يقولون الصراحة راحة ،،
وعشان أٍرتاح بقول اللي بقلبي واللي عنده جواب يعلمني .
نادي الهلال تغير ،، ما عادهو النادي اللي نعرفه ،، فيه غموض وألغاز كثيرة ،،، صرنا ننتظر الفريق وش بيسوس في الملعب بس
أما أكثر من كذا ما في
رئيس النادي بصراحة بديت (وأتكلم عن نفسي) أفقد الثقة فيه
بندر بن محمد ،، كان يتكلم ويقول ويريحنا ،، ويسوي مؤتمرات مباشرة مع الجماهير .
أما سعود بن تركي مع احترامي له وتمنياتي له بالتوفيق هو رئيس غامض ،، غامض جدا ،،،،،
لا هوب اللي يفهمنا وش اللي صاير
لا هوب اللي يبرر اخفاقات الهلال بصريح العبارة ، الا بتصريحات مستهلكة
لا هوب اللي يدافع عن نادينا من هجوم الآخرين
حتى لا ماهوب ضعيف الشخصية ،، يحسس الآخرين انه ضعيف الشخصية والمشكلة الأكبر إنه يضعف شخصية النادي معاه
بندر بن محمد كان يتكلم ويرد ،، وبالتالي أعضاء الفريق يلعبون وهم عارفين إنهم أقوياء إعلاميا ومدعومين بقوة من الجميع
هذا شي
الشي الثاني ،،، وين أعضاء الشرف ما عاد لهم حس الا اربعة فقط يتكلمون في الجرايد وكأنهم قاعدين يدافعون عن النادي ولا كأن فيه رئيس
طيب ليه ما يخلون سعود بن تركي المخطط الصامت أمين عام النادي ويخلون الرئاسة لشخص قائد للزعيم بكل ما تعنيه الكلمة من معنى ، يحمل من صفات القيادة ما يؤهله بقوة للإبحار بسفينة الهلال الى مرفأ الانجازات .
وين الامير الوليد بن طلال وخالد بن الوليد ما عاد نشوفله تصريح على الأقل. وكأنه من نادي ثاني
ليه يحسسونا ان فيه اختلاف وأحزاب بالنادي مثل جيرانا
مين يجاوبني ويريحني ويقولي وش قاعد يصير بالهلال ،، كيف تطبخ القرارت من غير حسيب ولا رقيب
لاحد يقولي انهم جميعا يقررون
مستحيل
لأن الأمير هذلول نفسه يقول ان المدرب فاشل ولا يصلح ،، معناته اكيد ما كان لرئيس أعضاء شرف الهلال اي رأي الا على صفحات الجرايد وحتى لو كان له رأي في المدرب ليه ما ياخذون برأيه ويغيرون المدرب
ليه يحسسونا بغصة في القلب على قاعدة هذا المدرب غصبا عنكم وهذي الادارة غصبا عنكم وما بنتكلم ولا بنوضح ومالكم أي رأي لا جماهير ولا أعضاء شرف وهيك نادي بده هيك ادارة .
اللي أبي أقوله بصريح العبارة
هل يتعامل رجال الهلال مع الهلال بحجم الهلال ؟
هل الهلال بحجمه وقوته يختلف بأسلوب تسيير شؤونه عن الأندية الأخرى باعتبار انه نادي له استثناء خاص .
وش فرق دول العالم الأول عن دول العالم العاشر ؟؟؟؟؟؟؟؟؟
الفرق ان دول العالم الأول تدير أمورها بطريقة تناسب مكانة هذي الدول ودول العالم العاشر تدير أمورها بطريقة تناسب مكانتها
ليه ننتظر من نادي آخر يبدى خطوة المفروض زعيم الأندية قد خطاها وأصبح قدوة الفرق .
