|
ليش : تهاوشيني الرجال بابا
السلام عليكم .. ورحمة الله ..... وبركاته ......
بالخير ياوجيه الخير ...
اخبار عيالنا المنهمكين بالمذاكرة ... ربي ينجحكم .. ويوفقكم .. ويسهل دروبكم ...
بدخل بالموضوع سريع سريع .. كنك ميت جوع وبيدك ( شاورما ) من الصاج الذهبي .. وملفوفه بعشرين ورقه .. ودك من العجلة تاكلها بورقتها ... >>> على هالطاري .. صدق العنز تاكل الجرايد ؟؟
وعلى طاري الجرايد ... طلع إعلان بجريدة الرياض قبل كم يوم فيه إفتتاح عيادة في حي المروج وكتجربه ناجحة لعيادات طب الأسرة والمجتمع بحي الوزارات ... ( والنجاح ) لجميع العاملين في حي الوزارات .. وانا واحد منهم ..
لكن كالعادة .. الصورة ماتكفي كل الموظفين بس .. كان مديرنا الدكتور ( كاشخ ) .. شقيت الجريدة وصورتها 100 صورة .. حطيت بمكتبي ثلاث ... وبالمكتب اللى بالدور الأول ثلاث .. والثاني اربع نسخ .. وبكل سيب حطيت نسخة ( صورة الإعلان وفيها صورة مديرنا )
وبعد مالصقت .. وزبطت ( المسائل ) انتظرت المدير يمر .. يسير علينا ويشوف صوره معلقه في كل مكان .. ويسأل من حط هالصور .. واقوله أنا طال عمرك ( نزبط المسائل وننول الرضى ) >> على قولة اللمبي 
سبحان الله وافقت كل هالأسبوعين ماجا المدير .. وأول ( mission ) = ( مهمه ) يطلع فيها عن الرياض من يوم مااستلم الإدارة كانت بعد مالصقت الجريدة .. >> دوكم الحظ .. قالولي انه بالمدينه .. ( حمقت وشققت كل الملصقات )
الله من زين الحظ ........ لكن لو اغيب او أتاخر سبحان الله القاه بوجهي ...
عزيزي القاريء .. عزيزتي القارئه .. هل تؤمن(ي ) بالحظ ... وبقشارة الحظ .. والقراده ؟؟
====
اشتريت ستالايت .. على ال dsl ويفك الشفرة .. مافيه قناة مشفرة إلا ويفتحها.. art >> شوتايم >> والجزيرة الرياضيه >> والكثير .. الكثير .. انا شريته بعد فتوى الشيخ ( صالح بن كامل ) وسالفة الزنوووب
قلت هالرجل الصالح مايبي ذنوب يمكن على راسه .. خلني اشتري هالجهاز واستمتع بالدوري السعودي والأوروبي من غير مايضيق صدره ابو محيي .. 
فك الشفرة لمدة سنة .. ومضمونه .. بعد أقل من سنه راحت الجزيرة !! وبهالوقت !! وين اشوف المباراة ؟؟ خصوصا مباراة تركيا >> الخوال
رحت للمحل ولقيت نفس الشخص اللى باعني اياه وظمن لي السنة .. وقلت له القناة مختفيه .. حسيت انه قلب ؟؟ وجحدني ..؟؟ وبدا يماطل .. مره يقول جب الفاتورة ؟؟ ومره يقول ماعندي احد يزين لك شغلك الحين ؟؟ ومره يقول تعال بكره وعلى الفرغه ؟!!!
ودي اصطرة بس استحيت من ولدي .. طلال كان معي 
المهم دار بيننا كلام .. وخذه هاته .. ياعدل بدل .. الرجال جحد .. وحسيت انه بداء يستهبل ؟؟ وكنه يقول ماني مزين لك شي .. وحسيت انه يقول ( طس ) بالمغربي .. وبنيته بعد 
تنرفزت .. بعد مااستفزني .. وكنت معزوم .. وكاشخ .. ارتفع صوتي .. ارتفع صوته .. وصلت .. في هالوقت كان فيه واحد يبي يشتري منه نفس الجهاز يوم شاف كلامه معي .. قاله والله مااشتري منك وهذا اسلوبك .. وانت تمدحلي الجهاز .. بكرا يخرب مثل ماخرب جهاز الرجال وتجحدني .. وتلاقطوا .. وانا السبب >> إبليس
تحملت وقاحة هالمغربي الجنسيه .!! المتسعود والمستقوى ببعض زباينه يمكن .. او بكفيله كما هي عادة العمال !
المهم غصبته يسوي جهازي او يغيره او يعطيني دراهمي .. شلون غصبته عاد سالفه طويلة
ركبت السيارة ومعي طلال .. وكان ضغطي مرتفع .. وقلت ماينزل ضغطي إلا سوالف ابو الطل .. طبعا طلال صاح بعد ماشافني اتهاوش مع العامل ؟!! وانا للأسف غلطت ..
أول ماركبت .. قلت وين تبي بابا ... مارد .. ناظرته وهو يهوجس .. وقالي : ليش تهاوشيني الرجال بابا ؟؟ الترجمة ( ليش تهاوش الرجال يبه )
عاد كل الطريق وانا اقنعه اني ماهاوشته إلا لانه قليل أدب .. وانا اكرة الأشرار .. وهذا شرير وانا احب الخير ( سوبر مان ) واقنعه .. بس ماش ..
