الهلال والقادسيه ... بعد المباراه !!!
السلام عليكم ورحمة الله وبركاته
مبروك الثلاث نقاط ياهلاليين
وأحسن الله عزاكم في الروح الهلاليه 
المباراه كانت شبه منتهيه لصالح القدساويين
لكن قليل من الحظ وكثير من التمثيل (البلنتي) ساهم في الحصول على الثلاث نقاط !!
بلاتشي برئ براءة الذئب (موب سامي) من دم يوسف !!
اللاعبين بعضهم أدى وبعضهم قصّر
ولكن للأسف المقصرين اكثر
واللي يؤسف أكثر واكثر إن القتاليه من لاعبين من خارج الهلال
بدرا والعلي (بعد نزوله) والحربي والشريده 
أنا ساحب السيفون على المباراه وعلى نقاطها
المركز الاول وطار حتى لو نفوز في جميع مباراياتنا
لكن الاهم عندي هو الحضور القوي ( لاحمد الحربي )
والله يستر عليه من بعض الناس
مستوى الهلال يقول .. مافيه بطولة خليج
وأنا أقول ولا دوري ولا كاس آسيا بعد
الهلال صار ملطشه للي يسوى واللي مايسوى !!
للأسف خنقتني العبره يوم شفت فرحة اللاعبين والجمهور بهدف التعادل
بتقولون من الفرحه بقول لكم اي فرحه الله يرحم والديكم
أنا خنقتني العبره يوم صار الهلال يفرح بهدف تعادل وعلى ارضه وضد فريق صاعد من الاولى
وين ايامك يا صالح النعيمه والجيل اللي معك وحولك
تعالو شووفونا نتعادل مع الصاعد من الممتاز (الرائد)
وننهزم من القادسيه ( صاعد ايضاً)
وننهزم من الطائي وفي الرياض بعد (صاحب النقطه الوحيده في الدور الاول العام الماضي )
تعال ياصالح وجب معك الجيل الذهبي
وتعالوا شوفوا هلال سامي الجابر 
تعال ياصالح وشف الهلال يلعب دفاع قدام النصر <<--- هذا اللي ناقص
حكم المباراه
ما قصرت وعطيتنا بلنتي كان كفيل إن الجمهور يطلع من الملعب قبل يطقون لاعبين الهلال
القادسيه
هارد لك
الهلال كان بحاجة الثلاث نقاط بحكم إنه هو الزعيم
((ارحموا عزيز قومٍ ذل))
الهلال .. وش أقول وش أخلي ؟؟
الدعيع
حراسة الهلال تبي رجال والا الباب ياسع جمل !!
وقوفك خلف الحائط في هدف القادسيه نعتبرها مقبوله من لاعب عمره 15 سنه
أما تجي من عملاق آسيا !!!!
الشريده
والله خجلتني وأحرجتني
والله مدري وش اقول يابو مبارك
تقطع داخل الملعب وانت منتقل من القادسيه !!
ولاعبين الهلال الاصليين يتدلعون !!!
أقول والله ماقصرت تأبرني
عبدالله سليمان !!!
وش رايك ترجع للأهلي ؟؟
الدوخي
بعض فلسفاتك في مناطق الهلال الخطره تجعلنا نقول لك العب زين والا جبنا مجرشي
ماقصرت يابو فهد وخصوصا تمثيلية البلنتي
الخثران
وجودك في مركز غير مركزك يخلينا نقول لك والله ما قصرت
سيدو بدرا
من مباراه لأخرى تثبت إنك محور جامد ولا تعرف التدلع
قتاليه واخلاص وتفاني ما لقيناها في لاعبين الهلال
الغامدي
الله يرحم مزنه
تعطيل للعب وتمويت للكوره بدون داعي
بس نوعا ما تعتبر لا لك ولا عليك
الشلهوب
مستواك اليوم ماهنا زود
بس على الاقل ما تدلعت مثل بعض الناس اللي بيجون هالحين
يعطيك العافيه يا محمد
أحمد الحربي
كنا نقول إنك أنتقلت لنادي كبير !!!!
لكن إكتشفت إن الهلال هو اللي كسب لاعب كبير
مستواك الراقي وقتاليتك وحماسك بيفتح لك الطريق للنجوميه وللمنتخب
الجمعان
شوّت على كيفك يابو حميد
بس أهم شئ وحده تجي قول
أضبط رجلك ولا عليك أمر
موب كل مره بيجيك فاولات مثل اليوم
حسين العلي
إحتياط وتنزل ربع ساعه ومع ذلك هداف
وش اقول يابو علي ؟؟
مهضوم ومظلوم .. بس الله يجازي اللي كان السبب
نواف التمياط
الحمد لله على السلامه يابو بندر
مباراة اليوم تعتبر تسخينيه للعوده لمستواك
سامي الجابر !!!
انت يبي لك موضوع بلحالك
والا تدري ؟؟
وشو له نخسر صفحه جديده علشانك
تعال نكتب لك مع باقي اللاعبين وش زودك عنهم ؟؟
مستواك من سيئ الى أسوأ
يوم صفر ويوم بالسالب
برود وسرحان ولامبالاه ...!!!
وتمشى في الملعب كأنك تدور فقع
كنا نقول لك إن كرسي الاحتياط مهوب عيب !!!
الان نقول لك إن الجلوس في المدرجات أيضا مهوب عيب !!
راجع نفسك يابو عبدالله
نحبك علشان الهلال
ونحب الهلال علشان الهلال
تاكد إن الجمهور مستعد يضحي بك اذا حس إن فيه من هو أفضل منك !!
عتاب من أجلك لاني أحبك
تحياتي / هلالي مقلع | 