..رحـــلـــتـــي إلــى مـــالـــيــــزيــــا..( الــجــزء الـــثــانـــي )
بسم الله الرحمن الرحيم السلام عليكم ورحمة الله وبركاته رحــــلــــة مــــالــــيــــزيــــــــا.. في يوم من الأيام وفي الصالة تحديداً  كنا مجتمعين أنا وأهلي وخاشين جو , سواليف وشاهي وفصفص ... الخ <<< تعني كل واحد يفقش على الثاني وفي غمرة السواليف ,, فجأة ويدخل علينا الوالد الله يطول بعمره , ومزبن شي وراه , ومر علينا لا أحم ولاسلام ولا حتى سب على الطاير راح نصى غرفته مسرعاً, والله والرجال يطلع لنا وهو يحاول يكتم ابتسامته , وانا كلنا مفهين غريبه مهيب عادة الوالد أكيد أنه أعرس على أمي <<< ماجاني كعب على خشتي والله ويبدا الوالد بالحتسي وسط ترقب الجميع  ويقول وش رايكم نسافر هالسنة برى المملكة . المهم كلنا عطيناه ظهورنا وكملنا فقش . شوي الا الوالد يروح لغرفتة ويطلع لنا بتذاكر , قال هذي تذاكر للإمارات اووووف خربها طويل العمر , المهم ويعطينا التذاكر مكتوب عليها ( الى ماليزيا ) يؤ يؤ يؤ ماليزيا . لاياولد يمكن أبوك يستهبل أقرا الأسم طيب ( عزيو )الا والله هذا أسمي . وأقرا موعد الرحلة بعد أسبوع ,( لاااا خربها الوالد ) أسبوع ياكثرة  وبعد أسبوع ,, وطــــرنـــــا بــالــــطــــيــــارة,,<<يعني بتطير بدباب المهم وأتكي في الطيارة وخشتي واصلة للدريشه الثانية , ومرت ساعه , ساعتين , ثلاث , لاحول يبه وين ماليزيا حقتك ذي , ياخي اصبر اللي صبرك أسبوع يصبرك 3 ساعات . لاحول 3 ساعات ثانية , ونواصل الرحلة , قلت خلنا نستثمر هالثلاث ساعات بشي مفيد , المهم أدور شي مفيد مالقيت قلت مالك الا انك تتخيل ماليزيا , المهم وأبد بالخيال . ماليزيا تقع في شرق اسيا <<< يلعن أم الخيال وشرق اسيا فيها الفلبين واندونيسيا , لاحول مودينا أبوي نجيب شغاله ولا سياحه , المهم مادريت الا وذاك الكف اللي ماشي مليون يقول تبي ( تشكن ولا لحم << احلى لغة ) , وطلبت لي تشكن , لا لا أستغفر الله الكذب خيبه طلبت دجاج وعلى فكرة فيه فلم غبي جداً جداً جداً , حفظته من كثر ماأشوفه <<<طيب غبي ليش تشوفه ياغبي المهم وبعد خيالي الواسع ضاق صدري وقعت في الوقت اللي باقي ألعن في ماليزيا وأسب شغالتنا وبعد جهد جهيد , وصـــلـــنـــا مــــالـــيـــزيـــا,, أول مانزلنا من الطيارة ودخلنا المطار وأشوف ذاك الشي اللي ماينشاف شفت بنت فاتشه من فوق ومن تحت , ومن زود الفهاوة أهلي ركبوا المصعد وأنا فاق خشتي على هاك الــفخذ اللي يدوخ اللي ماينتدوخ <<<< ايه قروي المهم ويجرني أبوي على خشتي قال هذي أولها , يوم نزلنا من المصعد ونلقا صفت بنقالية في وجيهنا لاحول في كل مكان ذولي , كل واحد يذب وجهه عليك تكسي تكسي , المهم وقال الوالد يالله تعال أنت يالدب , تخيل وش صار أسمه ذا الدب ( باتريك ) ماتجي على شكله ابد , والله ونركب مع أبو بتركه باص صغير كأنه كرشته . وبعد ماطلعنا من حدود المطار وتبدا الفهاوه من جد عاد يمينك طبيعه ولا في الخياااال ويسارك أخوك المفهي الثاني , خرب الطبيعه كلها . وانا ماغير اتلفت يسار يمين ومفهي وفجأة , تمر هاك السيارة , وبحسب طبيعتي طبعاً لازم أشوف وش فيها هالسيارة وألقا ذيك الشغالة اللي رابطة الحزام ومتعلقه في الدركسون , وأنغز أخوي أقول له شف شف بنت << الله يخسك عجوز منهرية  , ومشينا ومشينا ومشينا اليييين خلص الربيع << قايل لك قروي ودخلنا الفندق اسمه ( بارادايس ) أول مادخلنا وتعود الفهاوة من جديد , درزن بنات نص كم من فوق ومن تحت , لا وقاعدين في الإستقبال << ناوي يسنتر تحت  المهم ودخلنا الشقة , وبعد جولة اللقافه المعتاده مني ظهرت بأبرز خصائص الشقة وهي : 1- الثلاجة في الدولاب <<< موزينها عني 2-فيه في الولاب خزنة 3- اذا طليت مع الشباك تفهي مثل فهاوتي  لأنك تطل على منطقه كأنها غابة وأمطار صدقية موب مثل أمطارنا , وبعد ماأنتهيت من جولتي سوينا إجتماع برئاسة سيدي أبوي , وأتفقنا أنه أول يوم مانطلع ننثبر في الشقه . وبعد ماأنتهينا من الإجتماع قال لي أبوي أنزل جبلنا مويه , أنا أنزل <<< أبيها من الله أنا المهم وأنزل مادريت الا أخوي الصغير وراي , وش تبي طس لابارك الله فيك , أبوي قال لي رح معه ( ناوي يخرب الخطة ) , وبعد مانزلت وأروح لهاك البوفيه حقتهم وأول مارحت لها وأنا اللي أفقع , لقيت مشروبات روحية بس يقولون أنها حلال المهم , أبي أطلب مويه ياولد وش أقول , ضاعت علومي , ( إسك يوز مي قيف مي ووتر بليز ) << ياولد المهم ألتفتت علي هاك المزيونه قالت لي سوري , قلت لا لا خلاص ماأبي شي , خفت المهم وأروح لرجل الأمن وقلت له ابي مويه , قال لي رح للبوفيه , لاحول وأرجع لها واعيد نفس الكلام المهم وعطتني مويه أم ريال قصدي رينجت , قلت نو نو اي وونت بيق ووتر , وفي لحظتها دق علي أبليس قلت يالله نحاول نشبكها , امم وش أقول المشكلة النجليزي عندي لك عليه , وفجأة تجرأت وقلت لها ( ماي بروذر سي يو فيري بيوتي فول ) <<< وهقته المسكين , وفي النهاية عطتني الموية وقعدت ترطن علي شكلها تقول تعال لغرفتي ( أيه هين هذا اذا ماقالت خذ مويتك لأمردغك ) ومــــر أول يـــــوم,, وأخيراً بنطلع نشوف الدنيا , وفي أول يوم طلعنا لملاهي ( صن واي لايجون ) بصراحة خييااال , أول مادخلنا وأشوف ذيك الزحليقه اللي واصله للسما ماشاء الله , طوييله , أول ماشفتها لبست سروال السباحه وأنا عند البوابه , المهم يوم دخلنا قال الوالد وش رايكم أول شي ناخذ جوله على الملاهي ,هم راحوا وأنا واقف عند الزحليقه , المهم رجعوا لي أهلي وعطوني لبسي بعد مانشبت لهم , طبعاً نظام الزحليقه تصف طابور ( مغري ) والشاطر يفهم المهم