قال الرسول صلى الله عليه وسلم :- من سلك طريقا يلتمس فيه علما سهل الله له طريقا إلى الجنة وأن الملائكة لتضع أجنحتها لطالب العلم رضا بم يصنع 
مع قرب العام الدراسي وضعت هذا الموضوع اللي أ شاء الله بنستفيد منه ..
لا تحسبوني وضعت هالموضوع عشان أضيق صدوركم 
، لا أنا وضعته عشان تستعدون نفسيا ..;) والدليل أنه موضوع سلس و خفيف عليكم ،،
لكم هالكركتير .. اللي يحكي معاناة طفل ..
* يوجد بالموضوع مقابلات مــع أعضاء
العودة إلى الدراسة .. كلمة يتأفف 
منها الكثير والكثير من الطلاب
بل يعتبرونها مأسأة تتكرر سنويا ..
معلومة دراسية مهمة :-
ذكرت بعض الدراسات أن الإنسان لا يتذكر بعد شهر سوى 13 % 
من المعلومات التي يحصل عليها عن طريق السمع ، في حين أنه يتذكر بعد شهر 70 %
من المعلومات التي حصل عليها عن طريق البصر ، أما المعلومات التي حصل عليها عن طريق الحوار والمناقشة والمشاركة فأنه يتذكر بعد شهر 95 %
منها . شعارك الدراسي :-
قبل البدء في المذاكرة توكل على الله ، وفي حال تعسر الحفظ استعن بالله ، وعند الانتهاء من المذاكرة احمد الله قاعدتك الدراسية :-
الفهم أولا-الحفظ ثانيا- تثبيت المعلومة ثالثا
مشاكل قبل الدراسة ..
1- النوم :- " 
" أول و أكبر مشكلة يواجهه الطالبـ ( ـهـ ) , لا مــو
بس الطالب ( ـهـ) إلا المعلم ( ـهـ ) .
بما أننا في الإجازه ، فالنوم متلخبط 
، مره تقوم العصر ، ومره تقوم الفجر تقول كنك شايب .
أما الحين فالوضع غير ..
لازم يوميـا تقوم الصبح .. ماشاء الله على بعض الأخوان ينوم في اليوم 12 على 15 ساعة يوميا
وهذا خطير على الإنسان 
حتى أنه ظهر النوم الزائد يسبب أمراض خطيرة جدا للأنسان 
. إذا جميع الطلاب يجب عليهم الإستيقاظ للمدرس ولكن أين صلاة الفجر .. !!
يحرص الكثير على القيام للدراسة مهملين الصلاة 
.. !! وما بين الصلاة و الطابور الصباحي إلا نص ساعه ..
لهذه الدرجة توصل بهم الدناءة 
والله أن الكثير من الأشخاص السعوديين ولا من أعضاء المنتدى يقومون للمدرسة ولا يقومون للصلاة ..
ولا بين الصلاة واستيقاظه إلا ربع ساعه 
أتقوا الله يا أخوان ، هالظاهره منتشره كثيرا ، حتى أن أحد المشايخه قام بإجراء أحصائية عن اللذين يصلون في المسجد من طلاب المدارس ، فكانت النتيجة فقط 20 % ..!! والله 20 % فرحتني من كثر ما أشوف من إهمال للصلاة
أخواني لا يخفى عليكم فضل صلاة الفجر في الجماعة ، فقد قال الرسول صلى الله وعليه وسلم ( من صلى الصبح فهو في ذمة الله فلا يطلبنكم الله من ذمته بشيء فيدركه فيكبه في نار جهنم )
وبما أننا في موضوع النوم ففيه معلومة استغربت لما قريتها .. !! لا ما أستغربت إلا انصدمت ..!! لكم هالمعلومة ..
اليابان تشجع طلابها على النوم في المدارس .. !!!
أصدر قرار رسمي يتيح للطلاب على الإغفاء لمدة 15 دقيقة في فصولهم بعد الغداء ..
وبهذه المعلومة بان الاغفاءة القصيرة التي تمنحها اليابان أنما دلت لاهتمام اليابانيين بتحقيق التفوق الذهني. ففي العامين الماضيين ظهرت في اليابان ما اصبحت تعرف باسم «صالونات الاغفاء» في المدن الكبرى. وواحد من هذه الصالونات في منطقة ناميا في طوكيو، ويمكن للعاملين في المكاتب اخذ اغفاءة خلال فترة الغداء مقابل 4.50 دولار.