وصلنا للبيت بعد العزيمه .. وفضحني عند أمة .. بس اللى قهرني في الموضوع انه يقول .. ماما الرجال هاوش بابا وطقة بالريموت قلبها .. قلت ولد ؟؟ تأكد من اللى هاوش الثاني .. لاتخرب سمعتي انا مفهم امك اني قوي .. وشجاع .. واخرتها ريموت وهوشه ؟؟
الولد يلقط كل كلمة من ابوه وامه .. ومرات من خوالة ..
وعلى طاري الخوال .. وحنا نمشي يقول .. خالوا خالد يقول سيارة بابا ( ويع ) قلت سيارة بابا حلوه .. قالي لا ويع ( ريحة )
ومرة سمعت كلمة منه ضيقت صدري .. صدق اني من داخل اضحك بس ماودي يشوفني .. قال : ..انعن ابوك ( يعني العن ابوك ).!! ناظرته وقلت عيب ؟؟ وش هالكلام ؟؟ قالي لالا .. طلال انعن ابوه ؟؟ قلت بعد ؟؟ ماقصرت
هذه بعض الكلمات اللى اسمعها شي انا اللى اقوله قدامه .. وأشياء من هنا .. وهناااك >> ( خواله ) 
الصغير مهما قال يبقى صغير ... بس لازم يتعلم الأدب .. ويعرف وش الكلمة اللى ماتنقال .. والكلمة الى نمرئله اياها
ولابد يفهم الطفل الفرق بين المزح وخفة الدم .. وبين الوقاحة .. والتمادي .. لابد الوقوف بحده مع مثل هالأمور
==========
قبل اسبوع كنت في العمل .. ومع طبيب نتكلم .. وإلا اسمع هوشه !! طرنا من باب الشفايه .. واللقافه نشوف وش الموضوع !!
اتجهت مع الصوت وإلا السالفة بأحد المكاتب اللى تخصنا !! ودخلت وإلا اثنين يتلاقطون !! وهوشه ( عنيفة ) يعني كانت فيها دباسه طايرة .. عقال مرمي .. واحد يقول للثاني وهو ماسك ورقة !! ماتستحي يا .... تبيني ادوس خشتك يابن ... الخ الخ .. وكلام كبير ..
عرفت ان الموظف مرقم زوجته !!! والغبي قدامه .. ماكان يدري انها زوجته !!
المؤسف في الموضوع ان هذا الموظف أكبر مني .. شايب وعنده عيال .. نزلت المراجع لمكتبي وكتب شكواه وهدينا الأوضاع ووعدته بحل الأمور ومعاقبة المخطيء ..
طلعت وكلمت الموظف .. مادافع .. ماناظرني .. مارد علي .. إحترامي له كل هالمده راح بعد هالسالفه .. وعلشان طيش ونزوه .. فقد إحترامه .. وتقديرة .. وسمعته .. حتى مكان عملة غيرناه !!
والله انه يمر جنبي ومايحط عيني بعينه !!
مايحتاج اكتب بعد هالسالفه مايستفاد .. العاقل بيفهمها .. وسمعتك وقدرك أكبر من لحظه يناظرك الغير بإحتقار .. او حتى تحس انه يحتقرك !!
=================
واحد وانا بإحدى مكتب العمل لقيت مراجع يرفع صوته على أحد الموظفين .. وكنت موجود وقتها ! واسمع وساكت .. والموظف يرد عليه بكل إحترام وتقدير .. وبرضه يزيد المراجع سفاهه .. وصراخ .. وأهل المراجع معه ؟؟ يعني بالقصيمي ( يتنيذخ ) = ( يستعرض ) قدام اهله ..
واستمر بالمناقر والسب والهواش .. والموظف متمالك .. ومتحملة .. مشكوووراً
بعد ماراح المراجع قلت للموظف .. يعطيك العافيه .. مالك إلا الأجر .. احتسب ..
رحت لمكتبي .. دخل علي نفس المراجع .. ( إياه ) وقالي وين المشرف .. قلت له سم آمر ؟ قالي بشتكي موظف هناك يرفع صوته وغلط علي ؟؟ ( طبعا هو ماشافني وانا واقف هناك وهو يسب الموظف )
قلت له منهو الموظف وحددي شكله .. وخليته يهذر له ساعه .. !!
وسمعني كلام .. لو ماكنت واقف كان مت من الصياح والقهر من تصرفات الموظف الم(زعومه )
كذب ؟؟ تلفيق ..؟؟ حلفان ؟؟ تبلى ؟؟؟ استغفر الله العظيم .. من وين يبي العافيه وهذا اسلوبه وطريقته !
بعد ماخلص ؟؟ قلت توكل على الله ماعندنا لك شي .. واطلع قبل مااطلب لك الأمن !! ترى كنت واقف يومك تتلفظ على الموظف ومعك أهلك .. وهو حشمك قدامهم ومارد عليك .. واخرتها تجي تشتكيه !! صدق ماتستحي ؟!!!
حط رجلة .. وتبسم .. كنه يقول ( ياكافشني )
فيه من هالنمونه واجد .. يغلط .. ويسبقك للشكاوي .. بس منهو الغبي الى يصدق ويسمح انه يسمع من هالأشكال يتحمل .. وذنبه على جنبه
==============
احبتي الطلاب .. قلبي معكم ... اتمنى لكم كل خير .. ونجاح .. وتفوق ..
ادعوا الله ان يوفق الجميع ...
فكروا بعد الإمتحانات وش بتسوون ؟؟
الإجازه طويلة .. خططتوا لها ؟
في الختاام .. الموضوع طويل جدا .. لذلك اعتذر ..
وشكرا للجميع
اخوكم الصغير ابو طلال  | 