( صنيدح ومزنة ) … الحلقة الأولى

طبعاً يا أحبابي هذي قصة واقعية لشخصين عزيزين موجودين معنا بالمنتدى أول حرف من أسمهم الأسطورة وطلال …!! تقولون وشلون …!! أنا أقولكم السالفة من أولها لآخرها …

طبعاً مثل كل يوم شغلت الجهاز وسميت بالله ودخلت الانترنت … قلت ياولد خلني أشغل المسنجر ماني خسران شيء … خلني أتعرف على الوجية الطيبة … وبالفعل دخلت عليه … وأزين شيء أشوفه أسم طلال والأسطورة … قلت في بالي ياولد … وش تبي فيهم … طلال أبو الجرايد …!! والأسطورة الشايب …!! يالله حسن الخاتمة مواضيعة 1000 …!! ليه هو ساكن في المنتدى …!! المهم … قلت بعد تفكير خلني أسلم عليهم … وشوي مادريت إلا أنا معهم …
سفر : السلام عليكم
طلال : تصدق وأنا أتجمد ..!! ( وراه ما يرد السلام … قلت يمكن ما أنتبه ) .
الأسطورة : ايه كمل ياطلال يازين سوالفك ..!! ( حتى الثاني ما يسلم … أفااا ) .
سفر : ياولد ردوا السلام …!!
طلال : هلا سفر … ( قالها من غير نفس ) ايه يالأسطورة وأنا أنتظر الشمس ..!!
الأسطورة : سفر اسكت خلنا نشوف طلال فكنا منك … !! ( والله أنا تحمست )
سفر : طيب طلال قول القصة من الأول تكفى .
الأسطورة : سفر أنت دايم نكبة خله يخلص أول .
طلال : خلاص بأعيدها علشانك ياسفر …!! ( قلت تمام … شكلها سوالف زينة ) ..
وبعد لحظة من الصمت …..
بدا طلال يقول القصة العجيبة … وخلوني بأذكرها لكم كاملة …
طلال : والله ياسفر أنت والأسطورة هذي السالفة صارتلي قبل 10 سنين ( أففففف عشر مرة وحده …!! كم عمره هذا ) … كنت عسكري مظلي في تبوك … المهم كان عندنا قفز من الطيارة على الأرض … إختبار مظليات … المهم أنا وخوياي قمنا نقفز بالدور بس صدقوني أنا كنت الأول لأني أشجع واحد فيهم …!! وطمروا الشباب كلهم … وكلهم على طول فكوا مظلاتهم إلا أنا … أحب أستمتع بالجو … ( أي جو حسبي الله على بليسك …!! ) … المهم وأنا فجأة تطلعلي هذيك الغيمة وأنا أثبت عليها ما قدرت أتحرك ( أخس يا رامبو …!! ) … وأحاول أنزل ماقدرت ..!! أصحابي كلهم نزلوا إلا أنا جلست فوق الغيمة … وأنتظر ثلاثة أيام فوقها … والهواء يودينا من مكان لمكان …!! ( ياراسي راساه منك ياطلال …!! ) … وأنا أتجمد …!!!!!!! ( لالالالالالا قوية …!! ) … وطحت من فوق الغيمة على الأرض … وفجأة وأنا عند الإهرامات في مصر …!! ( وش خليت للنصابين يا طلال …!! ) … وكنت متجمد … الله لو تشوفون ياسفر والاسطورة العالم كيف كانت متجمعه علي ويصيحون الرجل الثلجي الرجل الثلجي …!! والأمريكان يصوروني والعالم تصوير …!! والحمد لله الشمس كانت قوية وبدأت أرجع لوضعي وبعد يومين صرت طبيعي … وجابولي أكل وموية … حتى صحصحت … ( والله اللي يبيله يصحصح مخك ..!! ) … وكان فيه بنت سعودية مع العالم واقفة تناظرني نظرة إعجاب …!! لكن المشكلة ما فضيت لها من الناس والصحافيين ( علشان كذا طلال دايم يجيب الأخبار متأثر بالصحافيين ..!! ) … ولقاءات على الهواء … وبعد ما خلصت … أدور البنت … ما أدري وين راحت …!! كلمت مصري كان جنبي … وقال لي معرفش ..!! … المهم أخذوني وسكنوني بفندق خمس نجوم في القاهرة … فندق إسمه فندق توحه المسطوحه …!! ( بالله ياطلال هذا فندق … هذا شكله مقهى ..!! ) … المهم يا سفر انت والأسطورة أنا ماكان معي فلوس لأنها خليتها في تبوك مع محفظتي ..!! ولكن الحمد لله السفارة ما قصرت … المهم قالولي قناة ام بي سي … وش رايك ياطلال بنسوي معك مقابلة …!! وبصراحة أنا وافقت بسرعة … تدري ليش يا سفر …
