|
شوفو الفرق في التعلم .... وانت تحب الدراسه
السلام عليكم ورحمة الله وبركاته......
الشهر عليكم مبارك وعاده الله علينا وعليكم ......
الاسبوع الأول لي في جامعة الملك سعود كان عجيب
لأول مرة في حياتي اهتم بدراستي مثل كذا
حبيت التعليم فعلاً اروح الجامعة وأنا مبسوط وكني رايح اتمشى
ولا اشيل هم ولا شي بالعكس متحمس للدراسة
كل يوم يزيد حماسي <<<< يزيد هذا اسمي ...... المهم ما علينا
حسيت بالفرق بين انك تتعلم عشان تنجح وبس وبين انك تتعلم عشان فايده اكبر وهي العلم ولله الحمد
السبب بسيط وهو اني حاب التخصص الي أنا أدرسه
طبعاً انا ادرس في كلية اللغات والترجمة قسم لغة فرنسية
مع ان تخصصي في الثانوي طبيعي
انا من صغري وانا احب فرنسا من ايام كاس العالم 98
يمكن الكورة ما لها دخل بس أثرت فيني
وكنت دايماً اقول اني ان شاء الله بتعلم لغة فرنسية
وسبحان الله وبدون ما خطط لذا التخصص سجلت فيه صدفة
الي ابي اقوله من اليوم شي واحد ... في مدارسنا الطالب يتعلم كل شي في وقت واحد
يعني في الثانوي الطالب يدرس رياضيات .. كيمياء .. فيزياء وعربي وجيولوجا و انجليزي الخ الخ
بالله وش لون بيتعلم الطالب يعني مدري هو عنده مخ في راسه والا لاب توب
لو ان الطالب يتخصص وهو في الثانوي مب احسن عشان يبدع في مجاله ويتخرج من الثانوي وهو يدري ويش بيدرس
وين بيروح اي تخصص مب مثلي كل من سألني وش بتسجل فيه أقوله مدري وكل الطلاب مب انا بس
يعني الي بيدرس تخصص يحبه بيدرسه من قلب .. يعني مب يدرس تخصص ما يحبه يدرسه غصب عشان ينجح بس
واعتذر على الإطالة وشكراً
اخر تعديل كان بواسطة » زيزوو الأزرق في يوم » 19/09/2007 عند الساعة » 03:32 PM
السبب: مالكم دخل
| 