17/05/2008, 01:22 AM
|
 | استشاري سابق للرياضه العربيه والعالميه | | تاريخ التسجيل: 04/08/2005 المكان: الظهران
مشاركات: 8,260
| |
|
عندما تغتصب الدراهم ( سيبيريا )
السلام عليكم ورحمة الله وبركاته
( جميع ما حصل 100% والله على ما أقول شهيد )
طبعا ما يخفى على الجميع التلاعبات والنصب والاحتيال اللي يواجهه المواطن من الكثير من الاطراف سواء تجار والضيحة الدائمه هو المواطن فقط لا غير .
ومن ضمن الامور اللي نواجهها كمواطنين هو جشع ونصب الاتصالات في مملكتنا الحبيبه .
عموما مالكم في الطويلة , اللي حصلي بكل اختصار هي سالفة غريبة من شركة من الشركات المقدمه للانترنت في السعودية , وهي شركة لا تخفى على الجميع :
شركة سيبيريا
الموضوع هو اني كنت مشترك في اول نت وبسرعة 512 , والاتصال ولله الحمد والمنّة ماشي زي اللوز ومبسوط فيه
وسرعة التحميل من 60 - 70 كيلو بايت على حسب الزحمه
المهم انتهى الاشتراك وقررت اجدد , رحت لمحل كروت وشفت انواع مختلفة من البطاقات وقلت خلني اجرب شي ثاني غير اول نت , اخترت سيبيريا وياليتني ما اخترتها
رحت للبيت وفعلت الاشترك وكل الامور ماشية تمام ولله الحمد . المهم بعد فترة ( تقريبا اسبوعين او 3 ) لاحظت تغير في الاتصال :
اخش موقع الزعيم وافتح موضوعين وبعدها ما اقدر افتح مواضيع !!
احمل من الانترنت والتحميل يوقف في النص ؟
افتح مقاطع في اليوتيوب ولا يعطيني الا 10 ثواني ولا يكمل !!
اتصفح في الانترنت ولا تتحمل الصفحة كاملة , ومغير احدث الصفحه والا افتح الصور كل وحده بصفحه
وبرضة الاتصال يقطع !!
المسنجر يفصل ويرجع !
المهم انها كانت معاناة . انا قلت خل احل المشكلة بنفسي , كلمت سيبيريا وصار بيني وبين الموظف مكالمة بسيطة :
سكروو : السالفة كذا وكذا
الموظف : اتصالك سليم ولا فيه شي
سكروو : وش المشكلة تتوقع ؟
الموظف : رح وحدث المودم ( هذي النصبة رقم 1 )
سكروو : ه ما قد سمعت ان فيه تحديثات للمودمات !!!
الموظف : الا فيه , انت وش مودمك ؟
سكروو : ه سبيد توش
الموظف : ايه سبيد توش ابو التحديثات , كل فترة ينزلون له تحديثات في الانترنت ( نصبة رقم 2 )
سكروو : ه يالغالي هالمودم عندي من سنتين وماجته خرمة التحديث الا الحين ؟
الموظف : احسن لك تحدث علشان يضبط معك
سكروو : ه يخوي ترا عندنا محل صيانة كمبيوترات في الرياض ودايم اجلس فيه واشتغل ولا قد جاني زبون يطلب تحديث و لا عمري سمعت بتحديث
الموظف : لازم تروح للجماز تحدث عنده لانه اضمن شي
سكروو : طيب لو استخدم اول نت والا اثير والا اي شركة لازم احدث المودم والا علشان شركتكم ؟
الموظف : لا كل الشركات لابد تحدث لها المودم مهوب شركتنا بس ( نصبة رقم 3 )
عاد انا قفلت السماعه وكلمت اخوي بالرياض مهندس كمبيوتر وسألته وقالي ماخبرت ان فيه تحديث يمكن انه يفقش عليك , وكلمت الباكستاني وقال لا يهمك مالها دخل السالفة
رحت لمحل بجده واخذت المودم وقلت لهم السالفة وقالي اللي انتبه ترا سيبيريا شركة نصابة .
