الف مبروك لبيروزي الايراني... يستاهلون .. مثل العادة اللاعبين الايرانيين كانوا في منتهى الروح الرياضية والاخلاق العالية حتى في أصعب الظروف وهم متخلفين بهدف،
هذي حقيقة اصبحت واضحة للجميع.. اللاعب الايراني مثال للروح الرياضية.. سبق فاز الهلال عليهم بـ 4 ومع ذلك ماشفنا حركات مالها سنع وتصرفات طفولية.. انهزموا
منّا ومن غيرنا في مباريات أهمّ وفي بطولات أكبر وعلى مستوى منتخبات وبطولات عالمية مع انهم كانوا أجدر بها ولكن ظلوا محافظين على تماسكهم وأدبهم وروحهم العالية .. وكسبوا اللي أهم من النتيجة.. كسبوا احترام الجماهير الرياضية الواعية واحترفوا في فرق عالمية كبيرة ومستواهم يتطور يوم بعد يوم... أمّا الهلاليين فمع الأسف من يوم يحسّون ان المباراة تبي تفلت منهم يبدون التفويض!! تذكرون مباراتهم مع الأهلي المصري الشهيرة ؟ لكن حنّا مشت علينا ذاك اليوم لأنها كانت البداية ، وصدّقنا قصّة التحكيم.. التحكيم اليوم كان متساهل مع الهلال وغلطة الحكم في طرده للشريدة من صالحنا لأنه مطرود مطرود... وكان ممكن ينطرد هو وعبدالله سليمان...
شفنا العاب خشنة وغريبة.. شفنا الكاتو وش سوى وشفنا انبراشات الشريدة وشفنا الكابتن ابو يعقوب وهو معاهم معاهم عليهم عليهم !!! مدري وش فايدة الكابتن اللي كذا؟؟؟ والجمعان يقول منيب طالع !! وسامي كل همّه يثبت ان الكورة ماتنقطع منه الا بفاول !! وان الحكم ظالم الهلال ! شفنا الثنيان وشلون تعامل مع الحكم يوم طرد الكاتو!
هذيك لحالها فيها كرت اصفر أقلّ شي ولاننسى ان معه انذار قبلها.. انا اقول ان الفوز والهزيمة بيد الله مهما سويت ... لكن تقديم صورة مشرفة عن الهلال واحترام الخصم وجماهير الخصم وجماهير الهلال وتقبل الهزيمة واللعب بروح رياضية بيدين الهلاليين.
يجب ان يتعلم لاعبوا الهلال كيف يتقبلون الهزيمة ويجب ان يعرف كل لاعب حجمه.. وان الكرة تخدم من يخدمها وان لكل مجتهد نصيب.. وانه ليس هناك فريق لا يهزم... ويجب ان يعرف كل لاعب هلالي ان أكثر جماهير الهلال ماعاد تمشي عليهم ذا الحركات
البايخة.. أمّا ادارةالهلال فيجب ان تعرف ان كثير من لاعبي الهلال صاروا شيبان وأكثر من نصهم مصلّع... محتاجين لنجوم صغار ويفتّون كورة.. هذا اذا كانوا ناوين يسوون شي في بطولة اندية العالم اللي الله يستر منها. امّا الكاتو لو يستمر مع الهلال ترى يجي منه.. على شرط يدقرون خشمه عن العصبية... أقول قولي هذا وأستغفر الله لي ولكم.