15/08/2008, 08:52 PM
|
 | استشاري سابق للرياضه العربيه والعالميه | | تاريخ التسجيل: 04/08/2005 المكان: الظهران
مشاركات: 8,260
| |
|
الخمسة الفرسان في دوري الطليان [ نــقــاش ]
السلام عليكم ورحمة الله وبركاته
اهلا وسهلا بكم في موضوعي المتواضع 
الموضوع راح اطرحه باللغة العامية وراح ابعد عن طريقة الطرح التقليديه
كيف العنوان بس مسوي اثارة 
بكل اختصار راح اتكلم عن الدوري الامتع في العالم , الدوري اللي يخليك تدمن مبارياته حتى لو انها بين فريقين مالهم صيت .
الكالشيو وما ادراك ما الكالشيو
الموضوع عبارة عن وجهة نظر شخصية تحتمل الصواب وتحتمل الخطأ ووجهة النظر راح تكون زي الفكرة العامة عن كل فريق من الفرق الخمسه ( الميلان والانتر واليوفي وروما والفيولا ) ومدى امكانية فوزه بالاسكوديتو وقيمة صفقاته ووضع الفريق بشكل عام .
يعني راح اتكلم عن كل فريق من الخماسي المرعب بوجهة نظر شخصية
وخلونا نتبادل الاراء والاقتراحات والنقاشات بشكل ودي ومحترم وما فيه أي مانع من المزح والاستهبال والشطحات
يعني الموضوع بيكون اساسا عن الفرق الخمسه , واللي بيكشت بكيفه 
وكل واحد له الحرية يرد على اي رد مهو شرط اني انا اللي اناشب الحالي بكل رد 
وباقي على الدوري اسبوعين يعني لازال فيه تعاقدات لكن ابتكلم عن الوضع حاليا اثناء كتابة هالموضوع
اهم شي لا يجي احد يدرعم ويقول مشكور والا موضوع مميز والا يسلمو
اي واحد بيرد زي كذا راح اكلم المشرفين يزودون مشاركاته 1000 علشان يرضي غروره
بسم الله نبدأ مع الفرق
==============================
==============================
الميلان
وضعه العام الماضي :
ما قدر يوصل للمراكز الاربعه المؤهلة لدوري الابطال رغم انه كان الاقرب
لكن حظه الردي انه طاح فريسة لنابولي على ارضه اللي ما يرحم اي ضيف ميلان صار الخامس والجماهير قلبت على الرئيس والنائب لدرجة انهم عرضو النادي للبيع بموقع جديد وطلبو من برلسكوني بيعه !!
اللي حصل : برلسكوني ترك الفريق وتفرغ للسياسة , واللي استلم الطارة جالياني الاقرع القعيطي 
التعاقدات
جالياني مهبل بجماهير الميلان لانه يصرح عن اللاعب اكس ومدري ويش وبالاخير يجيب الموهبة باتو ولا قدر يلعب لين وصل للسن القانوني في الكالشيو , وصار باتو يتحمل ثقل كبير العام الماضي لانه الصفقة الوحيده !
هالموسم الميلان عزز الفريق بكذا تعاقد كالتالي :
1-الكلب الخائن زامبروتا , تعاقد مع لاعب نزل مستواه مع برشلونه غير كذا انه عدا حاجز الثلاثين , يعني لازال فيه الخير والبركة , لكن من وجهة نظري ان اللاعب ماعاد هو زامبروتا القديم , وبرضة نكب ايطاليا بامم اوربا الاخيره يعني ماراح يضيف لميلان ذاك الشيء القوي مرة
والظاهر اودو يمكن اطلق بعد
2-بوريللو : المزهرية اللي اخذها معه دونادوني في امم اوربا ( المزهرية لانه ما لعبه وكان زينه بس ) طبعا هو ثالث هدافين العام الماضي ورجع لناديه الاصلي ميلان بعد ما خلص اعارة جنوى .
