( شركة الإنفصالات السعودية )

طبعاً كأي شخص عادي … في آخر الليل أضبط الساعة على 7 صباحاً طبعاً محاضرات من الساعة 8 صباحاً … وبعدها أحط راسي وأسمي بالله ونوووووم … وبالضبط الساعة 7 والمنبة ماشاء الله شغال تماااام … وأناظر في الساعة وأقول يا ولد كملها نومه ربع ساعة بعد ( أظن فيه ناس كثييير مثلي …!! ) … وربع ساعة في ربع ساعة مادريت إلا الساعة 8 طبعاً من شدة الخوف … وماني مصدق طبعاً صحيت بسررررعه وزي الصاروخ … ياولد المحاضرة راحت …!! وش الحل ؟؟؟ مافيه إلا فلان أكلمه علشان يحضرني ( بعد ما هو أنا لحالي …!! أكيد كلكم مثلي …!! ) … وطبعاً أخذت الجوال وأدق عليه …
سفر : السلام عليكم …
صاحبي : وعليكم السلام … هلا سفر …
سفر : هلا فيك … وينك ؟؟
صاحبي : في الجامعه …
سفر : بدت المحاضرة ؟؟
صاحبي : أنا هالحين توني وصلت جنب القاعة …
سفر : طيب حضرني ما يمديني أجيك … أنت خابر الريان وين والجامعه وين …!!
صاحبي : خلاص أبشر … طيب بتجي المحاضرة الثانية ؟؟
سفر : أيه أكيد جاي …
صاحبي : خلاص نتقابل هناك …
سفر : أوكي … يالله مع السلامة …
صاحبي : مع السلامة …
طبعاً أرتحت نفسياً بدأت أشوف وش ناقص … وقلت يالله توكلنا على الله … ومشيت للجامعه … وزحمة وناس وعالم … أكيد عارفين الرياض كل يوم مع الصبح كيف شكلها … ووصلت الجامعه وقلت خلني أفطر باقي على المحاضرة ثلث ساعة … وبعدها رحت للمحاضرة … وأحصل صاحبي هناك … وندردش مع بعض وشوية للدكتور جاي … وبدأ يحضر … طبعاً أخوكم في الغياب دكتور أغيب محاضرة وأحضر محاضرة … المهم وصل الدور على إسمي وهو دكتور مصري …
الدكتور : صفر ( يعني سفر ) …
سفر : حاضر …
الدكتور : أهلين أنت شرفت …!! ( أفااااا يوم زفت من أوله …!! ) …
سفر : ( طبعاً ساكت ما أقدر أقول شيء مرتااااااااااع …!! ) …
الدكتور : أنت فين يا بشمهندس بتكتب على سطر وبتسيب سطر …!! ( يعني تجي يوم وتغيب يوم …!! ) …
سفر : والله عندي ظروف يا دكتور …!! ( والله من النصب …!! ماعندي إلا النوم …!! ) …
الدكتور : كل يوم نفس الموال …!!
سفر : لا إنشاء الله نتحسن …
المهم واصل تحضير وكمل المحاضرة … وأنتهينا وطلعت … قلت يا ولد خلني أكلم فلان علشان آخذ منه محاضرات قديمة … ودق على رقمة … وتجيني هالرسالة …!!
( إن عدم تسديدك للفاتورة أدى إلى فصل الخدمة عنك مؤقتاً …!!)
أفااااااااااا أنا قبل ثلاثة أيام مكلمهم يقول مانزلك فاتورة …!! كيف فصلوه …!! وأنا أقلبها على 902 … ورد علي واحد …
سفر : السلام عليكم …
الموظف : وعليكم السلام …
سفر : يالغالي جوالي انفصل هالحين وما جاني فاتورة …!!
الموظف : كم رقمك …
سفر : ( 055000000 ) ( لا تصدقون …!!! ) …
الموظف : باسم من ؟؟
سفر : باسمي سفر المرزوقي …
الموظف : رقم البطاقة ؟؟؟ ( والله تحقيق …!! ) ..
سفر : 123456789
الموظف : أيه عليك فاتورة صادرة أمس بمبلغ 419 ريال ….!!!!!
سفر : طيب ماوصلني شيء …!!
الموظف : تجيك هالاسبوعين عن طريق البريد …!!
سفر : طيب ليه تفصلونه ؟؟؟
الموظف : ما فصلناه …!!!!!!!!
سفر : إلا مفصول …
الموظف : لحظة أشووووف … أيه صح مفصول …!!
سفر : طيب وش الحل …؟؟
الموظف : سدد …!!
سفر : طيب الفاتورة ؟؟؟؟
الموظف : رح أخذ بدل فاقد …!!؟؟
سفر : طيب عطني سبب للفصل ؟؟؟ أقنعني ؟؟؟
