[ALIGN=CENTER]السلام عليكم
هلووووووووووووووووووووووووووووو قايز
اوووووه ….نسيت انكم ماتعرفون عنقليزي (سياحيين)
هلا شباب
منذو ويكين وانا ماشفتكم ....!! هذي مشكلة اللي ثقافته انكليزية نسيت انكم ماتعرفون (قصدي من اسبوعين عنكم)
ياجماعه يبيلنا منتدى خاص بالمثقفين العنقليزيين مثلي وشرواي @شرواي الطيب[/ALIGN]

انا بصراحه اتفاجأت بالتوقودوم اللي صار في الشبكه في ظرف اقل من اسبوعين صارت الشبكه الزعيم انترناشونال على وزن انتر زعيماشونال
المهم
اللي عنده شكاوي والا اقتراحات للمنتدى ولشبكه الزعيم
لايرده الا كيبورده يتصل على بيجري الشخصي ...بترد عليكم سكرتيرتي لا يغركم صوتها تراها ركبه(من جماعتنا الشيون)
السالفه
هالايام انا دخلت المنتدى وبصراحه شفت البيبان مهججه(مفتحه) ولا فيها احد
وقعدت انا على كرسي وحطيت نفسي على كرسي ثاني
وصرت اسالها وش اللي صاير على الشبكه بعد ماصارت دوليه الاعضاء نحاشو !!خايفين من الرسوم والضرائب
عاد انا قلت لنفسي لابد انك تروحين للامير ثامر وتكلمينه على مسألة الضرايب والرسوم على الاعضاء
ما اكذب عليكم جاني راشدي على قفاي من نفسي (راشدي=كف باليد اليسرى وفي روايه اخرى حامودي = كف باليد اليمنى ويقول الصريعصي خبير الطراقات والكفوف على الوجه وماجاورها( الراشدي يعتبر اقوى الكفوف على الوجه وذلك لان الاشول يضرب الراشدي وهو ماخذ عزم اقوى في حين ان الاذن اليسرى اقرب للمخ من الاذن اليمنى فلذلك يصل الصوت الى المخ بشكل اسرع- انتهى كلام رحمه الله )
نرجع لموضوعنا (الله من الدجه بهالموضوع)
لما عطا نفسي كف لـ انا قالي وش فيك منتب صاحي اي رسوم واي ضرائب الشبكه والامير ماحطو ضرائب ولا رسوم الاعضاء ثلاث ارباعهم عندهم اختبارات !!!
قلت ااااها ..........تاهت ولقيناها
عرفت السبب الحين !!
الثلاث ارباع اللي عندهم اختبارات كأني اشوفهم مابين واحد منسدح على كتابه ويدربي هالدميجه ولا يدري وين ربي حاطه
وواحدن نايم على كتابه وانواع السعابيل .مصلحه المياه سكرو المويه على بيتهم والسبه سعابيله واصله الى اخر الشارع
وناس مجتمعين مع بعضهم بهدف المذاكره الجماعيه ومفهمين اهلهم انهم يذاكرون مع خويانهم وهم جالسين يفلمون ولا يلعبون كرة القدم في بليستيشن 2 او قاعدين يلعبون بلوت ولا كيرم
والمصيبه الاكبر ان لما تجيهم الاسئله ايام الاختبارات تكون مسربه ومنتشره عند الطلاب كلهم خصوصا اسائلة الوزاره
واحد من أبنائي (قويه الفقشه) يقولي ان الاسئله تجينا الساعه ثلاث الفجر …
لا وشي ثاني بعد اسئلة الامتحان تجي مكتوبه بالكمبيوتر ومزركشه ومصطره ولو تعد الكلمات او الجمل اللي يكتبها الطالب تلقاها ماتتعدى اصابع يديك الثنتين ,,,والنتيجه طالب متخرج من الثانويه
لاتعرف ان تقرى خطه كأن كتابته درب نمل في بر
التعبير عنده ضعيف (مثل حالتتي)
لايعرف ان يكتب باستقامه في ورقه غير مسطره
الاملاء ماعندك احد
أيــــــــــــــــــــــيــــــــــــــــــــه الله يرحم زمان اول ..ا
الله المستعان عام الستينات ايام طه حسين وبيليه وماردونا
ذيك الايام كانو اذا جابولنا الاسئله مكتوبه بالكمبيوتر مانحلها نقول هذا غزو امريكاني وش حيثهم مايكتبون باليد وش هوله الاسراف والخساير
واذا جينا بنكتب الجواب لايغركم ان الخط حقنا كبر البعارين ونخلص ثلاث ارباع الصفحه بجملتين لكن كان عندنا املاء ولا احسن منه اللي يشوفنا يقول هذولا راضعين مع سيبويه ولا سعيد غراب(وش جابه) في ديدن واحد
الشاهد من الحتسي ان الاسباب واضحه ميه ميه كالتالي(طال كني خطيب في مسجد جمعه مافيه الا هنود وباكستانيين _الله من الريحه)
السيميلاك
البابونج(كذا صح كتابته يامعشر امهات المستقبل)
الحفايظ الزينه مره
البربتوز (هذا مصيبة المصايب اللي يبي يعرفه يسال هيفا يا حسره)
البودره وما ادراك ما البودره
اندومي وما ادراك ما اندومي
واخيرا..الوجبات السريعة اللي مليانه زيوت (مدري بس يمكن يكون لها دخل ..وش دراكم!)
نجي للربع الباقي من الاعضاء اللي هم الموظفين والعوطليه ماغير سرداحي مرداحي بالمنتدى
العوطليه جالسين على النت في التشات والمسنجر ودق الحنك معذورين لا عمل لا دراسه لا وظيفه لا للمخدرات
يعني حاجه كويسه انهم شاغلين انفسهم في تشات واشوى من السمردحه في الشوارع والاسواق ومعاكسه الشغالات والسواقين(الاسواق هالايام مافيها الا هم)

نجي بعد كذا للاعضاء الموظفين المدرسين مايهشون ولا ينشون يعني مايقدرون يصقطون احد ولا يأدبون لو عمل حاجه خطأ
مالهم الا الرويتب اخر الشهر واحمد ربك لاتقرقر لا نخصم عليك او ننقلك
وبعد كذا يجون الاخوان الموظفين مثل حالاتي
اللي اليوم عنده زي بكره زي اللي بعده بس الفرق في ان التاريخ في الجوال يتغير وعلى طاولة المكتب المتهالك بالعمل يفتل التقويم لليوم التالي حتى يصل التاريخ الى 24 ليمر على الصراف ويسحب المبلغ المذكور و يصرفه في المفيد واللا مفيد


[ALIGN=CENTER]نهايتووووووووووووووه
انا حبيت ادخل المنتدى واسلم واخذ الاخبار و اسولف واهدر مع الشبيبه بذا وبشكر كل من سال عني واقولهم لا زلت جالس على قلوبكم ومتربع ولا نيب رايح الى ان يقضي الله امرا كان مفعولا[/ALIGN]

نكت عـلى هالضحى
طالب من اهل الديار الواقعه جنوب الرياض-طبعا اكيد عرفتوه-
ساله المدرس: الثعلب يبيض ولا يولد ؟
قال الطالب والله يا استاد الثعلب مكار كلشن يسويه :p
××××××××××××××××××
محشش يسأل خويه :انت ليش اصلع
قال له: من الزمن
المحشش قال : لا عاد تحلق عنده:p