يـوم أن كـنـا صـغـاراً .. كـان فـي الـقـلـب أمـل .. كـنـا نـلـهـو لا نـبـالـي .. أيـنـمـا كـان الـزلـل ..!!
.
بسم الله الرحمن الرحيم
السلام عليكم ورحمة الله وبركاته
وبعد :
أحب أصبّح على صديقيني أبوطلال وعشقي تيماوي وأهديهم أنشودة : " يخرب بيتك شو عملتلّك؟ " 
كما أمسّي على حبيبيني الغايبين ليوميسي وجرح يشكي والمشاكس وراغب علامة 
وأحب كمان أختم خفة الدم هذي بأحلى تحية لأحلى شباب .. شباب السعودية 
وعلى طاري شباب السعودية .. أبارك لجماهير نادي روما العريق  انتصاره الساحق
وفوزه السهل على ما يسمى زوراً وبهتاناً بـ النادي الملكي .. ولا يصح إلا الصحيح 
انتهينا من المقدمة .. نخش دحينا على الموضوع 
في البداية .. أرجو من جميع متصفحي العظيم والرائع تحميل هذا المقطع المجنووون بشرط عدم
الاستماع إليه إلا حين أطلق رصاصة الرحمة عليكم 
جد يا جماعة .. حملوا الأنشودة بس لا تسمعونها إلا لما أقول لكم عشان يكون زي المؤثرات الصوتية
الحزينة في المسلسلات 
حمل المقطع من هنا
لا أخفيكم أني عندما أختلي بنفسي في زاوية غرفتي المظلمة والتي لا يكاد يرى فيها سوى بقايا ضوء
شتات شمعتي الملقاة على عاتق طاولتي المشرئبة والمتقوقعة في ثنايا الزاوية الأخرى من الغرفة
أقول لا أخفيكم أني أختلي بنفسي من أجل حل أحجية لا أكاد أفقهها ولو استعنت بملايين الأصدقاء حول العالم
هذه الأحجية أو اللغز يا أصدقائي يتحدث عن ماهية السر الذي يكمن في بحثنا عن الحب والذي لا يجلب
سوى المتاعب؟؟ حين أطرح هذا اللغز المستعصي جوابه على عقلي الباطن يطمر قلبي المتيم ليجيب أن
الحب ليس للمرء الخيار في إيقافه أو الوصول إليه  ليستنفر حينها عقلي الظاهر ويبدي رأيه
في هذه القضية بأن ماعندهم (قلبي وعقلي الباطن) ما عند جدته  لأنهم يهرفون بما لا يعرفون
وأن الأمر ليس بأيديهم فهو قد ربما أنه يكون مليء بالخزعبلات والرمزية
^
^
أحس أنكم كرهتوا فلسفتي بالفصحى خلاص قسم بالله أن أتكلم زين الحين .. بس خلوكم معي تكفون لا تقفلون الصفحة
من المعلوم والمثبت علمياً أن المرأة مخلوقة من ضلع أعوج
وأن كيد النساء عظيم
إذاً وش اللي حادنا أننا نبلش بالحب والهيام والغرام بالنساء؟
هل هو التأثر بقصص الحب اللي نقرأها ونسمعها ؟ وتأثير المسلسلات والأفلام؟
يقولون الحب عذاب .. طيب وش ربي حادك على العذاب يا آدمي؟
إذا كانت ماسكة معك انك لازم تحب .. طيب تزوج وبعدين حب زوجتك وريح بالك ..!!
أنا ما أقول كذا إلا لمصلحتكم .. ما ودي أحد يبلش بالحب ثم يقعد يتبكبك عندي ويبلشني بسوالفه
الماصخة <<< منتب عاقل يا دكتور فل
لأني أدور مصلحتكم .. جبت لكم إثباتات ووثائق تدل على بطلان هذا الحب الزائف للمرأة
خذوا على سبيل المثال لا الحصر هالموقفين عشان تعرفون وش كثر كيد الحريم ..!!
كانت امرأة تسوق أربعة حمير وإذا بشابين سائرين بجانبها..!
فقالا لها:
نهارك سعيد يا أم الحمير
فاجابتهما على الفور:
نهاركم مبارك يا أولادي
شوفوا وشلون هالكيد العظيم ؟ لا وبعد لكم نية تحبونهم
خذوا الموقف الثاني :
كانت معركة حامية تدور بين رجل وزوجته عندما مرّ بغل من تحت النافذة ..!
