طبعاً هذه تكملة الجزء الثاني من المسلسل المكسيكي مزنة وصنيدح ( الجزء الثاني ) ...
ومن فاته الجزء الأول يجده هنا ...

http://216.74.117.135/vb/showthread.php3?threadid=10868

طبعاً دعونا نستكمل القصة الجميلة ... وأبطالها معروفين من الجزء الأول ...

طلال : أيه يالأسطورة قل لنا سالفتك كاملة ...
سفر : ياخوي أزعجتونا بلا قصص بلا هم ... خلونا نسولف واللي يرحم والديكم ...
طلال : سفر بتسمع السالفة وإلا ريحنا أطلع من الغرفة خلنا ننبسط ...!! ( أفاااا والله الطرده )
الأسطورة : أيه صادق ياطلال ... سفر ريحنا من الإزعاج ... ( أفاااا إجتمعوا علي شلة النصب ..!! )
سفر : خلاص الله يعين بأسكت ... لكن شف تنصب علينا لا ...!! ترى ماني ساكت ..!!
الأسطورة : يارجال أنت النصاب اترك عنك ...!! ( ياحليله يسبق للنصب ...!! )
طلال : يالله يالأسطورة وش سالفتك فكك من سفر تراه إزعاج ...!! ( ايه والله من حبك للنصب ياصنيدح ..!! )
الأسطورة : هذي السالفة يالغالين صارت علي قبل 9 شهور تقريباً بعد ما تخرجت من الجامعه وتخبرون كلية هندسه ... قلت خلني أروح لليابان أكمل ماجستير ... لأن أغلب الناس قالوا اليابان بلد متطور وقلت خلني أجرب ... المهم حجزت ورحت للمطار ... طبعاً كانت الرحلة على الخطوط اليابانية ..!! ( والله ما أدري عنك يالاسطورة هو فيه عندنا خطوط يابانيه أو لا ..!! ) ... ورحت للجوازات وختمت جوازي ... طبعاً اللي ماعنده جواز لا يسمع هالكلام ..!!! ( حسبي الله على بليسك ...!! ) ... وركبت الطيارة أنا اول واحد طلع الطيارة لأن الكابتن صاحبي الروح بالروح ...!!!! ( ياراسي كيف صاحبه ...!!! ) ... وسلمت على الكابتن وعلى المضيفين والمضيفات ... وكنت حاجز درجة اولى ..!! ( والله شكلك سياحي ويخب بعد ...!! ) ... المهم أكتملوا الركاب ... وأعلن صاحبي الكابتن عن الاقلاع ... ( مصر أن الكابتن صاحبه ..!! ) ... وأنا كان جالس جنبي شايب ياباني ... عمره أظن 80 سنه ... وحالته سيئة يمشي بمعكاز ...!! وجلس يتكلم معي بالانجليزي ويسولف معي ... ( أيه هين قابلني ..!! ) ... المهم أعلن الكابتن بعد ثلاث ساعات طيران ... أننا بنهبط في فرنسا للتزود بالوقود لمدة ساعة ...!!!

سفر : أقوووووووول وقف وقف ...!! أي فرنسا هذي ..!! فرنسا في أوروبا والرحلة كلها آسيوية ..!!!
الأسطورة : لا فرنسا في آسيا ...!!!
طلال : أيه صادق يالأسطورة ... وش عرفك أنت يا سفر ...!!!
سفر : أقول طيب أنت وياه من بطل أوروبا في كرة القدم ؟؟؟
الأسطورة : سفر هذيك فرنسا ثانية ...!!! ( أهب ما اقوى عينه ..!! )
طلال : أيه هذيك فرنسا اللي عاصمتها باريس اوروبية هذي فرنسا عاصمتها فرنسا في آسيا ...!!! كمل كمل يالأسطورة ...!!!!! ( ياساتر إجتمعوا النصابين ...!!! )
سفر : أمري لله كمل ...