3- رونالدينو : صفقة مدوية استغلو فيها الميلانيين الهوشة بين الضرس وبرشلونه ولقطوه باقل الاسعار والظاهر عوضو قيمته بعد ثاني يوم
رونالدينو غني عن التعريف لكن الخوف من طنقرة البرازيليين المعتاده !
4-فلاميني : الارفل كان بيجي لجوفنتوس لكن راح للميلان وتوهق لان الميلان بيلعب بكأس الاتحاد ولا راح يلعب بدوري الابطال , فلاميني ممتاز لكن هل بيقدر يوظفه انشلوتي صح مثل فنجر ؟
طبعا هالتعاقدات بشكل عام معززة للفريق , لكن ما يؤرق مضاجع ( صح بالاديب ) جماهير الميلان هو الشيخوخه اللي بالفريق , يعني اغلب اللي فيه معدين الثلاثين عدا كاكا وباتو وبوريلو وفلاميني ورنالدينو تقريبا
وبرضة دور رونالدينو زي كاكا يعني بيكون فيه تعارض بينهم والجماهير تخاف من هالشيء
المدرب
خطة انشلوتي معروفة ولا يغيرها لو ويش
4-3-2-1 اللي يسمونها الشجرة
وتعتمد على لاعب واحد صانع لعب يكرفه كرف لين يذن اللي هو كاكا
ايام اليوفي كانت صانع لعب واحد وقدامه مهاجمين وانكرف زيدان كرف الويل
بس الميلان ماراح يلعب دوري الابطال يعني اتوقع انه المرشح الاول للدوري لانه بيفضى له صح
الانتر
وضعه العام الماضي
الانتر بطل اخر 3 مواسم ( واحد اخذوه بأثر رجعي , والثاني كل الناس بالسالب , الثالث هو اللي كسبوه باخر جولة )
الانتر متماسك ومتفاهم لانهم من زمان مع بعض
والفريق ما تعرض لاي هزة نهائيا وخلفه شخص مخباته منشقة يعني الفلوس مضايقته ولا يبخل على النادي لكن علة النادي كانت المدرب , والحين حضر مورينو صاحب النجاحات الباهره في الدوري الانجليزي .
التعاقدات
الانتر مازل فيه مشكلة في كبر سن الدفاع بالاضافة الى الافتقار لصانع اللعب , فيجو شيّب حتى ماعاد يوحي , ستاكوفتش ما اظنه بيضبط لانه مندمر من زمان , مانسيني كان ظهير وبعدين وسط وبعدين جناح يعني ما تأمل عليه
الانتراويه كان مأملين بشخص مثل كواريزما او ريكلمي سابقا لكن العلة لا زالت موجوده
الهجوم كروز شايب وكريسبو شايب وابرا الغجري اصابته بريال وسوارزو طلع حق اندية وسط
المدرب
خطة الانتر ايام مانشيني مدري وش تبي 4-3-1-0-2 اغرب خطة في العالم لانها 3 محاور وواحد تايه ماله شغلة وبعدين الهجوم
لكن الأمل الانتراوي كله على مورينو والهدف المنشود الاساسي هو دوري الابطال او عقدة الانتر الازلية لان اخر نسخها حققها كانت مع هيريرا الارجنتيني ابو خطة الكاتيشانو ايام الستينيات
مورينو خبير اوربيا ووصل مع البلوز لدور الاربعه كذا مرة وجاب البطولة مع بورتو يعني صار له باع مع هالبطولة
يعني بعد هالبربرة اللي فوق اتوقع ان الانتر هو المرشح الثاني .