نظامها بعد ماتصف وتقزقز تاخذ لك قارب صغير ولازم يركب معك واحد , أنا أول ماقالوا لي لازم معك واحد قلت كفو فاهمين لي , مادريت إلا واحد من وراي دب ولابس سروال طالع كنه لابس خيشه لاحول وش يبي ذا صار أخوي أبوي الله يهديه أخبره بياخذ جوله أرسل لي أخوي قبل مايروح . المهم ورقينا عشرين مره بس عشان ذاك وذاك وكل ماننزل أنحاش عن أخوي أبي واحد يجي قبله ألقاة قدامي << أيه وصية الوالد طفشت قلت يالله خلونا ناخذ جوله , وخلال الجولة أشوف لي ذاك البحر الصغير , صار مسبح بس أنه زي البحر يعني أوله صغير شاطئ وبعدين يتعمق الى أن يوصل لعمق تقريباً 12 متر , ونظام هالبحر أنك تاخذ لك لوح مثلي , قصدي لوح مثل اللوح اللي أنا أخذتها , واذا وصلت لآخر شي يجيك موج وأنت أركب اللوح يالوح , وهذا وجهي اذا ركبتها , لأني أنا تعلقت فيها وكل ماجت الموجه غطتني وراحت , وأشوف قدامي تلقا الناس في أعلى الموج << يامسكين وبعد كذا رحنا للعبه والله مدري وش أسمها ذيك اللي تركب شي ويفحط بك ويطشم عليك مويه <<<عليك وصف المهم المرحلة هذي ممنوع القراءه للنساء  على العموم أول ماتدخل اللعبه , نفس الشي فيه سرى بس سرى على كيف كيفك ضيق , يوم جا دوري وأشوف وراي , بناااااات , كل وحدة لابسه فوق وش أسمه وتحت ذاك اللي مثل السمبوسه المهم قلت ياولد لاتنسى وصية أبليس , وفكرت فكره من أفكاري الجهنميه وقلت خلهم يروحون قبلك , وألتفت ثانيه وقلت لها ( قو قو ) المهم هي أبتسمت أنا دخت , وقعدت أناظر فيها وأقول في نفسي ( والله أنك ضعيفه ماتدرين وش اللي بيجيك ) , المهم وعدت الأولى وأول ماعدت أنا سحت قلت ياولد والله حرام شفها تناظر في خوياتها , مالك داعي تفرقهم <<< يارحيم , وأنا اللي أفزع معها فزعت رجال وأمرر لها خوياتها , المهم يوم جا المركب والتفتت علي وعطتني ذيك الإبتسامه  . عاد هنا تذكرت بنات الرياض , عبايه واذا صارت داجه شالت الطرحه وهذي طازجه فرصتك ياولد , وأعطيها ذيك الغمزه اللي خلتها تضحك . المهم راحت ومر الوقت , وفي إحدى الألعاب لقيتها في وجهي ومعي أبوي يووه وش تبي ذي الله يستر لاتكلمني , والله وتعطيني إبتسامتها المعهودة , ياربيه وش أسوي أبي أكلمها يوم قربت عندنا عطيتها ذيك النظره كأنها قاتله واحد من أهلي , وقلبي يقرقع ودي أكلمها . بعدها ناظرت أبوي وقلت له يبه ماودك تروح الحمام أنا أخبرك شارب تو ببسي ومويه , المهم طلعنا من المولد بلا حمص بس كانت تجربه ناجحه قلت أنا بعوضها في الأيام القادمه, وعدت باقي الأيام الستة عاديه كلها أسواق والعياذ بالله ورحـــــنــــا لــــبــــيــــنــنــج ,, الباقي في الجزء الثاني والنص أنتظروا على فكره الجزء هذا للشباب فقط فقط فقط
اخر تعديل كان بواسطة » حفيد الذيب في يوم » 28/04/2008 عند الساعة » 09:44 PM |