واشارت دراسات النوم في اليابان الى انه يجب على الاشخاص الذين يغفون عدم زيادة فترة الاغفاء عن 30 دقيقة والا سيستغرقون في النوم ويستيقظون وهم يشعرون بالخمول. وتباع في المحلات الان ما يطلق عليها «وسادات المكاتب» .
2- المستلزمات الدراسيــة :-
هذي مشكلة ما يعاني منه الطالب ( هـ ) ، هذي عاد اللي ما يدانيها أهالي الطلاب والطالبات ، لا يعني تجد بعض الناس يتسابقون لشراء المستلزمات الثمينة بل الثمينة جدا جدا جدا وبأتعب وأنا أقول جدا
يعني ماله أي داعي هالإسراف اللي حاصل على هالملتلزمات ,,
أنا مع هالأشخاص بأن الدفاتر والأقلام كلما كانت جيده كانت نفسك للدراسة أحسن ولكن ماهيب بهذا الغلا ..
لا تنسون يا أخواني أن هناك الكثير من زملائكم الطلبة عصف بهم الفقر ، فلا يجيدون الملابس والدفاتر ، فكونوا خير معيننا لهم وساعدوهم في قضاء حاجياتهم وخاصة حاجياتهم الدراسيـة ..
قد تكون هناك مشاكل أخرى قبل الدراسة
ولكن تبقى المشكلة الكبرى التي هي أثناء الدراسة
!!..زحـمـة الـطـريـق..!!
البنت عندها عادي ماهيب مشكلة ، تحط راسها على المرتبت لين توصل المدرسة :p
أما العيال ، الله يعينهم ما فيه حل إلا أنه يشتري هليكوبتر ويفتك من هالزحمة 
نصائح دراسيـة
1- استعن بالله في كل أمورك 2- عليك بالمذاكرة بعد صلاة الفجر ، فهي وقت النشاط الذهني 3- عليك بالفطور الجيد والمفيد 
4- أملك الثقة بنفسك وقدراتك الذهنية .
5- حاول أن تجتهد في المواد التي تعتبر نفسك ضعيفا بها 
6- رتب وقتك جيدا للدراسة اليومية >> أدري أن أكثركم ما يرتب دروسه إلا قبل ما يروح للمدرسة 7- حاول الحظور بدري 
8- شبك المدرس .. ومن طرق التشبيك إذا شرح سو نفسك فاهم وقل امم ايه كمل الحين ننتقل إلى ..
!! .. هـامور البورصه .. !!
س\ لو لقيت بريق .. ومسحته وطلعلك جني وقالك : شبيك لبيك جنيك بين يديك .. لك أمنية وحده .. تمن ..؟
بقوله انقلع رح سو لي كبده
س\ تذكر اول يوم في الدراسة . ؟
اذكر اول يوم كانو الصغااار كلهم مع ابهااتهم الا انا مع اخوي رااشد كان راشد بخامس
المهم انا كنت سااكت واحس اني مبسوووط بس اني خاايف اني اضيع لاني كنت اشوف
المدرسه كبييره المهم راشد خلاني مع مدرس الرياضه وقال بروح شوي وبجيك ولعااد جاني
الا اخر حصه وكنت اقعد بمكتب المدير انتضره
س\ أسوء ايام دراستك . ؟
مره تهاوشة مع وااحد اياام المتووسطه المهم اني طقيته وهم يفرقونا يعني يفرعونا كان يردد اوريك اوريك :p
وانا مسوي قووي وواقوله اتحداك تسوي شي المهم يووم خلصنا وصلينا الا اشووفه يمشي جمبي قلت يحوول
هذا الي يبيني اسطره مره ثاانيه يوم طلعت مع الباب لين قدامي عشرين وااحد وكلهم يقولوون وينه وينه في الحظه
هذي جاني شعوور غريب ....... باقي القصه مشفره
س\ موقف طريف تذكره .؟
الموااقف كثيره بالمدرسه بس اكثر موقف ضحكة فيه هو في ثالث ثنووي كنت ادرس انا وقريب لي من الكويت
المهم الولد هذا جاي عشان ينوم وياخذ شهاده وكان مره مخربني ترى هو الي مخربني وكان سبحان الله من
شكله تضحك يوم من الايام كان علينا حصة حاسب وكنا نايمين كالعااده وجاء المدرس يقومنا بس المدرس