اليوفنتوس
وه بس وش اقول 
<=== الحالهم صورتين
وضعه العام الماضي
اليوفي العام الماضي صار الثالث وهذا انجاز لفريق متفقع ومنلعن خيره ونازل درجة ثانية وطلع نص الفريق الاساسي وخساير بالملايين ومدرب جديد سجله الذهبي ضعيف جدا ولا قد حقق في حياته بطولة دوري ومع ذلك وصل للثالث وهذا هو كان الهدف المنشود ( دوري الابطال )
السنة هذي الادارة جددت الثقة مع المدرب علشان الاستقرار الفني واتفقو مع بعض انه بدل ما يجيبون لاعب خالع يعطيك 90% يجيبون لاعبين في نفس المركز لكن مردود كل واحد منهم 60% يعني صار فيه لاعبين في كل مركز على الاقل
3 حراس مرمى
4 قلوب دفاع
4 اظهره 2 يمين و2 يسار
5 محاور ويمكن يطلع تياجو فيصيرون 4
صناع اللعب والاجنحه 5 وفيه واحد بزر يمكن رانييري يغامر ويضمه معهم ويصيرون ستة
الهجوم 4
وفيه ناس فايضه على التشكيلة
يعني الادارة لبت طلبات المدرب والجماهير تنتظره
المدرب
العلة الان في المدرب لان اغلب الجماهير ما تثق فيه , وبحكم جولاتي في المنتديات الاجنية او العربية فاتوقع ان نسبة الواثقين فيه تجي حول 40% وهذا رقم مخيف جدا
لكن من يدري يمكن يسوي رانييري شي والله اعلم خصوصا ان الفريق منتشي بعد ضمان التأهل للابطال بدرجة كبيره يوم فازو على ارتميدا الفلندي .
تشكيلة رانييري غالبا 4-2-2-2
الفريق فيه اعمار كبيره لكن الادارة معتمدة دمج الشباب مع الخبرة ونسبة الشيخوخه قليله مقارنة بمعدل اعمار الفريق العام مع العلم ان رانييري كنت اسبه ليل نهار بس كلما اتذكر دونادوني اقول يا زينك يا ابوروان وش حليله عنده
رانييري يخمبق بالتشكيلة بس كثير من الاوقات يعدل بالتبديلات مو مثل دونادوني
برضة التعاقد مع رانييري على حسب تصريح الادارة كان له هدف , وهو انه سبق له التدريب في ايطاليا وانجلترا واسبانيا يعني حاطن هالدوريات بمخباته فيقدر يواجه اي فريق منهم في دوري الابطال لان عنده خلفية
وما ندري وش يخبي لنا المستقبل مع هالمدرب الرخيص
للمعلومية :
انشلوتي يستلم فوق 5 مليون يورو , المهم انه حول هالرقم
مورينو 9 مليون يورور
رانييري 800 الف يورو يا حليله ما يخالف ابد خخخخخـ
( ماني متأكد من الارقام 100% بس حولها )
اتوقع ان اليوفي هو المرشح الثالث للاسكويدتو لانه اسمه يرعب الفرق الثانية وغير كذا المنافسة على المراكز بتكون ايجابيه للفريق .
فيورنتينا
وضعه العام الماضي
فريق رانييري القديم
الفيولا العام قدم موسم ممتاز مع مرتبة الشرف , على الرغم من ضعف الميزانية الا انهم جابو الرابع باخر الوقت , وبرضة وصلو لدور الاربعه في كأس الاتحاد الاوربي لكن طلعو من رينجرز بضربات الترجيح رغم انهم باب واحد بس رينجرز كانت خطته 10-0-0 وهذا اللي عدم ام لياقة فيورنتينا
فيورنتينا مستقر مع المدرب براندللي ولا عنده خلاف هالموسم
التعاقدات
فيورنتيا ماسكته ادارة ممتازة جدا ومدير تعاقدات على مستوى عالي بالرغم من مستوى الفريق الممتاز الموسم الماضي الا انهم ضبطو الفريق اكثر واكثر هالموسم زود ان عندهم موتو ومنتليفيو وفري وشلة الانس , الا انهز زودو كم اسم
والاسماء جامدة بعد :
1- الميرون المحور الارجنتيني اشتهر مع امبولي ولا فلح مع اليوفي العام الماضي واخذوه اعارة هالموسم واكيد بتكون له بصمة لان خلفه مدرب يعرف يصقل الامكانيات
2- فارجاس الظهير الممتاز جدا وكان مطلب من اغلب الاندية العام الماضي , يقوم بادورا هجومية رائعه وعنده رجل تدل الباب صح يعني راعي مزعات
3- جيلاردينهو الانبطاحي موهبة ايطاليه ممتازه لكن اندمرت مع ميلان والان براندللي رجع الثنائي القديم ( موتو + جيلاردينهو ) مرة ثانية .
