ياكثر ما تعاني يابو عبدالله .... قصة حقيقية لسامي الجابر ..!!
الشهر عليكم مبارك وكل عام وانتم بخير .... وتقبل الله مني ومنكم صالح الاعمال ....
بالامس وان جالس بمقهى المساء المعروف باول شارع التحلية بالرياض وكنت انتظر احد الزملاء وكانت الساعة 11 مساء جاء صاحب الكوفي الاخ خالد وجلس معي واخذنا ندردش ببعض الامور .... الا وبالامير سلطان بن محمد عضو شرف الهلال جاي بعدين جاء احد ابناءه وتبعهم الاخ الاكبر للامير سلطان ومعه بعض ابناءة ( شكل الجلسة عائليه ) المهم قام الاخ خالد وسلم على الامراء كلهم ثم تبعته وسلمت عليهم وللامانه كان الامير سلطان في غاية التواضع وكانه واحد من الزملاء ( اكيد عضو شرف هلالي )سلمت عليه يقول لي من انت وعرفت بنفسي وزميلي الاخ خالد عرف بنفسه انه صاحب المقهى وانهم ضيوفه اليوم .
مع ان الجو امس حار جداً وعلى الشرفه جالسين ما فيه مكيفات الا انك ما تقول هذا الملياردير سلطان بن محمد (من تواضع لله رفعه )
يوم جو يمشون قمت انا وصاحبي نودعهم الي السيارة والله ان الامير حلف ما يتحرك احد وانه بينزل لحاله علشان يروح لسيارته وشكرنا على الضيافه وراح بحفظ الله ( على فكرة جاء لحاله وراح لحاله وموقف سيارته باخر الشارع ) مهب مثل هالزعط زحمة وسد شوارع لاني مهم !!!!!
قلت لصاحبي شف وشلون التواضع وهو شخص مهم وامير وملياردير وقدر يجي للمساء جالس يتقهوى بين الناس ...
قال صاحبي فيه ناس كثير ودهم كل يوم هنا بس ما يقدرون قلت من تقصد قال على سبيل المثال سامي الجابر جاء مره ولا عاد جاء غيرها والسبب الشهرة ...
يقولي جاء سامي وجلس وتقهوينا والي الان الامور ماشيه بدون ازعاج مجرد سلام من الجمهور على الواقف الي ان قام احد الجالسين وركب سيارته واخذ لفه على المقهى وجاء قدام الشرفة وقدام الزباين وفتح قزازت سيارته وقام ينادي سامي سامي سامي الين خلا كل الي بالمقهى ينتبه ان سامي موجود وبعدين :
ما فيه كلمه شينه عليه سبه سب امه وابوه وكل اهله وسب الهلال وقال الفاظ جدا سيئة .... للامانه تضايق سامي من جد وبين في وجهه الزعل وانه جاي يرتاح ويستمتع بس الناس ما تركوه لحاله كمل الشاهي واستاذن .
وراح وهو يقول ويضحك وتلومني اذا قلت لكم ما ودي اجي بس هالمرة علشانك عزمتني ....
×
×
×
×
لله درك يابو عبدالله وهذي ضريبة النجاح.....