ليه ما نبتكر ونطبق اسلوب جديد في التعامل مع كل الأمور الرياضية والادارية والاعلامية والجماهيرية على اعتبار أننا الأفضل وبالتالي يجب أن نبدأ نحن بالريادة ثم تتبعنا الفرق كلها
تعتقدون ان الناس تنتظر من نادي سدوس ولا نادي النصر أو الأهلي انه يسوي شي قبل لا يسويه الهلال
أنا متأكد تمام التأكد ان الفرق الثانية كلها وخصوصا الأقوياء منهم يقولون احنا تمام ونادينا من اروع ما يكون لأننا ما نختلف عن زعيمنا في شي الا انه زعيم بالبطولات بس
والدليل انهم ما يشككون بالهلال الا في بطولاته ولاعبينه، ولو كان الهلال يتميز بشي ثاني كان ما قصروا ، بس ما لقوا شي يميز هذا النادي الا بطولاته واللاعبين .
ليه ما نحسسهم بهذا الاختلاف كما يتحدث الناس في دول العالم العاشر عن التقدم الحاصل في دول العالم الأول
كثير منا في هذا المنتدى يصيح ويقول ليه ما يكون لنا صوت مسموع عند الادارة الهلالية
أنا أقولكم الجواب
لأن لو كانت الادارة الهلالية تتعامل مع الهلال بحجم الهلال كان الحين ما هي جالسة تنتظر نادي ثاني يسويها وبعدين يسونها
أعطيكم مثال
لو نادي آخر سوى شغلة جديدة في النادي ونجحت تعتقدون ان الأندية الأخرى ما بتسويها ؟
طبعا وأولهم الهلال
بس رجال الهلال للأسف ما يقدرون حجم هذا الكيان ولا كانوا خلوه نادي قدوة لكل الأندية
كانوا خلوه نادي متميز مش ببطولاته بس ،،
كانوا خلوا البطولات حصيلة التميز في هذا النادي .
مين يريحني ويقولي ليه المكابرة في عدم احضار يوردانسكو
ليه الاستغناء عن سيرجيو وبشار عبدالله ،،
تذكرون يا شباب أيام بشار عبدالله
قارنوها بأيام الكاتو بن شداد
ليه عندنا كوكبة من اللاعبين لو جبت عضو من أعضاء هذا المنتدى وقلتله يالله درب الهلال مباراة لما تردد في التشكيلة المناسبة
بينما اللي صاير اننا قاعدين نحترق في الملعب أو في بيوتنا أو في غربتنا مثل محاكيكم عشان ندافع عن الهلال اللي يصنعونه البعض بينما هو ليس الهلال الحقيقي اللي نعرفه .
كلنا نعرف من الهلال
كلنا نعرف من هو الزعيم المهاب القوي في الملعب وخارج الملعب
كلنا نعرف هلال عبدالله بن سعد رحمه الله وبندر بن محمد
كلنا نعرف من هو الذئب سامي الجابر
كلنا نعرف الـ35 بطولة
ولكن الذي لا نعرفه
هل يتعامل رجال الهلال مع الهلال بحجم ذلك الهلال الذي نعرفه؟
وحتى نعرف ذلك الجواب
يا قلب لا تحزن
أما أنا فلن أطبل لهلال لا أعرفه
ولن أزمر لفوز لا نستحقه
ولن أفرح لانتصار بدون مستوى
ولن ألتفت لإدارة لا تلتفت لي
نعم ،،، سأفرح اذا فاز الهلال ببطولة ،، لكن فرحتي ستكون بهلال غير مقتنع به ولا راضي بحاله
و سيبقى ذاك الهلال الذي أعرفه في قلبي ودمي ، وحتى يعود
سأظل مثل الشحاذ اللي وجهه مغسول بمرق أنتظر من الادارة الموقرة العزيزة على قلوبنا جميعا أن تهز الدنيا وتجلجل العالم بخبر عن سبب ارتداء الكاتو رقم 9
أما أكثر من كذا
حطوا يدكم على قلوبكم أمام بيروزي والرائد واتركوا الباقي للحظوظ بضربة جزاء من هنا او من هناك وبالبركة والمجازفة كله ماشي .
وانشالله محدش حوش
[عدلت بواسطة سيف السيف التاريخ:18-03-2001 الساعة: 09:08 AM]