فصاح الزوج أعتقد أن هذا البغل من أقاربك
فأجابته على الفور :
أجل إنه حماي ..!!
الحمد لله ظهر الحق وزهق الباطل .. شفتوا بأعينكم وشلون الحريم يكيدون لنا ويسبون شيباننا؟
ما أظني خليت لأي أحد الحين أية حجة أو عذر عشان يقعد يهايط عندنا ويقول أنا ما زلت أحبها وأعشقها ومن هالخرابيط 
أوراقكم مو مشكلة خلوها تعشق لكن قلوبكم لا وألف لا
إذا اقتنعتم بما هو أعلاه .. تعالوا معي حتى أعرفكم على الحب الطاهر والعفيف والبريء
إذا ذكرت البراءة فلا أظنه يأتي في بالكم سوى براءة المشاغب وبراءة الأطفال
نعم .. هي براءة الأطفال وحبهم النقي العفيف الذي لا كيد فيه ولا غش ولا كذب
صدق من قال : الحب في الصغر .. كالنقش على القلب
مسكين أنت يا من حرمت هذا الحب .. مسكين أنت يا من حرم متعة الطفولة
ما أنقى تلك الأيام .. ما أجملها .. ما أطهرها ..!! قسم بالله لو ما تمسكوني الحين لا أتهور وأكتب في
أيام الطفولة خاطرة ولا قصيدة
اللي حبيت أوصل له من كلامي الطويل والأنيق .. هو أن الكثير منا عاش لحظات حب صادقة في صغره
يمكن يكون حب من طرف واحد ويمكن من الطرفين .. المهم أن القلب البريء كان خروف من يومنه صغير
لا أخفيكم أني عشت عشرات قصص الحب لما كنت صغير جد والله كنت عربيد حب يومني صغير
كنت كل ما لعبت مع بنت مزيونة أخق معها وأحبها على طول
بس للأمانة وعشان ما تظلموني .. ما كان يطول هالحب .. مدري كم كان يقعد بس أنه يروح أول ما أتعرف على بنت صغيرة جديدة
عشان ما أحرمكم متعة مغامراتي الغرامية الطفولية .. راح أذكر لكم أحد قصص حبي لما كنت في
التاسعة من العمر تقريباً
بالله عليكم جهزوا المناديل عشان تمسحون دموعكم
" لما جات العطلة الصيفية وكان عمري 9 سنوات أو أقل بسنتين .. طسينا هناك للديرة
طبعاً كنا صغار والدعوى خليطية نلعب مع بعض أولاد وبنات وما فيه هيئة ولا شي
المهم .. لفت نظري بهالإجازة بنت جديدة أول مرة أشوفها قسم بالله فيها جمال موب طبيعي 
بالتأكيد خقيت معها على طول لكني وحسب خبرتي السابقة ما بينت لها أني خاق بقووة 
حطيتها في القائمة وكنت أخطط عليها عشان تصير صديقتي الزبدة بعد حركات التميلح من حضرة
جنابي طاحت البنت في الفخ والحمد لله كانت صديقتي في اللعبة .. وكنا أحسن ثنائي في الألعاب
كنت ألاحظ أنها مرتاحة لي وتثق فيني كثير وتسأل عني إذا ما جيت ألعب
بس والله مدري هل هو حب من طرفها .. ولا المصيبة أنها تعتبرني مثل أخوها؟
المهم أخوكم طاح في غرامها وكان دايم يفكر فيها وفي الزواج بها
أتذكر في يوم من الأيام .. طلعنا حول المستوصف عشان نلقط الإبر المستخدمة المرمية حول
المستوصف مثل عادتنا في اللعب عشان ننظفها ثم نعبيها موية ونتحارب فيها
المهم .. أخذت إبرة كبيرة وكنت أبي أكسر شوكة الإبرة .. ومن زود الدلاخة فيني مدري وشلون سويت
لين دخلت الإبرة المستخدمة في يدي أول ما دخلت في يدي صحت ذيك الصيحة اللي ما أنساها
( الحين شغلوا المقطع بسرعة بسرعة قبل ما يتلخبط المشهد )
وعلى طول أبكي وأركض أبي أروح ألحق على أمي عشان تنقذني لا أموت
العيال يركضون وراي وأنا أركض وأصيح بقوووة ومرتاااع
تدرون ليه أبكي ؟؟!!
