السلام علاكم

طبعاً كلنا درس في الجغرافيا ان الأرض كروية الشكل وانها تدور حول نفسها............ ومن الكلام العلمي الطويل.
واثبت ذلك علماء الجغرفيا بنظرياتهم.

المهم السالفة وما فيها اني كنت يوم من الأيام في الديرة"ديرتنا" وانتم عارفين فاضي ولاعندي شغل ولالي خلق اطاير مع هالعالم في البران لأني شوي رومانسي"اقعص" المهم رحت يمين ويسار الا واشوف ابوعلي "شايب من شيبان الديرة" قاعد هو والشلة حقته ابوحمد وابو دحيم. قلت ياولد اقعد وشف وش عندهم. جلست عندهم بلا ابو علي يقول:
اييييييه ههاااااااا هي ره ##### او هاييلي ييتيييمناتي

هذا بيت شعر بعد ترجمته طلع يقول:
ريق سارة ذوب شكرن في غضارة ###### اوحليب بكار شقحن مسمناتي


المهم وهم متسدحين والهوا يرفرف بثيابهم ياما يمين ويامايسار
يوم ذا قال ابو دحيم انتم سمعتوا اللي انا شايفه في الرادوا قالوا لا وش فيه قل انهج وش عندك "تعرفون عجلة الشياب"
قال انهم يقولون ان الارض تدور على نفسها وانها مهيب واقفة.

الا ونقز عليه ابو علي وقال :تفؤ وش الخرابيط هذي هذا حتسي مايدخل الراس .قال ابو دحيم"شوي فاهم ومتفتح" عاد الامريكان اثبتووووه وجزموا ولازم تصدق يابو علي.

وقال ابوعلي انا اشهد انك"وخلا اصبعه يمر عند خشته"يعني انك ما هناش. انا ماعلي منهم انا اثبت لك ولهم ان الارض ماتحرك .

قال ابودحيم هات وش عندك. رد ابوعلي وقال : شف الله يسلمك الارض ثابتة ثابتة وانا مقتنع بحتسيي.لان لو كانت الارض تحرك كان ابا القا بيتي اللي هنابعد العصر واصل هناك عند بيت ابوحمد ,ومزرعتي بتتحرك مع الارض وبتاصل الرياض.

المهم وش رايكم في النظرية الجديدة واسمحوا لي انا تعبت ولانيب مكمل.

__________________