مؤيد
مؤيد وبقوة .. للحكي هذا كله .. الله يعطيك العافيه ماكنك الا قلت شي بخاطري ودي اقوله .. خصوصا بعد ماتصفحت المنتدى ورأيت من النقد مايغضبني ..
كنت أتصور ولازلت احمل هذا الامل في مخيلتي .. كهلالي متعصب لفريقه وعاشق الازرق .. الجمهور الهلالي راقي بكتاباته وراقي بتحليله للأمور .. الجمهور الهلالي لايلتفت لتفاهات التحكيم والامور السخيفة .. الهلاليون اكبر من هذا كله .. ولكن للأسف .. اللي يدخل المنتدى اليوم يشوف كيف الجمهور عاصب عينه ويتخبط بالكلام الباطل الممزوج بعنصريه وعدم وعي ..
أخوي عاشق النمر والذئب - الله ينصر دينك ياشيخ .. بل بالعكس ماكتبت الا ماعجزت الاقلام المتعصبة كتابته .. ياأخواني صدقوني فريقنا تعبان والعناصر الفعاله ماتتعدى اربعه او خمسه .. ليش ماتنقد وتناقش وتفتح عيونك وتشيل الستار اللي على عيوبك قبل ماتحط عيوبك على ظهر غيرك .. انظروا لفريقكم بنظرة المتحايد وسطر نقدك بأمانه لعلها تفيد أكثر من العنصريه العمياء التي لاتغني ولاتسمن من جوع ..
ياأخواني التحكيم فعلا كان عليه مآخذ .. لكن مو معناته المسخرة اللي صارت فينا .. لجنة الانضباط حرمتنا بقرارتها السقيمة من اللعب في ارضنا .. ولكن هذا مايبرر الهزيمه .. ياعزيزي الهلال كان اكثر فوزه في جده .. بل انها اكثر بكثير عندما يلعب في ارضه .. ( اتكلم عن المباريات الحاسمة طبعا ) .. ياعزيزي جمهور الهلال في كل مكان .. بجدة بالشرقية بمكه بمنفوحة .. منتشر ولله الحمد ..
ترجعون تقولون ظلم توقيف التايب .. نقول اوكيه ظلم .. بس هل يعقل فريق عريق مرصع بالبطولات ومليء بفطاحلة الملاعب .. كيوسف وسامي ونواف و و و و و .. هل يعقل ان يكون امله الوحيد في التايب ؟؟ .. يااخواني فتحوا عيونكم شوفوا كيف غياب التايب يأثر على الفريق بشكل واضح وكبير .. هذا يدل على ضعف شنيع في فريقنا لازم نلتفت اليه ..
ولاتسيرون على خطا النصر .. كما قال اخونا عاشق النمر والذئب .. والله العظيم اني ماقدرت انام من الهزيمه اللي صارت فينا .. ضيقه بصدري مايعلمها الا الله .. لكن الحق يقال .. لعل المسؤولين يعيدون النظر ويصلحون ماهو فاسد .. ان شا الله تصلح امور الفريق الغالي ويفكونا من اللاعبين المقالب وبدون ذكر اسماء فهي معروفة وااخونا عاشق والنمر والذئب اشار اليها ..
وفي الختام .. ياشباب نصيحة ابريء بها نفسي امام الله .. خافوا ربكم ولاتلعنون فلان وتسبون فلان .. ترى كلنا مسلمين برضه وترى كلها كورة .. والله العظيم اللي يشوفنا يقول حشا مسلمين وكفار يتلاعنون .. والله عيب علينا .. واحد يقول " لعنة الله عليهم ظلمونا ومادري وشو " والثاني يسب بكل أريحية ومتجرد من الحيا ومن الحشمة والرزانه في العقل .. انا ملاحظ تغير كبير في المنتدى والجمهور الهلالي اللي اخبره زمان كان اكبر من كذا .. انا فعلا كتاباتي قليله لكني متابع الفريق .. وعضويتي في المنتدى قديمة بالحيل وكان ايامها الجمهور وش حليله ياحبي له .. تكفون يالربع .. خافوا الله في اللي تقولونه .. والله مو ناقصنا ذنوب ..