رحـــــلـــــتــــــي إلـــــى مـــــالـــــيـــــزيـــــا(( الجزء الثاني )) * تم إكمال القصة لعيون ( كلي هلالي ) و ( المتعة 9 الجابرية ) ورحـــــنــــا لـــجــــيــنـــتـــيـــنـــج ,, طبعاً كالعادة رحنا مع التفخ باتريك , والله ياهو منسم هالدب , مسوي يتكلم عربي يسمي القرد ( قرر ) , بس والله أنه حبيب ووصخ , حبيب لأنه شرا لأخواني الصغار حلويات , ويوم وصلنا رفع السعر . المهم حنا كنا مقررين إننا مانقعد في جينتينج إلا يومين وكثيرة بعد لأنها مافيها إلا سوق وملاهي وحدة بس سوقها عن أسواق الرياض كلها <<< قهرت بنات الرياض طبعا ً المدينه هذي فوق جبل , المهم وحنا في الطريق مازالت رحلة الربيع مستمرة معنا والله طبيعه خيال , راح علينا الوقت بسرعه . ولما وصلنا وأشوف هاك العج الغريب , فكرت فكره من أفكاري الجهنميه كالعادة , وقلت بحكم ذكائي الخارق خلني أسأل أبوي سؤال أخليه ينلخم من قوة السؤال , والله وأنا اللي أذب خشتي على الوالد ومتحمس , الحين يبه وشلون جاهم عج ولاعندهم تراب ؟؟ << لا بروفيسور طبعاً ألتفت علي الوالد وعطاني نظرة أنا قلت أكيد أني أحرجته قدام أهلي موب عارف يجاوب , مادريت إلا وهو يقول لي الشرهه موب عليك الشرهه على أبوك اللي ..... , هذا سحاب يالدرج , طبعاً لحظتها أنا سويت نفسي نايم بيني وبينكم طاح وجهي . مسوي فيلسوف عند أهلي . المهم وصلنا لجينتينج , أول مادخلنا الفندق طبعاً كان زحمة وخلونا ننتظر لأن النزلاء بيطلعون , والله ونتكي أنا والأهل على الأرض , طبعاً فيه ناس غيرنا قاعدين على الأرض من الزحمة . وفي غمرة تفكيري بخططي المستقبليه <<< يرحم أمك لاعاد تفكر وفجأة . طاحت عيني سهواً على هاك المره , لابسه عبايه ومطلعه كشتها وتلعب ورقه مع بنتها , لحظتها حسيت بشي ينغزني من تحتي , صار أبليس , والله الرجال ماقصر حاول فيني أكلم البنت بس أني كرشته قلت له خلها بعدين الحين أهلي معي , << تراني صادق المهم وبعد 10 دقايق ويرجع الخسيس وينغزني ثانيه , طبعاً أنا هنا عصبت عليه وقمت للبنت <<< ياشديد طبعاً ماأقدر أكلمها ومعها أمها , بس وين تروح من أفكاري وخططي الجهنمية << خريج كلية المافيا وأنا مدري طبعاً أنا خططت أني أشبكها بطريقة ذكية جداً جداً جداً , أخاف أقول لكم بس تنظلوني على ذكائي , طبعاً الطريقه هي أني ألعب معهم ورقه << ياسلام على الذكاء ومن خلال شطفتي لهم عرفت أنهم إماراتيين , وعدت اليومين سريعه , مع كثرة العج قصدي السحاب . ورحـــــنــــا لــــبــــيــــنــنــج ,, طبعاً هالجزيره من أروع الجزر على مستوى العالم , هي جزيره محاطة بالماء والطبيعة والأجواء الجميله . وقبل ماتتدخلها يسألك الدب اللي معك كيف تبي تدخلها نشحن السيارة عن طريق الباخرة ولا تروح بالسيارة عن طريق الجسر , طبعاً حنا رحنا بالسيارة , وصلنا للفندق , بصراحه فندق فخم جداً , والله ناسي وش أسمه بس لايفوتكم روحوا له , الفندق فيه مسبح , ويطل على البحر , ياخي بحرهم رهيب , طبعاً وأنت في الشقة تطل على الشاطئ وتحتك على طول المسبح , ومن حسن حظي إن الوالد ماخذ غرفتين كل غرفه معزولة عن الثانيه , وطبعاً في هالحاله لازم أشغل مخي , بس لحظتها كنت جوعان وأنا اذا جعت ضاعت علومي , المهم حاولت أفكر ماقدرت الجوع مسبب لي أزمه , وخلال محاولتي بالتفكير رحت للبلكونه , وأنا في تفكيررر عميييق ناظرت تحتي ( بالغلط ) ولقيت مجموعه من الستتات متسدحات متبطحات متبرجات عند المسبح , لحظتها طار مخي من جد , ونسيت وش