|
سوالف تالي الليل ..
السلام عليكم ،،،
ضاقت بي الدنيا و تعبت أعاني من العذاب ، كل ما انغلق للهم باب انفتحت للهموم أبواب ، يا الله الواحد العلي التواب ، يا واحد من دعاه ما خاب ، فرج هم مهموم و نفس كرب مكروب و اقض دين مديون و لب دعوة طلاب ، ارحم ضعف ضعيف و اجبر كسر مكسور و رد كل من غاب .
دورت في داخلي أسباب ، ما لقيت إلا نفس خطاءة ما بعد أدركت ( هلعها ) يوم الحساب ، تعبت و ما لقيت في داخلي للضيقة أسباب .
دورت حولي للضيقة أسباب ، ما لقيت إلا أعز الأصحاب ، هذا صديق يرفع الرأس و هذا رفيق مجلسه ما كن له باب ، و من حولي أخوان و أخوات لهم حروف تسعدني و أسمع لهم أصوات تطربني ، بهم المنتدى العام يجمعني ما لي غناة عنهم إلا مثل غناة العين عن الأهداب .
تعبت و ما لقيت من حولي للضيقة أسباب .
تأملت الحاضر و قدام ، و تذكرت في الماضي أيام ، و بانت لي للضيقة ملامح و كني أشوف من بعيد أسباب ، و الله أعلم هي أسباب و لا هي مجرد سراب ؟!
تذكرت في الابتدائي قصة الحمامة و النملة !
كان المعلم يحكي لنا عن الوفاء و أهله ، و كيف إن الوفي لا بد في يوم يحصد نتيجة فعله .
اليوم الصاحب الوفي مثل الذهب في ندرته ، انطوائي أحب ما له وحدته ، الناس تقول عنه معقد !!
ما يجلس مع ربعه و لا مع شلته !
و إن جالسهم و وفى معهم صار الساذج و صار مضحكة شلته !!
من علمه يستأنس بوحدته ؟!
تعلم يكتفي بوحدته يوم ما لقى لوفاه مكان / زمان / صديق يستحق إن الوفاء له يبذله !
لقى الوحدة بوقتنا أفضل حل ، أفضل صديق ، هذا مو حكي ! هذا من واقع تجربة .
تذكرت قصة راعي الغنم مع الذئب و أهل القرية !
كذب مرة و كذب ثنتين و كذب ثلاث ! الرابعة كان صادق لكن ما أحد صدقه !!
هذه نتيجة الكذب يا طلبة ! أذكر قالها لنا المعلم في المدرسة .
اليوم أشوف الناس تصدق معالي هذا و سعادة ذاك و شيخ الغفلة ، صدقوهم يوم إنهم كذبوا مرة !
و أقول أول مرة عشان كذا صدقوهم !!
كذبوا ثاني و ثالث مرة !! و أقول خلاص آخر مرة !! لكن كذبوا رابع و خامس و عاشر مرة !!
و الكل يصدق و الكل يصفق وصدقوهم و غيرهم حتى لو كان صادق ما أكذبه !!
تذكرت يوم ندرس من تواضع لله رفعه ، و أشوف بعض ربع أمس كل من فيهم راز خشمه !!
هذا عشان سيارة و هذا عشان وظيفة و هذا عشان محفظته !!
يا ناس والله والله إن الكبر لله !!
تذكرت من جد وجد و من زرع حصد !!
و أشوف اليوم من جد ما وجد و من زرع يجلس بزرعه لو حصد !!
أشوف اليوم من عنده ( أحد ) واسطة وجد ! و غيره لو زرع تحصيل حاصل لو حصد .
تذكرت من طلب العلا سهر الليالي !!
قلت هذا صح !
أكيد يقصدون تبي مدينة العلا امسك خط في الليل و اسهر و لا تنام !!
أو يقصدون تبي العلا يعني الأعالي اسهر الليالي مع شلة واسطات و فلوس !!
تذكرت العلم برفع بيتاً لا عماد له و الجهل يهدم بيت العز و الشرف !!
