كيفكم يالحلوين وهم بعد يالشينين ( لايزعلون علينا )

المهم سالفتي أنا ( ماعندي سالفة )
لكن صديزي له سالفة وهيا كما رواها لي :-
انه بعد مضي سنة على تعيينه دارت برأسه اخذ إجازة والسفر .
يوم درت امة وهي تزن عليه علشان يتزوج وبعد إلحاح وافق . وبعدها تحركت الأم بسرعة للبحث عن عروس وبمساعدة من أخواتها وقريباتها .
المهم لقوا العروس وبسرعة ذهبت الأم لرؤيتها وطبعا معها الوفد المرافق ( حشى قمة أوبك )
وبعد عودتهن يقول كنت بانتظارهن ليسمع التقرير عن عروس المستقبل

الأم تقول:- البنت زينة وما عليها وخجول , حتى أنها تصب القهوة وعينها بالأرض ... يا سلام على بنات أول
الخالة قالت :- البنت يعني ... بس كن في عينها حول شوي .
والثانية قالت :- تراها تشبه لي شوي , بس أنا أحلى منها .
يقول ... قلت بخاطري :- ( أنتي شينه ... اجل وشلون هي ... وعععع )

يقول ... راحوا الضيفات وبقيت أنا وأمي
وقالت لي :- شف وأنا أمك, ماعليك من كلامهن ترى البنت سنعة.
قال :- اجل مافيه ألا حل واحد يايمه ... نرسل الخطيبة ( أم السحالي ) تجيب لنا صورتها .

( نبذة مختصرة عن الخطيبة ... العمر تعدا السبعين بكيلومترين ... وأمها تحت المية بشوي ... تشتهر بأنها ما عمرها حطت بخشمها خطبة لأحد ... ألا وزوجته)

وهو يطمر للخطيبة ويقول لها جيبي صورتها وأعطيك كثر ماتعطيك أمي إذا تمت الخطبة .
قالت :- ابشر , اعتبر صورتها جتك .
ورابع يوم ألا والخطيبة جايتنا وهي تضحك ... ويا ليتها ما ضحكت حامت كبدي( مالها ألا ضرس واحد ... وما ادري وشلون تأكل فصفص )
يقول وأنا الى اسألها بخبث :- وشلون حصلتي على صورتها ؟؟؟
قالت :- تحايلت على أمها و طلبت منها أشوف صورهم ...يوم حطت عيني على صورتها ,وأنا أكح كني شرقانه وطمرت المسكينة تجيب لي ماء وأنا أحط الصورة بمخباتي
وأطالع الصورة وهي ألي تعجبني على طول ...( خسئتن يالسحالي وحدة تقول يعني ... والشينة تقول أنا أحلى منها شوي ) هزلت
المهم أني تزوجتها ويوم دخلت عليها طلعت أجمل من الصورة وعايش معها الى الآن بسعادة
ـــــــــــــــــــــــــــــــــــــــــــــــــــــ

انتهى حديث صديقي وقلت له :- والله سالفتك سالفة ... لكن تعال شف السحالي هالأيام إذا جاء لها خطيب...تبقق عيونها فيه وتطالعه من فوق لتحت ... واذكر وحدة تقدم لها خطيب وجاء يشوفها حسب الشرع ... قالت لأبوها بعد ما تمكيجت :- خلوه يدخل علي ... وين بالصالة ...( على فكرة العريس ما عاد قبل عليهم )

وألا التماسيح من تالي ... ماغير يدخلون على بنات الناس ... بس يتفرجون ...واحد منهم يقول دخلت على 12 بنت ( للخطبة ... لا تفهمون غلط ) وما أعجبتني ولا وحدة ... بس دخلت أتفرج .
وهم بنات الناس فرجة ...( صدق أنكم تماسيح )

وألا ها ليطاردون الحريم في كل مكان ... ووراهم نعنبو ذولا مايتعبون
طيب أنت ياللي تطاردهم ... وش تسوي لو واحد شفته يطارد أختك أو زوجتك أو حتى بنتك ... والعياذ بالله ...