كنت ناوي أفكر فيه , المهم في هاللحظة جاني خويي شيطون هذا اسم الدلع أيه لأنه صاحب مواقف معي لازم أدلعه , طبعاً نصحني نصيحه طيبه قال لي رح أسبح , أول ماقال لي حسيت بالحر والطفش قلت يالله نسمع كلام الرجال ماقصر مايبيني أحتر الرجال . طبعاً نزلت وسبحت وقزقزت وفهيت و... وبعد صلاة العصر صارت حادثة مؤسفه , ضيقت صدري والله المهم , اللي صار أن اهلي نزلوا للبوفيه , وطبعاً البوفيه جنب الشاطئ , ولما نزلوا مرت عليهم حرمه ومعها بناتها كلهم لابسين لبس السباحه الكشخه اللي وش أسمه ذاك اللي فيذاك المهم أهلي توقعوها أجنبيه , ولما جتهم قالت لهم ( إنتوا من السعودية هيا تعالوا نتسبح الجو بالمرة حلو ) صارت لللأسف سعودية والله ضيقت صدري لأني ماشفتها , على العموم , وعدت الأيام فيها مغامرات خاااصه غير قابلة للنشر وبعدها ,, رجـــــعــــــنـــــا لــــكــــوالا ,, طبعاً الدب حولنا على خوية أسمه أبو بكر بس مارضي الله عنه , ورجعنا مع أبو بكر لكوالالامبور , وسكنا في فندق سوكاسا , طبعاً يوم رجعنا ماصرنا نطلع واجد بحكم اننا مارينها من قبل , يعني أغلب وقتي في المسبح , وشبكت لي ناس أبشركم بس شباب من جده , يعني لايروح تفكيركم بعيد , المهم في يوم من الأيام , قالت لي الوالدة فيه شارع عليه محلات مؤقته على ماأعتقد يسمونه الشارع الصيني , المهم رحنا للشارع الصيني وطبعاً أنا في هذاك اليوم رايح غصب ورا خشمي يعني معصب , وأخلاقي زفت وبعد ماوصلنا وننزل لأول محل سألته الوالدة عن شنطة قال لها ب160 طبعاً الوالده عارفه نظام هالشارع <<< خالتي مافيه شي في ماليزيا الا وعلمتها عنه المهم وتطلع امي من المحل وتسفهه وفجأة نادانا ثانية قال خلاص خذيها ب80 ونسحب ثانيه وفي الأخير خذناها ب 50 , ومر تقريباً ساعة وأنا لين الحين زعلان , ودخلت أمي في أحد المحلات وأنا أنثبرت برا <<< يقال لك محتج وخلال انثبارتي مرت علي بنيه ملامحها بريطانيه وجميلة جداً جداً جداً , وقعدت تناظر فيني وتبتسم أنا بصراحه شكيت في نفسي , لها الدرجه خاقة معي , المهم راحت مع أمها لمحل بعدين طلعت ثانية ونصتني وقبل ماتوصل لي هجيت ( لماما ) الصراحة ضاعت علومي , رحت لأمي وكلمتها قلت علشان تدري هالمزيونة أن أهلي معي <<< كمخه لاحول ماراحت واقفه برا , أنا تعلقت في عباية الوالدة , بيني وبينكم أكتشفت أني مهايطي على الفاضي . << لأني لحظتها فقدت أعز أصحابي أكيد عرفتوه ( شيطون ) المهم رحنا من السوق وأنا الى هاليوم وأنا متحسف عليها , وطبعاً عدت الأيام وفي يوم من الأيام وأنا طالع من المسبح رايح للمصعد , وتركب معي بنت روسية تشبة لماريا شاربوفا الصراحة والله تشبه لها , لا ومافيه الا انا وياها في المصعد , وطبعاً هي لابسه لبس المسبح توها طالعه بس متسترة بفوطه حاطتها على كتفها , في لحظتها أنا قعدت أناظر في لمبات المصعد وأناظر في الصور ثمن أناظرها نظره خطافيه يعني على بالي ثقل , وفجأة فتح باب المصعد ونزلت ولاحتى سلمت علي , << لايكثر بس وفي أخر يوم لنا وحنا في الطريق للمطار راجعين للرياض , ونناظر على يمننا , دباب دورية يأشر للسواق , طبعاً أول ماأشر السواق بغى يصيح خاف , المهم ويمر بعده دبابين وراهم سيارة , وراحوا يوم سألنا السواق قال هذا موكب أمير يلعن أم التواضع ياشيخ . وبعدها رجعنا الرياض , وبس خلاص يالله قفلوا الموضوع أتمنى تكون رحلتي أعجبتكم والسلام خير ختام ,,
اخر تعديل كان بواسطة » حفيد الذيب في يوم » 05/05/2008 عند الساعة » 12:57 PM |