الحين بدت مغامراتي بعد المكالمة النوويه :
ا- قلت له خنجرب المودم عندك , وجربته واشتغل بدون اي مشكلة وحمل 11 ميقا بدون ما يوقف
وقالي شيك على تسليك البيت وكلم 904 هذا هو الحل والا مودمك ما فيه الا العافية
ب- جبت لابتوب واحد من العيال عندي بالشقة وحملت عنده ولا صار فيه مشكلة , قلت اجل العلة من جهازي !! ولابد افرمته !! جهزت السيديات والعدة وكل حاجة لكن قلت اصبر شوي .
جـ - جربت اخر تجربة في جهازي وحملت الى 50 ميقا وبعدين وقف !! قلت الظاهر العلة مهيب من جهازي
د - كلمت 904 واخذت موعد وقالولي بعد 48 ساعه بيجيك المهندس
هـ - حملت من الزعيم مقطع 60 ميقا , بس لقيت سرعة التحميل 28 كيلو بايبت !!! استغربت ؟؟ قلت خل استسفر منهم لاني خابر سيرفر الزعيم ممتاز .
( طبعا كل هالامور صارت بكذا يوم فكانت معاناة الله يعين الجميع )
المهم انا ما ارتحت , رحت وكلمت سيبريا رد علي الموظف
سكروو : السلام عليكم السالفة كذا وكذا ليه التحميل بطيء ؟
الموظف : ايه يا استاذي انت محمل اكثر من 9 قيقا ( نصبة رقم 4 ) وعندنا في الشركة نظام : اذا انت اشتريت بطاقة 512 وتعديت 9 قيقا بالتحميل نروح ونخليها لك 256
سكروو ( بانفجاع ) : الحين مهوب الدي اس ال التحميل مفتوح فيه ؟ انا طول عمري احمل ما قد واجهتني مشكلة , وش معنى شركتكم على راسها ريشة ؟ ليه ما تقولون لنا ترا فيه حد معين للداون لود !!؟
الموظف : هذا نظام الشركة يا عزيزي
قلت توكل على الله
وقفلت السماعه
وطيارة على اقرب محل وشريت بطاقة اول نت , اول ما شغلت اشترك اول نت حصلت المفاجئة  كل شي رجع سليم 
التصفح حلو
التحميل ممتاز
المسنجر ما يفصل
( اذن النصبة الكبرى هي ان الداون لود مفتوح على حسب ما يروجون له , ولكن الحقيقة انه محدد ومقيّد بدون بنظام خاص وسري وبدون ما يطلعون الزباين عليه !! )
والله انغبنت غبنة  ما يعلمها الا الله سبحانه وتعالى
ما يستفاد من البربره الطويلة :
1- النصب عندنا خذ وخل
2- لو فيه حماية مستهلك كان قدرنا نحاكم مثل هالشركات وناخذ منها تعويضات ونخليها تتادب
3- نصبة وحده من موظف خلتني اتبهذل بهذلة ما يعلمها الا الله سبحانه وتعالى وحول 4 ايام وانا اكلم العالم واسألهم
4- خلك على قردك لا يجيك اللي اقرد منه 
5- الشركة تنصب على العالم ولا حولك احد
6- كل النصبات اللي رقمتها تهون عند نصبة الشركة ( اذا عديت حد معين نضعف اتصالك )
7- والله ما اعرف ولا موظف باول نت ولا بسيبريا علشان ما احد يقول اني اروج اشاعات لمصلحة خاصة
8- ما ادري كيف المسؤولين بالشركة راضين بهالامور وهم يعرفون السرقة حرام وان دعوة اللي رزقه حرام ما يستجيب لها ربنا سبحانه وتعالى ؟
9- في حالة وجود اي ملاحظه على الموضوع , شوفو وقت انشاء الموضوع ولا تشرهون ورده
10- الشكر لاخوي مبارك ( عاشق السيدة العجوز ) على العنوان لاني كنت محتار فيه 
هذا كل اللي حصل واعذروني على الاسلوب السياحي ما تعودت انزل مواضيع معاناة وغير كذا من كثر الفسلسفه بالكورة صار ما يرضي غروري الا كتابة 10 سطور واكثر 
شكرا لكم ورده
 |