هذا اوسخ مدرس ووجه يجيب لك المغص مصري متكبر المهم قمنا عايدي بس فهد كان دااايخ مره وكان متلطم
اياام البرد وكان شكله شين ماتسمع الا اح اح فحيحه تقول كنه بعير وكان مره مره عير طوويل مره ماشااءالله عليه
المهم جاء المدرس معصب وقاله قم وقف فهد بكل احتراام قام ووقف قاله اطلع برا وقف عند الباب قال فهد شتقول
انت شكلك تستهبل انا بوقف بالفصل المهم الاستااد فتح الباب ومد يده يقول لفهد اطلع برا فهد بكل دلااخه سكر الباب
على يد المدرس المدرس يده برا ويحااول يفتح الباب وفهد يسكر الباب بقووه وكان المدرس يصيح ويقول يدي يله
انا كنت اضحك ابي اقوله انك مسكر على يد الاستاد بس ماقدر من كثر الضحك في الاخير استوعب فهد وفتح الباب
المهم المدرس معصب قام وسطر فهد انا ابي اقووم والله اني ماقدر من كثر الضحك والفصل كله يضحك ويتفرج
على الفلم الهندي عااد فهد الله لا يوريك قسم بالله طق المدرس طق وفي الاخير المدرس قال ارجع يابني روح اقعد
على كرسيك ومتناام ... خلاص خلصت ترى
س\ تتمن ترجع لل ( الثانوية - المتوسطة - الابتدائية ) ولا تبقى في الجامعه
مافيه كلاام الثاانويه وبالذاات ثالث ثنووي بس اكيد لو خيرووني ببقى بالجاامعه
!! .. اليزابيث هيرلي .. !!
مميزات المعلم أو المعلمة الناجح ( هـ ) ؟
1- أن يكون قدوة صالحة
2-متمكن من المادة العلمية
3-إختيار الطريقة اللي تناسب عقلية التلاميذ في التدريس والإبتعاد عن طرق التدريس التقليدية
4-يكون عطوف ومتعاون و متفهم لإحتياجات التلاميذ
5- التوجيه والأرشاد فالمعلم مربي قبل كل شيء
6-أن يكون عادلا في استخدامه لأساليب الترغيب و الترهيب
7- التطوير المستمر و التقويم الذاتي للمعلم أمر لا بد منه للإرتقاء بمستوى التعليم
(( وكأني قاعده أذاكر ( اجتماعيات تربية أو مناهج) الله لا يعيد هالمواد
..)) س / كيف تعاملين طالبة أساءت الأدب معك ؟
في بداية تعليمي اضطريت أني أكون قاسية مع من تسيء الأدب من طالباتي عشان يعرفوني زين و يتأدبون
.. ومن بعد ما عرفوني صارت نظرة بس مني ما تخلي أحد ينطق ولا يتنفس . وأن تجرأت وحده واساءت الأدب فأن أحب أن أوبخه في الفصل لتكون عظة و عبرة لغيره .. وطريقتي في التوبيخ بعيدة كل البعد عن التجريح و الإهانة لأني وأنا طالبة ما كنت أحب هالأسلوب .. ولذلك أعلمها خطاها و وكيف تداركه المرات الجايه.وبمجرد ما أخلص مخانقه ينتهي الموقف وانساه لأني مو من النوع اللي يحط الطالبه في باله ولاني من النوع اللي يشيل بقلبه و يتقعد للوحده ..
أرجع من بكرا عادي و أن كان الموقف كبير و حاز بنفسي آخذ لي 3 أيام و أنا متجاهله الطالبة بس عشان تحس بخطاها ولا تكرره .
وما أحب تدخل المرشدة أو الإدارة. مشاكلي مع طالبتي احلها بنفسي إلا في الضرورة القصوى والحمد لله ما صادفت لسه هالمشاكل .. س/ هل يحتاج المعلم ( هــ ) إلى صلاحيات أخرى ؟
لا ما يحتاج لأن المعلم مفروووك خشمه و كل الصلاحيات معطاه له .. مراقب 
, مرشد , موجه , مساعد , حتى الحفلات والأنشطه ما ينظمه غير المعلمين بس بقى الأدارة ومن يدري بكرا يعطوننا سجلات المدراء نكملهن بدالهم !!!!!!!
س / مواد تتمنين أضافتها ؟
مادةتختص بالإكتشافات العلمية الحديثة ..
