<==== ياحليلك والله محد جاب خبرك ياشيخ


لكن والله صدق ابروح للشرقيه اغير جو شوي .. لأن الوضع صراحه مايحتمل من جد .. تخيلوا الجامعه كارفينا (( يعني ممرمطينا يعني فخفينا <== تستهبل انت وخشك )).. عاد اقولكم الجامعه كارفينا <== اخلص علينا .. طيب ... يعني اختبارت وقلق دكاتره وبالأخير بعد كل الجهد اللي بذلنا النتيجه يا D والا شقيقتها F لابارك الله فيهن ثنتينهن هالقبيحات ..

على طاري الاختبارات اسمعوا ذي السالفه :

هذا الكلام بالابتدائي يوم كنت برابع/ب .. يعني قبل 12 سنه تقريبا .. ياسرع الأيام والله وكبرت ياأيـمـن ..


كان عندنا اختبار تاريخ وتعرفون مادة التاريخ أنواع الحفظ (( قلق X قلق )) .. وزع الاستاذ الاسئله وتركنا نحل وهو جلس على كرسيه مسك له كتاب يتسلى فيه ..


طبعا برابع ابتدائي (( برائة الطفوله )) الاستاذ كان واثق فينا اننا مانعرف الغش .. وهو صدق الى رابع وحنا مانعرف نغش ..


لكن كان معنا واحد اسمه (( سليمان )) شرارة الغش بدت من عنده .. وهو اللي أكلها مع الاستاذ .. خوينا (( سليمان )) كان كاتب في يده اليمنى انواع المعلومات .. وماغير نقش في الورقه .. وفيه واحد من الطلاب الدوافير اللي جالسين قدام قزه (( يعني شافه )).. بعدين راح لم الاستاذ .. وهمس له بأذنه : (( سليمان كاتب في يده ويغش )) ..


رفع الاستاذ راسه وشاف (( سليمان )) ماغير نقش ومتحمس مع يده .. صوت له وناداه : ياسليمان .. سليمان تعال ابيك .. قام سليمان وهو يطقطق اصابعه < == تمويه .. يوم وصل مد يده الاستاذ قاله : سلم .. تتوقعون وش سوا خوينا ؟؟ مد له يده اليسار يسلم عليه <== قايلكم برائه الطفوله ... طبعا بعد الحصه جاء سليمان ومسك هالدافور اللي علم عليه وفقع له وجهه تفقيع ياساتر ..


الله يذكرك بالخير ياسليمان لي 11 سنه ماشفته :sad:


لا حول الله .. الحين عطلتنا عشر أيام تقريبا وثم يبدأ الصيفي .. والله حاله :sad:



يقولون بيكهام صار احتياط لفيغو .. والله اني خايف يتأهل الهلال لكاس العالم وتحطه القرعه مع هالفريق .. لا وناوين يجيبون رونالدينيو بعد .. المفروض يتدخل الفيفا ويمنعهم من التعاقدات اللي كذا .. والله قهر <== الصراحه يالمجلس العام : حقين العالميه شايفين انفسهم ولا احبهم (( ياروحي )) .. لذلك قلت افش خلقي شوي هنيا ;)



الا على طاري الرسايل الخاصه <== الحين من جاب سالفة الرسايل الخاصه


سالفة حصلت لي ..


جتني رساله خاصه مره .. رحت وفتحت ملفي الخاص عشان أفتحها .. تدرون وش صار ..

الكوكيز كان مخبط ذاك اليوم ودخلت على الرسايل الخاصه حقت وحده من بنات المنتدى (( أحتفظ فيها لنفسي والله يستر عليها )).. طبعا شفت انواع الفضايح بعيوني الثنتين .. هذا وانا ما قريت الا العناوين بس .. لأني جيت بدخل عليها <== صريح الولد .. لكن قفطني الكوكيز ..

بس أحب أقول للأعضاء اللي قريت أساميهم من ضمن اللي مرسلين وهم قليلين مايتعدون اصابع اليد الوحده الحمدلله : (( اثقلوا يامخفات )) .. والمره الجايه راح أفضحكم بالصور .. وقــد أعــذر مــن أنــذر


عموما ذكرت هذي السالفه عشان كل واحد قبل مايفكر انه يرسل لوحده بالخاص ويحاول يشبك وخرابيط .. يتذكر سالفتي ويتخيل لو واحد صار له نفس الخلل اللي صار معي .. وش يصير موقفه




الله يستر على بناتنا .. وعيالنا .. ويحفظهم من كل مكروه




تحياتي جميعا