قسماً بالله رحمتك وبنفس الوقت أقرأ موضوعك وأنا ميت من الضحك
واللي يقول من الإخوان طنشه أو زبد له ( فترى النوعيه اللي يتكلم عنها اللغز المحير ) ما ينفع معها شئ إلا الإستسلام
أو إنك تبيع بيتكم وتنقل
______________________
طبعا أنا رحمتك لأني عانيت مثلك وأكثر بعد
<-- إستمع لقصه هذا المواطن فربما تخفف عنك وتقول بنفسك ( إثر خويي حبيب ويعتبر ولا شئ عند خويه )
( القصه هذي طبعا قبل ما تكون الجوالات بيدين العالم )
بالبدايه كنت أمر عيال خالتي وأجلس معهم بالبيت وكان لهم جار يعرفونه من زمان
يجلس معنا يلعب بلوت
تعرفت عليه وضحك ووناسه والوضع تمام
لاحظت على الأخ ( الغثيث ) إنه مسنتر ببيت خالتي 24 ساعه وينام عندهم ويفطر ويتغدى ويتعشى عندهم
صاروا عيال خالتي يجوني و( الأخ ) يجي معهم ( إلى الآن الوضع مطمئن وما فيه مشكله )
الأخ ( الغثيث ) فل أمها وصار يجيني دايركت على البيت إذا ما لقى عيال خالتي
يوم يومين - أسبوع أسبوعين - شهر شهرين ( أنا تضايقت من جد ) !!!
يجيني من العصر وما يطلع إلا إذا قفل مزاجي منه ونمت من القهر
والمشكله كان عندنا دراسه !!
أخونا ( الغثيث ) يسوي حركه وصخه
يجي دايركت بدون ما يتصل
أنا قلت له ( يرحم إمك إذا بغيت تجي إتصل علي يمكن أكون مشغول مع أهلي ) !!
صار يتصل علي العصر وأنا أقول لأهلي قولوا له مشغول
( الغثيث ) بعد صلاه العشاء وهو محضر عند باب بيتنا !!!!!!!!!!!!!!!!
من كثر ما عانيت منه أخوي زبدها بوجهه - والنتيجه ( ما كأنه صار شئ )

_______________________________
منعطف بحياتي غريب وهنا بتحس إن خويك ولا شئ عند خويي
بعدها تطورت المسأله :
بيوم من الأيام وأنا مودي أهلي عند خوالي إلا وأشوف خوينا ( الغثيث ) محضر ببيت خوالي
( هيييييييييييييه يرحم أمك وش تبي إنت بالبيت ما سلمت منك جاي ببيت خوالي )
الحبيب فل أمها ببيت خوالي
وكان بالبدايه يجي مع عيال خالتي ، وزودها بعدين وصار يجي إذا طلعنا مع خوالي لإستراحه مستأجرينها
الحبيب صار يجيي بسيارته من نفسه
أمي من كثر ما تكرهه قالت لي ( شكلنا بنضيفه لبطاقه العائله )
من كثر ما جاء وتعرف على خوالي صار الأخ ( الغثيث ) ضمن العائله الكريمه خلاص إستسلمنا - وكل هذا برعايه عيال خالتي السبايك .
________________________
منعطف آخر بحياتي ويمكن يكون أحلى منعطف
مره كان راكب معي وقلت بروح لشقه أخوياي بسير عليهم - دخلنا وسلمنا
وطبعا هو نظامه ( يفل السبحه ) من أولها مع أيه شخص ما يعرفه
ضحكوا معه أخوياي
بعدها صار إذا ما لقاني بالبيت راح بدون سابق إنذار لشقه أخوياي
تضايقت بالبدايه بس بالنهايه إرتحت ولقيت له حل
________________________________
وبعد القصه الحلوه هذي مو خويك ولا شئ عند خوينا
على فكره ترا اللي قلته نقطه ببحر من اللي كان يسويه من غير بثارته والقلق اللي يسويه والمشاكل اللي يسويها
بإختصار - يوجد بالقصه الحل لمشكلتك

الحل الوحيد طال عمرك
( إنك تعرفه على مجموعه ) وخلهم يبلشون فيه وإنت أطلع منها