ومادة عن السياحة والأماكن السياحة بالعالم
س / مواد تتمنين حذفها ؟
مادة المكتبه في ثالث ثانوي (( هالمادة ما أدري وش تبي ؟ مال لأمه و أبوه وجده داعي ما غير نقن علينا كرد الله يكرهه
)) لولم تكوني معلمة فماذا تحبين أن تكونين ؟
صحفية س \ تساعدين الطالبات بالدرجات . !!
اييييييييييييييييه بالحيل .. وشلون يبنه بس ؟>> ع قولة أخوي أي اساعد ؟؟ ما يكفي الوزارة و تعاميمه مساعدتهم و منجحه ناس وربي مو كفو ينجحون من أولى إبتدائي !!!
أنا بطبعي اعطي كل ذو حق حقه .. يمكن فيه معلمات إنجليزي يساعدون طالبتهم وعذرهم انه صعب ولا تبغى يقال ان طالباتها مستواهم منخفض !!!!
أن هالكلام ما يمشي عندي يا تتعلم إنجليزي صح ولا ترسب .. وفيما يتعلق بالإنجليزي شديدة أنا معهم .. مثلا في النطق أحب يطلعون مخارج الحروف صح , أبغاهم يتكلمون زي المتحدثين الأصليين .. في البداية واجهت صعوبات لأني ما اتكلم عربي نهائي و استخدم اللهجة الأمريكية ومثلك عارف الأمريكين كلامهم سريع شوي وهم ما يفهمون ..
لكن مع الوقت تعودوا طالباتي علي و صاروا يفهموني
.. ابي منك تصنفين الطالبات .. يعني اللي تكرينها .. واللي ترحمينها .. والي تبينها
أنا أحب الطالبة اللي تذكرني بنفسي , يعني اللي مؤدبة وذوق في تعامله و متحمسه حييل و أنا أشرح , و تحب تناقش و تستفسر وبمجرد ما اسأل عن معنى كلمة وقبل لا اشرحه تكون رافعه يده, وأن سألت عن كلمات سبق و أخذناهن ع طول تعطيك الإجابة وتربط لك بين القواعد و قراءتها تكون ممتازة يعني بإختصارة أحب اللي إكسلنت في الإنجليزي
وأرحم الطالبة , اللي بطبعه انطوائيه وف حالها , ما تتكلم مع زميلاته ولا أحسه معي بالدرس:sad: وبرضو أرحم اللي تحب الإنجليزي بس للأسف ما عنده أي خلفية عنه , وفي كلا الحالتين أحاول أساعد قدر الإمكان .. وأكره الطالبة البجحة وقلية الذوق و الحياء وحتى لو كانت ممتازة ومن الأوائل !! .. جـرح يشكـي .. !!
س\ لو لقيت بريق .. ومسحته وطلعلك جني وقالك : شبيك لبيك جنيك بين يديك .. لك أمنية وحده .. تمن ..؟
أكيد ... ارجع لـ ثاني ثانوي 
احلى ايام العمر س\ تذكر اول يوم في الدراسة . ؟ اتذكره كان الوالد مسافر واللي اخذني للمدرسه عمي خلنا على المدير وكان فيه مدرس [ ابرص ] وقعدت اصيح ورفضت اني اكمل دراسه ورجعت للبيت 
وبعد ما رجع الوالد اشترا لي سيكل عشان ارجع للمدرسه ، ورجعت لها ... و بعد سنتين [ في ثالث ابتدائي ] درسني المدرس الابرص وقعدت اصيح بعد واضطر الوالد انه ينقلني من المدرسه س\ أسوء ايام دراستك . ؟
المرحلة المتوسطه بـ اكملها
س\ موقف طريف تذكره .؟
كنت في ثاني إبتدائي رحت للمدرسه ما فيني شي سليم ، بعد الفسحه حسيت بتعب شديد طلعني المدرس لـ المدير والمدير استدعاء اخوي اللي اكبر مني [ في ثالث إبتدائي ] وقال له روح ود اخوك للبيت والمدرسه كانت بعيده عن البيت ، قعدنا نمشي .. نمشي .. الى ان ضيعنا البيت ، مر من جنبنا دوريه ووقف وركبنا معاه وقعد يلف بنا الحواري الى ان وصلت الساعه 12 الظهر طفش العسكري ورجعنا للمدرسه على امل ان احد يجي ياخذنا , وصلنا للمدرسه وكان عمي ينتظرنا 
انجن بعد ما عرف القصه دخل ع المدير وانواع الكلااااااام شوي ويضربه وبعدها المدير اي شي نسويه ما يعاقبنا عليه .. نتأخر ... نغيب ... -2-
كنت في ثاني ثانوي ، يوم من الايام طفشت من حصة الرياضيات وقررت انا وخويي اننا ما نحظرها طلعنا لـ قسم المختبرات وجلسنا فيه بعد دقايق شمينا ريحة دخاااااااان وشوي شوي لحد ما عرفنا مصدر الرائحه وين كان كان في مختبر الفيزياء على طول فتحنا الباب الا ومدرسنا يدخن وانواع الضك عليه شكله بعد ما شافنا يضحك رمى الدخان ، وبدا يصرف وما يدري شيقول ومن بعدها ووضعنا معاه تماااااااام اذا بغينا نطلع عن حصة الرياضيات نروح له في المختبر ونجلس فيه << عشان ما نقول انه يدخن في المدرسه طبعاً اهو صغير في السن وتوه متعين يخاف من المدير س\ تتمن ترجع لل ( الثانوية - المتوسطة - الابتدائية ) ولا تبقى في الجامعه . ؟
اتمنى اني ارجع لـ الثااااانوي .,. !! .. ريري هكتور .. !!
