هلا وغلا بهلالي مقلع
ياخي انت وينك عني من زمان
تعال وانا أخوك ابي أحكي لك اللي بقلبي

إقتباس مبروك الثلاث نقاط ياهلاليين

والله وانا اخوك مادريت عن هالنقاط الا بعد نهاية المباراة بربع ساعه
يوم جاء التعادل .. ركبت سيارتي وطلعت بهالشوارع مثل الخبل وأدعي
أن الحكم يصفر والنتيجه مازالت تعادل
لا تطيرون عيونكم والله اني صادق .. ماصدقت ان الجمعان تجي منه
وحده من خمسين طعش .. لا تلوموني ماابي الصحافه الخليجيه تقول :
مهزوم من صاعد للدوري وجاي يبي ينافس .. ودي يقولون
تعادل ونقول بالصف الثاني .. الصف الأول داسينهم للخليجيه

إقتباس وأحسن الله عزاكم في الروح الهلاليه

وعزاك وانا اخوك .. لنا سنتين نصيح نقول ياعالم إكرام الميت دفنه
هلالكم ماغير هالفنايل الزرق .. مره على المسعري ومره على ليوناردو واشكاله
عقب ماكان يفتخر ولد النعيمه والحبشي وسعد مبارك وهذال والكوكبه
الذهبيه إنهم لبسوا هالفانيلات .. بس يقولون باقي عندنا أمل

إقتباس لكن قليل من الحظ وكثير من التمثيل (البلنتي) ساهم في الحصول على الثلاث نقاط !!

هاذي ماشفتها وانا اخوك مثل ماقلت لك فارقتهم عقب التعادل

إقتباس بلاتشي برئ براءة الذئب (موب سامي) من دم يوسف !!

بس تتوقع انه برئ من حجب يوسف ؟ وحسين العلي ؟ ان كان مهوب برئ
فهذه مصيبه .. وان كان برئ فالمصيبة أعظم ..

إقتباس تعال ياصالح وجب معك الجيل الذهبي وتعالوا شوفوا هلال سامي الجابر

لا تكفى خلهم على ذكرياتهم الجميله .. تبي تغثهم معنا .. بهلال المسعري؟
خلهم خذوا حقهم النشاما وراحوا .. الله يذكرهم بالخير

إقتباس الشريده

لااااا .. ويالله يالله قعد السنه ذي .. كانوا يبي يزفونه
بس ربك ستر .. وقعد عشان يثبت لهم انه مجموعة إخلاص

إقتباس عبدالله سليمان !!! وش رايك ترجع للأهلي ؟؟

وتنادي أحمد خليل معك ؟
ياخي ماتلاحظون شئ ؟؟
اللاعبين اللي يجون للهلال من الشرقيه .. كأنهم ولدوا في الهلال
ونشأوا في الهلال .. ياخي ورى ماينقلون النادي للشرقيه بدال العريجاء ؟

إقتباس الدوخي

ياخي هذا اكبر لغز يواجهني بالهلال هو واللي
بيجي بعد شوي .. عندما تتوقع منهم الإبداع والتميز
وهم قادرون على ذلك .. تصيبهم أم الركب !!
ودي أعرف وش سالفتهم .. مافيه أحد يقول لي ؟

إقتباس أحمد الحربي

ماقصر .. ومكسب .. مكسب .. مكسب
بس يبي له ثقه شوي .. وهاذي اول مشاركه
وننتظر منه المزيد من التوهج

إقتباس الجمعان

رغم ان ابو حميد فيه أشياء ماتعجبني بس
فيه شئ ودي انه في كل لاعبي الهلال
وهو انه مايوقف ينتظر الكوره .. ولا يقف والكوره مع الخصم
ولا يستلم الكوره على الواقف ويمد رجله ان جات جات ..
وان ماجات قلعتها ..
( حمش ) الولد يعجبني ..

إقتباس حسين العلي

هذا اللي تأكدوا من المسئول عن دمه ؟؟
بلاتشي !! إدارة الكرة !! إدارة النادي !!
ياعالم والله لاعب وده يسوي شئ
يكفي انه لاعب يتحدا نفسه والجمهور والمدرب

إقتباس نواف التمياط

ابو بندر انت الثمرة التي ننتظرها بفارغ الصبر
واعتبرنا اليوم بملعب الأمير سلمان بالنادي
وهالمشاركه لفه على الملعب ..

إقتباس سامي الجابر !!! انت يبي لك موضوع بلحالك والا تدري ؟؟ وشو له نخسر صفحه جديده علشانك تعال نكتب لك مع باقي اللاعبين وش زودك عنهم ؟؟

ابو عبدالله كتبت عنه وكتب عنه غير من الجمهور الهلالي
ولن نوفيه حقه .. لكن اليوم له عندي نص سطرين ..
( سامي .. لا ننكر أنك أعطيت الهلال وجمهور الهلال .. ولكن ..ليس عيبا ان لم تعد قادرا على العطاء أن تقول وداعاً .. وسنقف إحتراما لسامي وتاريخ سامي وعطاء سامي )

وهاذي من عندي ..
# بلاتشي لا تقتل يوسف .. فمن يرى ملامح وجهه على الإحتياط يقول أن هذا يحترق على أن يقدم شئ للزعيم وجمهور الزعيم .. فلا تمنع عطاء كريمٍ تعود على السخاء ..

# منصور الأحمد .. إدارة الكرة ليست حضور وإنصراف .. إدارة الكرة وتدريب الكرة وجهان لعملةٍ واحده .. فحاول أن تطور نفسك .. ليكون لك دورك المؤثر حتى في معنويات اللاعبين .. وفي أبسط تصرفاتهم على أرض الملعب .. فقط حاول ذلك ..

تحياتي أخوي هلالي مقلع
واعتذر عن الإطاله