الموظف : والله هذا مفصول وأنا مالي علاقة …؟؟؟ رح راجع الهاتف …!!!؟؟
سفر : طيب مشكور …!! ( قلتها من غير نفس …!! ) …
الموظف : العفو …
طبعاً شيء يقهر والله … قلت الله يعين خلني ألحق أسدد الفاتورة … الساعو هالحين عشر ونص … وزي الطيارة رحت وأخذت بدل فاقد … وسددت … ورجعت للهاتف … قالوا بعد الصلاة أو أرسلها فاكس ونشغلك الجوال … قلت أوكي … لكن والله عندكم ماني رايح … وبعد الصلاة وأنا زي الصاروخ أول واحد … قال خلاص أوكي إشتغل …!! وأجرب الجوال … ونفس الكلام .. ( عدم تسديدك للفاتورة …… الخ … ) … قلت ما أشتغل … قال بيشتغل شوي لا تخاف في النظام نزلناه …!! قلت المعين ربي … ومشيت …
ورجعت للبيت … وساعة على الانترنت والجوال ما عندك أحد … المهم وأنا أحط راسي نووووووومه حتى المغرب … وصحيت وأجرب الجوال … أفااااااااااا … ما شغلوه وش السالفة …؟؟؟
وبسرررعة أدق على 902 …
سفر : السلالالام علييييكم … ( طبعاً معصب أشوي وأدخل عليه من السماعه …!! ) …
الموظف : وعليكم السلام …
سفر : ياخوي أنا سددت جوالي ولا شغلتوه …!!
طبعاً واصل حركاتهم المعروفة كم الرقم والاسم ومن هالكلام …وبعدين …
الموظف : ياخوي أنت ما سددت ….!!!!!
سفر : إلا مسدد … والفاتورة موجودة … وجيتكم اليوم في الهاتف وقلتولي خلاص بنشغله …!!
الموظف : يمكن اللي جيتة ما شغلة …!!!!
سفر : طيب أنا وش ذنبي ؟؟؟؟
الموظف : يا أخي وأنا بعد وش ذنبي …!!
سفر : ياخوي أنتم عند الفصل ما فيه أسرع منكم … لكن الاعادة ما عندك أحد …!!
الموظف : ياخوي قلتلك ماسددت …!!
سفر : وش الحل ؟؟؟
الموظف : أرسل الفاتورة بالفاكس ونشغل جوالك …؟؟؟؟؟
سفر : الله يعين …يالله مع السلامة ؟؟؟
وطبعاً طلعت أدور كبينه فيها فاكس … وبالفعل أرسلت الفاتورة …
ورجعت للبيت وجلست ثلاث ساعات وماعندك أحد …!! الساعة 11 بالليل … ولا فيه أمل يشتغل …!!!؟؟
قلت في نفسي هالحين ماني محتاجة خلني أصبر للصباح ويحلها رب العالمين … وبالفعل صحيت من النووووم الساعة 12 ورايح للجامعه … وأشغل الجوال أبي أجربه …!! والله ما عندك أحد …!!!!!!!!!!! بغيت أتجنن …
واتصل على 902 – زي كل مرة … وقال ما وصلنا فاتورة ……؟؟؟!!!!
قلت في بالي يمكنه صادق لأن الفاكس أحياناً يفوت …!!
وأطلع للكابينة بعد صلاة الظهر … وأرسل الفاكس ثلاث مرات زيادة حرص مني … ورحت للجامعه وأكمل المحاضرات والساعة 5 طلعت … وأدق على الجوال … والله ماعندك أحد …!!!!!!!!!! بيني وبينكم أنا خلاص قفلت الأخلاق … قلت هالهاتف مايبون يجيبونها البر …!!
وأكلم 902 – لكن هالمرة الاجابة كانت غير …!!
يقول وصلت الفاتورة والجهاز عنده أمر تشغيل ولكن الجهاز بطيء مررررررررة …!! وش هالكلام الجديد …!! شركة كبيرة وأجهزتها ما تعرف تتعامل مع الناس …!! وبعد معاناه طويلة وحوالي الساعة 8 شغلوا جوالي … !!!!

ولكن هذا سفر …… كم فيه واحد مثل حالتي ويمكن أسؤا …!!

أكيد الكثير والكثير … بالفعل هالشركة في فصل التلفونات أفضل شركة بالعالم …!! ولكن في باقي الأشياء ماعندك أحد …!!

طبعاً أنا قلت هالكلام من غيرتي وحرصي على الاستمرار في الأفضل … ولولا الفشل لما كان النجاح … وإنشاء الله كلنا أمل في تعديل هذا الوضع …

ولكم تحياتي …

أخوكم / سفر المرزوقي .

[عدلت بواسطة ســ9ــامــ9ــي التاريخ:06-03-2001 الساعة: 03:54 PM]