س\ لو لقيتي بريق .. ومسحتيها وطلعلك جني وقالك : شبيك لبيك جنيك بين يديك .. لك أمنية وحده .. تمني ..؟
الأمنيات كثار
أتمنى تنتهي الحروب ويعيش العالم بسلام >> أخوس على الصعيد الشخصي ((التوفيق بحياتي )) ومايوقف يوزري ابدآ البته س\ تذكرين اول يوم في الدراسة . ؟ وفيه أحد ينسى ذاليوم 
((انا خصوصآ ماغاب عن عيني )):sad: أنواااع الصياح والمذابح ماأبي المدرسه(( ورّه)) قسم بالله بنت جيراننا
ماسكتني مع يد وأختي مع اليد الثانيه وطول الطريق أصيح
والجيران شي يناظر مع الباب وأحد مع الشباك
وأذا قربنا من عند الفراش((المستخدم)) سكت وأذا دخلت المدرسه كملت صيااح
لو أكمل السالفه ماخلصت..
س\ أسوء ايام دراستك . ؟
أيااام الأختبارات (( النفسيه تتعب))
وبرابع ابتدائي نقلوني أجباري من مدرستي الى أخرى وتركت صديقاتي وليز:sad:
بس ألتم الشمل بالمتوسطه
س\ موقف طريف تذكرينه .؟
هنا بكب العشاء
((هاذي السالفه صارت العام))
1)) كنت نايمه وقلت لأختي قوميني الفجر أراجع قبل الأختبار صحتني
ورحت أتوضأعشان أصلي صليت السنه قلت بريح راسي على السجاده شوي
وأقوم أصلي الفرض واللي هي مير تروح نومه على السجاده >> تقل بعير منوخ
ماصحيت الا على صراخ أختي قووووووووووووووومي صلي انا وصلت السقف وشوشتي كشت 
من غير شعور على طول كبرت وصليت يوم سلمت وانا اللي أتذكر اني نايمه يعني نقض الوضوء
راح اليوم كله نوم وصلاة وضوء مادرسنا
2)_ هاذي قبل شهرين في أخر أختبار كاان صعب مرره ومعقد انا درست زين وصديقاتي يتصلن يصيحن يوم رحت الجامعه وجتني صديقتي قالت ايش رايك بي قلت ضفي وجهتس رايقه>> نفسيات قالت لي البنت قربي وش أشوف أثرها مسلكه جوال ومضبطه اموره انا انهبلت وسمعاتها بأذانها ومغطيتها بشعرها >> قلت لها ما عليك شرهه اذا كان أبوك يقول ((اذا لم تغش فأنت لست بطالب)) دخلت القاعه والجوال متصل مع أختها بالبيت وخذ أجابات والثانيه تعطينا الأسئله وحنا برا لسى مادخلنا القاعه وأخذنا الأسئله ومشينا وحنا داخلين القاعه قابلتنا دكتورة الماده س_أنتو لسى مادخلتوش ؟ ضحكنا قلنا بلاك ماتدرين تصدقون أمها يوم درت بالطريقه نامت لها شوي وقامت الفجر وقالت (( يابنيتي والله اني حلمت انهم ماسكينتس وأبوتس يهاوش بالأداره)) >> له وجه بعد برايفت للي ينقدون
ماحطيت الموقف أتفاخر قدر ماأنا ندمانه:sad:
س\ تتمنين ترجعين لل ( الثانوية - المتوسطة - الابتدائية )ولا تبقين في الجامعه . ؟
الجامعه 
>> وطاولتي وقهوتي ورفيقاتي وهذرة المصريات س\ بعد الجامعة بتحطين الشهاده في الدولاب وتقعدين لين تتزوجين ولا بتكملين دراستك أو تتوظفين . ؟
((من سبق لبق)) أكيد ان شاء الله الأولويه للوظيفه جاري التفكير دراسات عليا !! .. هلاليه من الرياض .. !!
