في اجازة نهاية الاسبوع (اربعاء+خميس+جمعة) ماجنيش نوم على قولة الاعصار قلت ياولد ورى ما ( تزرق ) <<< الحقوق محفوظه للعروس ( عروس البحر الاحمر مهيب عروس ثانية ياحسرة ) ..

وفعلا والله كلها مكالمة للقبطان ومكالمة للعضو الجديد ( هلالي صريح ) عرضت عليهم الفكرة ومادرينا الا وحنا في شارع فلسطين ..( عصر السرعة ماحد يقدر يقول شيء ) ..

الحمد لله اجازة نهاية أسبوع كانت ممتعة ..

زاد من متعتها مقابلتنا لزميلنا المحبوب الصوت الهلالي اللي ماشاء الله جانا ومعه الرياضية وعالم الرياضة والاقتصادية من زود التحمس ماشاء الله عليه ..

وفي طريق عودتنا للمطار محملين بالكآبة لفراق الصوت الهلالي .. كل واحد منا أنا والقبطان وهلالي صريح كان معه كيلوين كآبة .. << تخبرون مفارق الصوت الهلالي صعب ;)

المهم وحنا ماسكين سرا في طريقنا للطائرة التي ستقل رحلة السعودية الاضافية رقم 8052 والمتجهة الى مطار الملك خالد الدولي بمدينة الرياض درجة الحرارة الخارجية 35 درجة مئوية ....... اف والله مسكت الخط متأثر بكابتن الطيارة ..

وحنا ماسكين سرا .. قلت يابوعابد ورى ماتطفي جوالك لانك كلها 10 دقائق وانت في الطيارة .. طلعت الجوال ابقفلة الا وتجيني مكالمة على السريع ..!!

ركبنا الطيارة واقلعنا وعقب مااتنصفنا <<< ( متأثر بالشياب ) في الرحلة اعلن كابتن الطائرة عن ربط الاحزمة استعداد للهبوط .. كذلك انطفأت الانوار الداخلية للطائرة استعدادا للهبوط .. وبدأنا نحس بالهبوط تقريبا كنا على ارتفاع 20000 قدم ( 6000 متر تقريبا ) ..

المهم مادريت الا ونغمة ياغايب ليه ماتسأل تلعلع في الطيارة !!!!!!
اف اف اف اف
جوااااااااااااااااااالي ياولد ..
طبعا لكم ان تتخيلون الموقف ..
أنا اختبصت وضاعت علومي وبدل مااضغط نو ضغطت يس ..
اللي جالس في الكرسي اللي قدامي فز فزة تقل احد مروعه وهو غافل ..
شايب في كرسي جمبنا كأن يقرأ جريدة عقب ما رن الجوال ترك الجريدة !!
واحد ورى الشايب كان نايم طول الرحلة قام من نومة وطاح عقالة !!
عيون كل الركاب كانت تناظرني !!
في النهاية طفيت الجوال !!!
طبعا كل هذا المشهد كان في خلال 5 ثواني تقريبا !!!

طفيت الجوال والبدت في كرسيي ماكأني سويت شي !!!! <<< أعجبكم ذهين

فجأة أضئيت الانوار الداخلية للطائرة من جديد بعد ان كانت طافية .. عندها قلبي وصل لرجولي من الخوف !!!
ولكم أن تتخيلون الى أين وصل تفكيري في تلك اللحظة ..
قلبت في راسي كثير من حوادث الطائرات !!!!!!!!!!!!!!
ابليس ملعون !!
تذكرت اني قرأت قرار فصل عميد في وزارة الدافاع بسبب انه تحدث بجواله في الطائرة .. واقول في نفسي اللي عميد وفصلوه .. أجل وش بيسوون ( بحتة مواطن ) ؟؟!!

موقف غير مسبوق !!
اللي كان يضحك شوي ويبكي !!
واللي كان يسولف سكت ..

وانا مغير مسوي نفسي نايم من الخوف ...!!! وكانت 10 دقائق صمت لا اسمع الا بعض الهمسات الخافتة التي تشير لي بكل تأكيد ..:


وفي النهاية هبطنا بسلام .. وحمدنا الله على سلامة الوصول ... وتنفسنا الصعداء ..:up:

طبعا الاخ القبطان وهو يتنفس الصعداء كان يثني على شركة الاتصالات وتقنياتها العالية التي أوصلت شبكتها الى ارتفاع 6000 متر .. وانا اقول له يازينك ساكت ...

وانا من الذراقة ماشغلت جوالي الا يوم وصلت للبيت وابعدنا عن المطار ..

الموقف حصل البارحة الجمعة 22-3-1424هـ في الساعه 12:55 دقيقة ليلا ..

وان شاء الله مايحط الله احدكم في مثل هذا الموقف ...

أخوكم
أبو عابد ..