سفر : يمكن علشانك مشهور ( على نياتي أنا …!! )
طلال : طيب تدري ليه يالأسطورة ..!!
الأسطورة : أكيد علشان تدور البنت في هاليومين حقت المقابلة ..!!
طلال : والله كأنك معي يالأسطورة …!! ( حسبي الله على بليسكم …!! ) …
المهم يواصل طلال …
وأنا أوافق قلت لكن بعد العصر التصوير إلى المغرب ثلاث حلقات … قالوا أوكي … علشان أدور البنت … وأنا أطلع ألف عليها بالقاهرة … لكن ما أدري وش أقول للعالم …!! ما أعرف إسمها … لكن أعرف شكلها زين … ومن حسن حظي مرت من قدامي وحده … أنا قلت هي … وأجي طاير ألحقها أمشي ميتين … ولما تعديتها … طلعت تشبه صاحبتي … والله على طول ذكرت أغنية محمد عبده … يا شبيه صويحبي حسبي عليك …!! ( الرجال هذا نصاب محترف وعلني …!! ) … المهم ما يأست وحاولت … وفجأة وقت المقابلة العصر … شفتها … والله تذكرت الشاعر اللي يقول …
شفتها لا ماشفتها … بلمحه خاطفة فز الخفوق
وأعرفه لا فز يعني شفتها …
تصدق يا سفر قلبي خفق … وقلت للمذيع جورج قرداحي ( وش دخله هذا …!! شكلة ما يعرف إلا هو …!! ) … قلت ياجورج ممكن نأجل لبكرة … قال جورج فكر منيح …!! وقلت فكرت تكفى خله بكرة قال أوكي …!! المهم طلعت ورا البنت بسرعة زي الصاروخ …!! ( الصاروخ والله الأرانب اللي ذبحتنا فيها …!! ) … ومسكتها بيدها … ووقفت … وقلت لها … يازين هالعيون لأنها كانت متغطيه … قالت أنت أزين … قلت والله حبيتك من أول نظرة … ( أخس يالرومنسي …!! ) قالت حتى أنا … وسألتها وش إسمك … قالت مزنه … وسألتني وش إسمك وأنا بصراحة حسيت إسمها بدوي قلت خلني أغير طلال هذا قلت أنا صنيدح …!! قالت يازين إسمك … وقلت أنتي أزين … المهم قالت عن أذنك بأروح أهلي ينتظروني … وقلت أنا حبيتك وودي نتبادل هالشعور … قالت أنا حبيتك من قلبي … وبادلتك الشعور … أخطبني … قلت والله أخطبكي ونص … قالت خلاص … وأنا أروح لأهلها … وأول ما شافوني كلهم رحبوبي عرفوني من التلفزيونات … وقالوا أنت البطل طلال …!! والله أني أنفضحت … لكن عرفت أصرفهم … قلت طلال بالتلفزيون وإلا أنا صنيدح …!! ( كذب عيني عينك ..!! ) … المهم خطبت ووافقوا على طول … وتزوجتها هناك … ( أنت قبل شوي تقول ما معك فلوس ..!! ) ورجعنا مع بعض لتبوك … وأصحابي أغمى على أغلبهم يقولون أنت حي الحمد لله الحمد لله … حنا صلينا عليك صلاة الميت الغائب … قلت لا أبشركم أنا حي أرزق … وهذي قصة يا سفر أنت والأسطورة …
سفر : أقوووووول ( أبي أفضحه طبعاً … لكن قاطعني الأسطورة ..!! )
الأسطورة : طلال والله قصتك رهيبة ذكرتني بسالفة صارت علي … من زمان ( ياويلي ويلاه بدا الثاني …!! ) …
طلال : قلنا يالأسطورة …
الأسطورة : طيب القصة هي …………………

أنتظروا الحلقة الثانية
[عدلت بواسطة ســ9ــامــ9ــي التاريخ:02-03-2001 الساعة: 04:42 AM]