبيت اقوله اني شاب عادي مو ملتزم وادخن لكن الدعوة الى الله لاتقتصر على الملتزمين الحين اي عمل راح تعمله راح يجيني مثل اجرها ....
واتمنى منكم تنقلون قصتي هذي في المنتديات حقوق النشر غير محفوظه