س\ لو لقيتي بريق .. ومسحتيها وطلعلك جني وقالك : شبيك لبيك جنيك بين يديك .. لك أمنية وحده .. تمني ..؟
واللهـ الأماني كـثيرة بس خذ هذي أتمنى إن بطولة اسـيا تكون من نصيب الهلال س\ تذكرين اول يوم في الدراسة . ؟ اللي أتذكر منه شي واحد إنهم يوم دخلونا الفصل قعدت على الطاولة :p
س\ أسوء ايام دراستك . ؟
أول يوم لي في ثالث متوسط اللهـ لايعيدها س\ موقف طريف تذكرينه .؟
أول يوم لي بالجامعة كان عندي محاضرة نجم طبعا أنـا كنت ماجيت الأسبوع الأول ولاأخذت أماكن قاعاتي ولاشيء المهم إني دخلت وحدة من القاعات وحضرت المحاضرة يوم خلصت اكتشفت انها مب هذي قاعتي وإن هالمستوى مستوى خامس :p :p <<<<يدل على فلاحتي بالـ E س\ تتمنين ترجعين لل ( الثانوية - المتوسطة - الابتدائية ) ولا تبقين في الجامعه . ؟
أرجع للثنوي 
س\ بعد الجامعة بتحطين الشهاده في الدولاب وتقعدين لين تتزوجين ولا بتكملين دراستك أو تتوظفين . ؟
لاإن شاء الله بتوظف ][ .. التقويم الدراسي .. ][
بداية الدراسة للفصل الأول
يوم السبت 26/8/1428هـ
إجازة اليوم الوطني
يوم الأحد 11/9/1428هـ
بداية إجازة عيد الفطر
نهاية دوام الأربعاء 21/9/1428هـ
(( يعني بندرس في رمضان 14 يوم لأننا بنبدأ 3 رمضان ، فمع الخميس والجمعه واليوم الوطني الموافق 11 رمضان فكذا تصبح 14 يوم غير آخر اسبوع يمكن الملك عبد الله يعطينا مكرمه )) بداية الدراسة بعد إجازة عيد الفطر
يوم السبت 8/10/1428هـ
بداية إجازة عيد الأضحى
نهاية دوام الأربعاء 2/12/1428هـ
بداية الدراسة بعد إجازة عيد الأضحى
يوم السبت 19/12/1428هـ
بداية اختبار الفصل الأول
يوم السبت 17/1/1429هـ
بداية إجازة منتصف العام
نهاية دوام يوم الأربعاء 28/1/1429هـ
بداية الدراسة للفصل الدراسي الثاني
يوم السبت 9/2/1429هـ
بداية إجازة منتصف الفصل الثاني
نهاية دوام يوم الأربعاء 3/4/1429هـ
بداية الدراسة بعد إجازة منتصف الفصل الثاني
يوم السبت 13/4/1429هـ
بداية اختبارات الفصل الثاني
يوم السبت 10/6/1429هـ
بداية إجازة نهاية العام
نهاية دوام يوم الأربعاء 21/6/1429هـ
عدد أيام الدراسة الفعلية للفصلين 179 يوما تشمل أيام الدراسة وأيام الاختبارات
فكذا يكون عدد أسابيع الدراسة للفصل الدراسي الأول 16 سبوع + اسبوعين اختبارات ، ومثلها الفصل الدراسي الثاني .. 
كان الموضوع بإعداد \ تاكـسي الغرام ،،
وأعتذر الأخ طارق (( هامور البورصه )) بسبب وجود امتحانات <==== من قاله ياخذ ترم صيفي
ونشكــر الأخ \ عز الهـلال
على تنسيقه الرائع جداً جداً جداً وبأتعب لين أكفيه بقول جداً
ولا ننسى الأخ \ Y A Z E E D على تصاميمه الرائعه جداً جداً جداً وبأتعب لين أكفيه بقول جداً 