أشوف المناصب و الأموال تفتح أبواب بيت راعيه جاهل ما كان بالأمس عنده بيتو ( الواو للقافية ؟؟) !!
تذكرت لا تحسبن المجد تمراً أنت آكله لن تبلغ المجد حتى تلعق الصبرا !!
أشوف الناس مقتنعين أن المجد ( تبناً ) ، أكلوه و لم يبلغوا غير أسواق المجد و لعقوا زحمة الدائري مع الصبرا !!
تذكرت قصة المرأة التي نادت وامعتصماه !
ما ناداني أحد أبا ريمان ! و لا أرسل لي أحد حتى عبر الخاص و لكن من نفسي قررت !!
قررت أروح لمعلمنا و أسأله !!
قالوا راح المعلم اللي درسك لكن اسأل المعلم الجديد ، شفه في الفصل يشرح للطلبة .
سألت المعلم و قلت له ما شفنا الوفي يلقى وفاه مثل النملة !
و الناس يصدقون الكذاب حتى عاشر مرة !! ليه ما كذبوه مثل أهل القرية !!
قال هذاك زمان أول و زمان أول تحول !!
قلت يعني شلتوها من المنهج ؟! يعني الكتاب ما فيه قصة الحمامة و النملة و قصة راعي الغنم و القرية ؟!
قال المعلم لا ما شلناها !! لكن لما نشرحها نقول للطلاب الوضع تغير !!
انتبه حتى لو جاك أحد بيساعدك خل يدك على مخباتك !! ترى الطيبة اليوم سذاجة !!
النملة اليوم إذا شافت صياد بتخليه يصيد الحمامة ! و إذا ساعدت الحمامة و قرصت الصياد بتنساها الحمامة .
راعي الغنم اليوم بيكذبونه من أول مرة !! لأنه راعي غنم !!
لو كان وزير الغنم كان صدقوه لو كذب ألف مرة !!
قلت يعني كيف ؟!
قال سألتني كيف !
يا كيف تنشد عن أحوالي ! لحظة خل أطفي السيجارة بعد هالمزة !!
قلت خوش معلم و خوش مدرسة !!
كنت بامشي لكن قلت خلني أسمع الإجابة .
قال شوف و ركز و افهم لا تصير دجة !!
المسألة اليوم مسألة تبادل مصلحة ، انسى كل اللي راح و خل في بالك مثل واحد دامك تتنفس مع النفس طلعه و رده !
شد لي و اقطع لك شعار اليوم و أي كلام غير هذا انسه !!
قلت طيب والوفاء و الصدق اللي تعلمناه في قصة الحمامة و النملة و راعي الغنم و أهل القرية !
قال " الله ياخذ من علمك هالقصة ! ما قلت لك لا تصير دجة !! "
قلت ما فهمت !!
قال باشرح لك آخر مرة !!
الدعوة غير الدعوة ! الدعوة سيارة و كرسي وزارة و عضو مجلس إدارة !!
هذا عالم ما يخدم فيه بخيل ! لكن بخيلهم غير بخيلنا و خدمتهم غير خدمتنا !!
خلاص فهمت ؟!
باروح لشاشة الأسهم قبل ما يبدأ السوق بسرعة !!
تركت المعلم و مشيت !!
صرخ بصوت عالي تعال !! ليه ما قلت شكراً ؟
هذا أنتم يا طلاب اليوم ! ما تفهمون و لا تعرفون الأدب و الاحترام .
وقفت و لا حتى التفت ! بعدين كملت مشي و قلت أنا من طلاب الأمس ، يوم الحمامة توفي مع النملة !! خاص إلى عميد المجلس : صدى الأمس و ما قبله -----> مع قناعتي التامة بأن قراء الخاص أكثر
أعتذر لك عن هذا الموضوع و لكن عندما قرأت ملاحظتك في موضوع " تعب .. تعب " كان حبر هذه المقالة قد جف !!
و أعدك بأن يكون هذا الموضوع هو الأخير في هذا المجال حتى حلاوة العيد 
اخر تعديل كان بواسطة » abu_riman في يوم » 11/09/2007 عند الساعة » 03:06 PM | 