قسم بالله ما كنت أبكي عشان الموت بس ... كنت يوم أركض أتذكر وشلون الدنيا بتصير من بعدي
والله كنت أقول خلاص يعني ؟ ما راح أتزوج ذيك اللي أحبها؟
والله يا جماعة أغلب شريط الذكريات اللي مر قدام عيني وأنا أحتضر  كان عن حبيبتي يوم
ألعب معها
شوفوا بالله في الوفاء والإخلاص الطفولي الحين أتحدى أحد يحتضر وهو يفكر في حبيبته منكم
مالكم بالطويلة .. أيقنت بالهلاك وصلت البيت وكانت أمي الله يطول بعمرها وخالاتي بالبيت .. وأدخل
عليهم ووجهي غرقان بالدموع وأنا ماسك يدي وما أحركها أخاف السم ينتشر في الجسم
خافوا حسبوا أحد مفقع وجهي ولما علمتهم بالسالفة هدت أعصابهم
كنت أتوقع أنهم بينادون أحد يوديني المستشفى .. إلا وأمي تقول لي تستاهل ليه ما أكلت غداك؟
يلعن أم اللحسة .. أنا الحين بأموت وأنتوا تفكرون بالغداء
كأن أمي حست فيني وطمنتني وقالت : إذا تغديت الحين ما راح يصير لك شي .. كل يا وليدي
أكيد أي واحد مثلي ما راح يكون له نفس ياكل بعد هاللي حصل .. قلت والله مالي نفس
قالت : كل والا ترى بتموت .. طبعاً ما كنت أعترف بشي اسمه أكل .. كنت دايم ألعب وأتغيب
عن الوجبات الرئيسية ودايم الوالدة الله يطول بعمرها تهاوشني تبيني أكبر
الزبدة .. الماما عرفت من أين تؤكل الكتف .. وصرت آكل بسرعة عشان يروح مفعول السم الهاري
والله يا أخوان أني أكلت أكل ما أذكر أني أكلت مثله .. شبعت ثلاث مرات وكل مرة تقول أمي لازم تخلصه
كله عشان تطيب
والحمد لله أبشركم طبت .. ولكني ما تبت من الإبر بس كنت أحرص من الأول عشان ربي ما يحرم حبيبتي مني
وكملت ذيك الإجازة بسكر ونبات في ظل هذا الحب الطفولي الطاهر
اللي نسيت أقوله لكم .. هو أن هالبنت ما أعرف عنها أي شي إلا اسمها الأول .. وكانت تقرب لنا لأن
أهلها كانوا عند أهلي ساكنين
الشيء المحزن واللي يقطع نياط القلب .. هو أني ما شفت هذي البنت أبد بعد ذيك المرة
طبعاً نسيتها لأني قليل خاتمة وتعرفت على غيرها وهذي سنة الحياة الطفولية
لكن قبل حوالي سنة سألت أمي عن هذي البنت اللي ما أعرف منها غير اسمها الأول .. ولكن للأسف
الوالدة ما عرفتها .. والمصيبة لما سألتني ليه تسأل عنها ما عرفت أصرف صح
المهم .. انتهت قصتي بحلوها ومرها .. وبالتأكيد أن لكل عضو منكم قصة حب طفولية أتمنى يتحفنا بها
قبل الختام :
أحب أذكركم أن كل ما ذكر بالموضوع ما عدا القصة خرابيط وما عليكم منه
كتبت هالخرابيط عشان يكبر الموضوع وأقدر أنزل قصة حبي الطفولية في موضوع
أجل تحسبوني شايل همكم وهم حبكم وجع؟ عمركم حبيتوا ولا ما حبيتوا وش علي منكم ما هميتوني
نسيت نقطة هامة :
تعمدت يكون الموضوع بهالشكل مو مرتب عشان تتعبون مثل ما أنا تعبت بالموضوع
يعني من الراس للكراس ولا راجعت ولا كلمة .. إذا فيه غلط ولا شي بلاش تحجير .. سمعت يا سطام؟
لكن عشان عيون الشيبان نسقت الموضوع تنسيق متعوب عليه ورده
تقبلوا تحياتي :
العاشق الطفولي  وردهورده
.  | 