بسم الله

آه 00كم أحن لذلك المكان ولرائحته00من منكم قد اشتم رائحة الماضي00؟!
الحديث عن ذلك المكان له شجون000
مشوار سوق الزل000من رغباتي التي لا أملك مقاومتها، ولعل والدي أطال الله عمره يدرك ببصيرته أن تلبية تلك الرغبات من حين لآخر تبني في نفسي شيء ما00!!
بعد صلاة العصر ، ومع أريج نسائم صبا نجد في يوم من أيام الرياض الخريفية00
وفي مدخل السوق بدأت ألحظ فلاشات كاميرا أحد الزوار الأجانب، وهاأنذا أمشي الهوينا لعلمي بأرضية السوق القديمة التي أشعر بها تعلو وتهبط000
والدي: يا سلمى وين النية انشاء الله هالمرة؟
قلت: البشوت000أبي أشوف الشيبان اللي يطرزون البشوت00
والدي: يالله الخيرة000مشينا00!
ونتبهت لذلك الشيخ الكهل ذو السبعين عاماً أو اكثر، المفترش مشلحه داخل دكانه العتيق، أراه يطرز ويحيك بمهارة وحين اقتربت اكثر كأني به يردد قصيدة مشهورة ، فستأذنت من والدي أن أتحاور قليلاً مع ذاك الشيخ وحين أعطاني الأذن بالحديث اتجه والدي لمحلات بيع الزل واتجهت أنا بهدوء اتجاه ذاك الشيخ وسمعته يردد:
هم بروني وانا عودي رفيع**** ياعلي مثل مايبرى اليراع

فأقتربت اكثر وقلت :
طوعوني وانا ماكنت أطيع**** وغلبوني وانا قرم شجاع

فرفع عينيه بتثاقل ووقار000
قال: ايـــه00! انتم يالشباب ماتعرفون من القصيد الا اذا غنيتوه0000سمي يابنتي آمري000
قلت: مايامر عليك عدو000بس أنا يابوي أعرف هالقصيدة وغيرها من القصيد قبل ما اعرف أكتب وأقرا وإذا تبيها كامله قلتها لك الحين، وبعدين من قال انك شايب ؟ كني بك ماتميت الأربعين00
فرد علي بتفاخر: أدري!
قلت: أقول
قال: قولي
قلت: تعرف الهلال؟
قال: عبد الله بن سعد؟
( سكت لحظات لأستوعب ما سمعت فقاطعني بإلحاح)
قال: هلال عبد الله بن سعد؟
قلت: ايه هو هلال عبد الله بن سعد
قال: ايـــــــه 00! رحمة الله عليه وعلى عين حبته0
قلت: من العين اللي حبته؟
قال: ولدي سعد جعل عظامه في جنات النعيم مات هو وعبدالله بن سعد في نفس اليوم، ولدي سعد هذا كان راعي كورة ويحب الهلال بالحيل وكان يحلف علي وانا أبوه(يقولها ضاحكاً) أني اشوف الهلال اذا لعب وكان يقولي هذا فلان وهذا فلان ، تراني يابنيتي اعرف ولد النعيمة والبيشي00بس يوم الله خذ وداعته ماعاد شفت كورة ولا أسمع عن الهلال الا من عبدالله بن سعد حفيدي ولد المرحوم سعد00عاينيه هذا هو 00

----تجمعت شجاعتي حتى لا اظهر ندمي لفتح هذا الحديث المحزن المبكي ونظرت لهذا الصبي الصغير ، الرجل الصغير ذو العشرة أعوام---
قلت: ماشاء الله وش اسمك يابطل؟
قال: اسمي عبد الله بن سعد
قلت: اقول وش تشجع؟ أكيد هلالي مثل أبوك
قال: ايه هلالي مثل ابوي سعد ومثل أبوي عبدالله بن سعد00!!
-- رحمة الله عليه--
قلت: أقول ياعبدالله00انت ماتعلّم جدك عن أخبار الهلال ؟ علّمه انه بيروح كاس العالم ، قوله ان واحد من االلاعبين راح يلعب في ديرة الإنجليز00
قال: ايه قلت له علمته ، كل يوم أجلس انا وياه واعلمه...
قال جده: يا جعل عيني ما تبتسيك(تبكيك)
قلت: اقول يابوي لي عندك طلب فلا تفشلني وتردني
قال: قولي وتراه تم بحول الله00تبين بشت؟
قلت: لالالا وشو بشته الله يهديك 00أنا أبيك تعوّد تشوف الهلال مع عبدالله بن سعد الصغيّر 00تراه يستاهل والهلال يستاهل 00

-----نظر اليّ وكانه تذكر صورة ما وبرقت في عينه دمعة أخاله كتمها منذ سألته عن الهلال-----
قال: آه000 طوعوني وأنا ماكنت أطيع000!!(وقال مبتسماً) :أبشري تم والوعد اللعبة الجاية انشاء الله0
قلت: اقول
قال: اها وش تبين أخلصي
قلت: بس بغيت أسالك00 الله يعطيك طولة العمر00وشلون تطرز بهالدقة ماشاء الله ؟ هي عيونك ماتتعبك؟
قال( بشبه غضب): وشو؟ تحسبيني شايب؟ على الطلاق اني لو أبي أعرس لعرس من بكرة على بنت 16 سنة00
قلت( محاولة تهدئة هذه الإنتفاضة): لالالالالالا الله يصلحك أي شايب هماني قلت لك أني كني بك أبو 25؟ وسع صدرك00
قال: الله من التسذب00اقول00تشوفين عبدالله ذا؟ أمه لا درت ان فيه كورة للهلال ماعلمته عشان دروسه لا ينشغل عنها00لكنه كان يعرف000 ويشوفها غصب عن الجميع ..لأنه يعرف بقلبه 000وأنا أحب شغل البشوت من شبابي ويوم كبرت صرت أدل مكان الخيط بقلبي مهوب بعيوني 00عرفتي؟
قلت: تشوف بقلبك؟؟
قال : ايه بقلبي اللي يحب شي يشوفه بقلبه0انتي وش تحبين؟
قلت(من غير تفكير): أحب أبوي
قال: وينه أبوك الحين؟
قلت(بعد لحظات): أبوي واقف وراي00
قال: وشلون شفتيه وهو وراك؟
قلت: لك الله شفته بقلبي000!!


سلمى

[عدلت بواسطة سلمى التاريخ:01-03-2001 الساعة: 03:38 AM]