الأسطورة : المهم وقفنا ساعة وأقلعت بعدها الطايرة ...وبصراحة من وقفنا في فرنسا وأنا أشوف هالشايب اللي جنبي عليه حركات غريبة ...!! شكلة مو طبيعي ..!! لكن قلت في نفسي ماعلي منه ... وأنا جالس أقرا مجلة يابانية ..!!! ( كيف يقراه هذا ..!! ) ... والشايب يطمر علي فجأة ويطلع مسدس ... ويمسكني بقوة رهينة ...!!! ( أفاااا قبل شوي تقول يمشي بمعكاز ..!! ) ... وقام يهدد بكل صوته ... أنه أي حركة بيقتلني ...!! ووصل الخبر للكابتن الياباني صاحبي ... وقال للمضيفين لا أحد يتحرك كل شيء إلا صاحبي لا يذبحه ... ( وش هالصحبة ياولد ...!! ) ... ودخل الشايب غرفة القيادة وانا معه بالمسدس وقال للكابتن وصل المعلومات لبرج المراقبة وقلهم لازم يفكون زوجتي من السجن وأترك خطف الطائرة ...!!! ( ياولد قل غير هالكلام ...!! )...المهم نزلنا مطار طوكيو ... والشايب متجود فيني والطائرة في المطار وكلنا فيها ... وجلسنا يومين في المطار على هالحال ...!!!!! وقدرت بخبرتي أقنع الشايب قلت أنت كبير عطني المسدس وأنا أوريك فيهم ... وأنت خلك مع غرفة القيادة تتفاهم معهم ...!!! ( أفففف والله من النصبه ...!! ) ... ووافق الشايب لأنه حس أني صادق ... وأنا أخذت المسدس منه وصرت أتشرط على اللي بالطائرة ما عدا صاحبي الطيار ... وبعد اليوم الثالث وانا خلاص مبسووووط وافقت اليابان على شروطه وإطلاق سراح زوجته ... وأنتهت مشكلة الطائرة ونزلنا المطار ... وصار الشايب يعزني معزه خاصة ... لكن تدرون وش المفاجأة ...!! الشايب هذا طلع هو مدرب بروسلي الخاص واللي علمه الكونغ فو ...!! ( حسبي الله على بليسك وش خليت لصنيدح أجل ...!! ) ... المهم عزمني عنده ... وعلى الغداء جانا بروسلي ...!!! ( لالالالالا بروسلي اللي له سنوات ميت وأصلاً ماهو ياباني ...!!! ) ... وتغدينا مع بعض وضحكنا سوا ... قلت في نفسي ياولد بلا ماجستير بلا هم خلني أتعلم الكونغ فو من بروسلي والشايب ...!!! وبالفعل جلست معهم شهر وانا أتعلم والحمد لله صرت فنان في الكونغ فو ...!! ( والله لو يمسك صنيدخ ليعلمك الكونغ فو على أصوله ...!! ) ... وصرت أتكلم ياباني بعد أسبوع فقط ...!!! لأنه لغة سهله مرررررررة ... !!! ( السهل والله الأرانب اللي ذبحتنا فيها ...!! ... ورجعت بعدها للرياض وقلت أكمل الماجستير هنا ... وإلى اليوم وأنا اكلم الشايب صاحبي وبروسلي صاحبي ... وأي واحد منكم يبي فزعة يقولي ...!!!

سفر : أقوووووووووووول ماتبي العب كونغ فو على راسك ...!! أنت ما تخلي عنك هالنصب ..!!
طلال : ياشيخ تكفى يالأسطورة خذني معك المرة الجاية نفسي أشوف بروسلي من زمان ...!! ( نصاب ومصدق نصاب ..!! )

فجأة دخل علينا الغالي إبراهيم النجيدي ...

إبراهيم : سلالالالام شباب ... مادريتوا وش صار علي البارح ..!!! ( لا الدعوه طالت من جد ...!! )

تدرون نكملها في الجزء الثالث ...
[عدلت بواسطة ســ9ــامــ9ــي التاريخ:18-03-2001 الساعة: 03:39 PM]