|
▓█ إحلف بالنبـــــــــي ولا تحلف بالله ▓█
السلام عليكم ورحمه الله وبركاته صباح الخير / مساء الخير على حسب القارئ الكريم  قبل ما أبدأ بموضوعي عن الحلف ، حبيت أنوه على موضوعي السـابق ( العجوز الشمطاء تتحدث ) ، وبعضكم إستغرب ليه ما رديت على الردود. السبب أن الموضوع طلع من يدي لأن أغلبية الردود كانت تتهجم على الكاتبة وما كان قصدي التهجم على الكاتبة ، والأعضاء تركوا الفكرة اللي حبيت أوصلها اللي هي ( إن جميع المحاربين للدين لا يردون على أيه أسئله بغير مجال تخصصهم كالطب مثلا ، أما بالدين فتجدهم يفتون بدون علم ). _________________________________________________ أرجع لموضوعي الأساسي ، وهي قصتي مع حلاق : قبل ثلاث سنوات كنت أعمل بوظيفة تتطلب مني التنقل ما بين الرياض وجدة ، ولما أكون بجدة تنقلب حياتي فوق تحت ( حياة عزوبي ). وكان الداوم شفتات 24 ساعة على 24 ساعه ، والوقت الوحيد اللي الموظف يستغل فيه وقته بالتلاعب والخروج من الدوام وفي رواية ( الفختة ) هو وقت المساء من 3 العصر إلى 11 بالليل ، وطبعا كل الموظفين بوقت العصر يستغلون عدم وجود مدراء الأقسام بالخروج من الدوام للغداء أو التسدح بالسكن إلى أن يجي وقت المغرب ( طبعا أنا سعودي مع السعوديين ولازم أستغل الأوقات هذي ). بعد الإفتتاحية لحياة العزوبية الفاشلة أدخل بالموضوع : بيوم من الأيام ، كنت مداوم فتره المساء ، وطلعت مع زميلي بالدوام علشان نتغدى في مطعم البيك ، وقلت له نزلني قبل المطعم علشان بحلق وبجيك مشي. دخلت سوق بحي الخالدية قريب لمطعم البيك ومالقيت إلا حلاق واحد ، ولما فتحت الباب شفت اللي قدامي شخص كبير ، ضخم الجثة ، عريض المنكبين ( عليه يد لو صفق كافر أسلم ). بعد ماسلمت رد علي الحلاق السلام وعرفت إنه من أحد الجنسيات العربية المعروفة بكثرة الكلام . * نبذة مختصرة عن الجنسية العربية هذي : يعرفون جميع العلوم بالحياة ( جيلوجيا ، علوم الذرة ، فيزياء ، كيمياء ، تاريخ ........ إلخ ) إنت إسأله بس وبتتورط حتى لو كان سباك يجاوبك . أنا وقفت عند الباب لفتره خمسة ثواني متردد أدخل أو لا ( المشكلة أنا مجبور إني أحلق عنده ما معي سيارة والوقت ما يسمح إني أتشرط ). دخلت وقلت بنفسي ما راح أفتح له المجال للكلام ، بعد ما بدأ يحلق ، وهو ساكت وأنا ساكت ، والصمت يعم المحل. قبل ما يخلص أنا ما أدري وش اللي لقفني وخلاني أقطع الوعد اللي أخذته على نفسي ، وسألته عن قيمة إيجار المحل . كأني شغلت راديو ، بس الفرق بين الجنسية هذي والراديو ، إن الراديو تقدر تطفيه . جلس يتكلم عن نفسه ، وعن مهاراته بالحلاقة ، وإن رجال الأعمال اللي بجدة يرسلون له سيارة شخصيا علشان تآخذه  . أنا طبعا كبر رآسي من الكلام اللي أسمعه ( وطبعا كل ما كبر راسي ، زادت قيمة الحلاقة ، يعني بيطلع حسابي على حلاقة الراس 75 ريال ). هو يتكلم وأنا ألوم بنفسي ( ليه سألته ، ليه تكلمت  ) ، لحد ما سمعته يقول ( والنبي ) ، أنا إلتفت عليه وسألته بإستغراب. قلت له : أنا ملاحظ عليكم ما تحلفون إلا بالرسول عليه الصلاه والسلام ، إنت ما تدري إن الحلف بغير الله حرام. رد علي وقال : الله سبحانه وتعالى يقول ( ولا تجعلوا الله عرضه لأيمانكم ) . أنا عصبت وتنرفزت وإشرئبت نفسي ( ما أدري ترا وش معنى إشرئبت نفسي بس تجي كنايةعن العصبية ). قلت له وأنا معصب : والله سبحانه وتعالى يقول ( ولا تشركوا ). هو سكت وأنا سكت وعم الصمت من جديد لحد ما طلعت من المحل . ما يستفاد من القصة: 1- حاول إنك ما تسأل أيه سؤال لإخوانا العرب اللي أقصدهم وخلص شغلك معه بصمت علشان ما تبلش . 2- لا تضغط نفسك وتخلص ألف شغله بوقت واحد علشان ما تتورط . 3- إذا إشرئبت نفسك ( إذكر الله ) .  | 