وفيه كم صفقة لكن ما اقدر افتي فيها لاني ما اعرف عنهم شي
هذا وضع الفيولا بشكل عام والتعزيزات تقول انه فريق جامد مرة
المدرب
المدرب هو الداهية الجديد سيزاري براندللي ولد اليوفي البار ( لازم طاري اليوفي ) والكل يجمع على انه مدرب على طراز عالي ويبغاله كم سنة خبرة ويصير من ضمن عباقرة العالم في التدريب ويكفي الانجازات اللي سواها مع الفيولا رغم الخصومات من الاتحاد الايطالي وقلة الدعم المالي .
اتوقع ان الفيولا هو المرشح الرابع لان عنده بدلاء ودكته افضل من روما اللي بيجي طاريه الحين
روما
روما وما ادراك ماروما , الله يصبر جمهوره , دايم يكون قاب قوسين او ادنى من الكالشيو لكن ما يجيبه . العام الماضي روما لعب على جبهتين وقدر يقاوم الانتر لاخر جولة وخسر الرهان , وبدوري الابطال طلع من البطل مانشيستر يونايتد بدور الثمانية . يعني كان مرهق جدا باخر جولات الكالشيو والسبب ما فيه بدلاء كثار على الدكة
التعاقدات
روما باع مانسيني وجيولي وفيراري واشتى ريزه من ليفربول وباتسيتا من ريال مدريد يعني صار فيه معاون لفوزنيتش اللي تبهذل العام الحاله في الهجوم , لان توتي مشكلته الاصابات يعني بشكل عام روما باع 2 في الوسط واشترا لاعب شبه مهاجم اللي هو باتيستا , واعتقد ان اكوالاني وضعه غير مستقر ويمكن تخسره الحسناء سينسيني الظاهر باقي تعاقدات ما تمت لروما من وجهة نظري الشخصية لاتزال دكة روما اقل الدكات امكانيات وهذا يأثر في بطولات النفس الطويل .
المدرب
سباليتي مستقر مع النادي وتعودو على طريقته وهي 4-6-0 يملك الوسط واثناء الهجمة يجي الفريق مع كل محل
لعب الفريق ممتع جدا بس يقولون ان سباليتي بيغير الخطة هالموسم على كلام واحد من العيال ومدري عنه .
توقعاتي ان روما هو المرشح الخامس للكالشيو .
============
قاعدة 1
انا اشجع جوفنتوس يعني اكيد اكره الانتر وروما والميلان لكن بدرجات متفاوتة , طبيعي لو لعب الانتر مع ريجينا ابشجع ريجينا .
قاعده 2
لما اقول وجهة نظري في شي مو معناته اني سبيت احد والا غلطت على ابو احد والا تلفظت على امه , راس مالها كورة لا راحت ولا جت وغير كذا كفار بعد .
هالقواعد لها فائده بعدين لاني متوقع ان فيه ناس بتطفي النور 
============
][.. النقاش..][
1/ وش رايك بكل ما كتب اعلاه ؟
2/ اي سيرفر احسن لترافيان : السيرفر البريطاني والا البرازيلي ؟
وسلامتكم
 |
