نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة - وش اسم امك ( كلمه تثبت ان المجتمع يعيش في عصر الجاهليه )

algohmani · #1 23/04/2008, 10:38 PM

السلام عليكم ورحمة الله وبركاته

تقديم :

ذات مره قال لي صديق كثير الأسئله ماتلاحظ يابو عبدالله انك لما تتكلم عن المجتمع تتكلم عن سلبيات وكأن المجتمع خالي من الإيجابيات ولافيه إلا السلبيات وبس ..
طالعت بخشته والتفت يمين ويسار وقلت تبيني اتمرس ببطنك إنت , لعنبو ابليسك وش الفائده نناقش ايجابيات المجتمع ..

وش اسم إمك ؟

( ابو عبدالله ماتوقعناك ماسخ وقليل حيا الحين جبتنا لموضوعك عشان تقول وش اسم امهاتكم والله انك فاضي وماعندك سالفه )....

لا يالربع معاذ الله انني استخف بعقلوكم ولكن ألا تلاحظون معي أن المجتمع لايزال ينظر للمرأة نظرة اقرب الى النظره الجاهليه ..
ليلة البارح قال لي صديق أن ابي اجبر اختي على ان تترك الدراسة بحجة أنها اخذت الأساسيات ( طبعا اخت صديقي تدرس بأول ثانوي )
بصراحه ماصدقته لأنه دائم يقولي باشياء وبعدين يقول امزح معاك اتصلت با لأهل وسألتهم بنت فلان من جد ابوها خلاها تترك الدراسه ...ايو والله الكلام صحيح ... ياهوه وين احنا العالم بتتقدم ولازال هناك من يفكر بهذا التفكير .

سألت صديقي طيب وش مبررات ابوك .. قال والله هو يقول أن البنت مكانها بالبيت والتعليم للبنت ليس اساسي وكفايه انها تعلمت عشان تقراوتكتب وش تبغى زياده ...

طيب انا عندي سؤال ودي اشخطبه بإذن ابو البنت بس اني لو شخطتبه بإذنه يابقس خطافي يالكمه ياكف ماندري مع هالجاهل وش بيصير ..

الحين هالبنت لو افترضنا ان ابوها مات وتزوجت واحد ميسور الحال ومات من وين بتصرف على أولادها

لاحد يقولي اخوانها ولا أخوان زوجها مابيقصرون .. صدقوني هاليومين ليت الواحد ينفع نفسه والعلاقات داخل الأسرة الواحده ماعاد هي اللي تخبرونها
ويخبرونها أبائنا

سؤال شاطح وطاق اللثمه :

لو ملف قيادة المرأة في يد هالرجال تتوقعون وش بيصير ؟

اتوقع ان ذا وهو جالس بمجلس الشورى يقطع الأوراق ويرميها بالساحه ويقول بصوت عالي بلا سواقه بلاهم ... عربجي ذا مو وزير

على العموم لاحد يفهمني غلط

انا ضد قيادة المرأة للسيارات مع اني سمعت حالات بجنوب المملكة واعجبتني السالفه ههه اي اعجاب بس يقولون ان الوحده معاها سلاح يعني اي غمرز او لمزه او همسه نفسك يروح وتنتقل الى رحمة الله ...

نجي لعنوان الموضوع اللي هو وش اسم امك ؟

في الجوازت وانا ماشي مع واحد من اخوياي يبي يقطع جواز سفر وهو يعبي في الإستماره نسي السطر اللي فيه اسم امه ...
موظف الجوازات شكله فله ومافيه غير انا والموظفين للي جنبه وخويي ... نادى خويي وقله وش اسم امك ؟
خويي تخربط تقل لدغته حيه مع اني اعرف اسم امه بعد ماجا عنده قله اكتب اسم امك هنا ..
شال خويي الاستمارة وماباقي الا يروح الحمام ويكتب اسم امه هنك عشان ماشوف وش كتب يحسبني ماعرف اسمها ....

قدم الإستماره في الوقت اللي جو فيه اثنين وكأنها رحمه من السما لانني كنت ناوي اقوله انت ولد فلانه قدام الموظف

كثير من الناس يشعر بالخجل عند ذكر اسمه ويتخربط تقل حصلت فضيحه ...

ويبقى السؤال لماذا نخجل من من اسماء امهاتنا ولماذا لانفتخر بهن ونقول كلنا بصوت واحد انا ولد فلانه وبدون خجل

للمشاركة في النقاش بهذا الموضوع انا جاهز على غير العاده

أولا : هل تؤيد عدم احقية المرأة في الحصول على وظيفه

ثانيا : ماهي الحلول الممكنه لإقناع اب يحرم ابنته من اكمال الدراسه

ثالثا : هل تجد خجلا في ذكر اسم امك مثلا أمام مجموعه من الشباب أو امام صديق مقرب

رابعا : مساحه حرة للتعليق على اي جزئية بالموضوع

اتمنى اتمنى ان لايكون الموضوع ساذجا وأن ينال على إستحسانكم .... تقبلو تواجدي بينكم
والله من وراء القصد

أخوكم : أبو عبدالله