مساء الخيرات والليرات والمليارات<<الله يرزقنا

كيف حالووكم وش اخباركم وش علومكم وش الدنيا بكم وش سويتوا وش ماسويتوا عقبي
<<باين ترحيب حريم الاجابه وحده والسؤال عشر طعشر صيغه

والله ان لكم فقده عاد احنا ماغير طربقه يعني مانقر رايحين جايين من مزرعتنا الى استراحتا وهكذا..

وفيما انا جالسه اكش في ذا الذبابين ماغير حوسه وقرقعه عاد الله من الفراغ لاشغل ولامشغله لأن تعرفون مافيها تلفون يعني بالعربي مافيها نت وحركات كوشخه بس والله ماغير اهوجس فيكم يعني جسمي شايلته معي وقليبي مخلته عندكم في المنتدى<<اخلصي وش بغيتي

الموهم وهو الاهم ان كلما طق عود حصاة قالوا ورا ماتتزوجين فخطرت في بالي فوكره جهنميه مب صاحيه<<الله يعافيك لاعاد تفكرين مره ثانيه
اللي يشوف موضوعي بيقول وش عندها الخطابه لايكون تشتغل عندنا<<مب شينه ولا
وهي اني اكتب عن محاسن العزابيه من كثر ماغثونا واقلقونا بالزواج..
يعني اللي متزوج او يشم ريحة زواج يعني عنده حرية زواج لايدخل وينكد على عمره لأن (اذا فات الفوت ماينفع الصوت)<<اخصصصصصصص ماتلعبين انتي ومثلك

للبنات فقط والتماسيح يقرون عشان ياخذون احتياطاتهم عشان اذا تزوجوا ينتبهون لانفسهم ويراعون زوجاتهم <<لاتنحاشون يالتماسيح لان ابي ردودكم لاتسحبون علي
(1)
تنوميتن وتقومين على كيف كيفك متى مابغيتي وتتحركين في الفراش على راحتك بدون ماتخافين انك تقومين زوجتس الفاطس لأن انا في النوم اذا قمت ولا رجلي الاولى يميييييييييييييين والثانيه مب لمها كاني في حلبة مصارعه اقعد ساعه اجمع نفسي<<حلوها

(2)
مفرشك لك وحدك منتيب قايمه في نصف الليل ساعه وانت تدورين وتحوسين وتقرقعين وفي النهايه معه بارده مبرده

(3)
اذا جيتي تنشبين راسك في الوساده يعني بتنامين الا وتسمعين ذاك الصوت وش ذا حسه
وتدورين عن مصدر الصوت ولاهو وراك تلفتين ولاصوت كأنه صوت مكينه تشتغل ولا رجلك فاخ في سابع نومه ويشاخر هو وجهه وانتي منطقه منتي قادره تنامين يعني الصوت الي كنتي تعتقدين انه مكينه صار شخيررجلتس

(4)
ريموت التلفزيون بيكون ناشب في يدك ......لك بلحالك وهذي عقدتي

(5)
اذا قمتي بتنظيف البيت فبيطول وهونظيف يلق ويلمع ويلصف وش حليله مايقعد يدور وراك يحوس ويخرب عليك جيبي حطي

(6)
على كيفك تاكلين البصل والثوم مب اذا تزوجتي لاتقربينه ولاتاكلينه ولاتجلسين عند ناس ماكلينه واذا كنت جالسه عند ناس ماكلينه انقلعي في الغرفه الثانيه لانه العدو اللدود لهم يعني خطر لاتلمسينه
<<<<< ياحليلنا نراعي مشاعرهم


(7)
اياك ثم اياك ثمن اياك وياويلك وياسواد ليلك ان خذت واحد نصراوي لأن بيجي كل ماانهزموا وبيحط حرته فيك
<<عز الله اللي ماشفتي خشيشته مفتوحه ولاشفتي سنيناته طالعه من كثر الهزايم والترقيعات

(8)
تعقلين وتركدين مافيه لفلفه ودوران يعني تصيرين عقل وثقل مافيه رجه وصرقعه وحسك وقرقرتك قلليها واذا جيتي تضحكين لاترفعين صوتك يعني حسك قصريه باختصار اذا كان لسانك يطول اذانك فاعرفي انه بيجزونه ويقصونه

(9)
اذا كنتي منتي بالحيل سنعه تسنعي وعدلي من نفسك واعرفي اطبخي لأن مايخلون شئ لازم يسب ويشرشح شوي مثل ورا الرز خانس ورا الدجاج كثيرة صلصته ورا القهوه خفيفه ورا الشاهي مر........الخ يعني طبخا طبختيه يالرفله أكليه<<وش رايكم هذا دليل اني اعرف اطبخ وسنعه مسنعه..

يعني اللي عايش في عزوبيه فاعرف ان حظه يمشي مليونين ويقوطر عسل<<روحي مناك بس

الوووووووووووووووووو انتم ماسكين خط معي الى الان معليش على كثر البربره والقرقره
وأخيرا:<<مابغيتي تخلصين
اقول انصب افقش عليكم اللي متزوج الله يوفقه واللي ماتزوج الله يرزقه الحبيب او الحبيبه المسنعين اللي وش حليلهم اللي يطير بها وتطير به <<حشا وش قالو لك عصافير امييييييييين

يالله عاد لاتسحبون علي وروني خششكم وعطوني وجه..
ابي ردودكم ولا بالخيزرانه<<يحسدوني على النعومه


ياحبينيلكم واالله

وأول ردين لي من عندي جائزه له او لها أني أخطب له او أخطب لها <<الحقووووووووووا متى تحصلكم مثل ذا الفرص وترى الكميه محدوده