|
راح اغير التردد بس ماخاب من شاور
مساكم الله بالخير .....
ضاعة الطاسة والله ... لي الحين اسبوعين وانا ماغير اشاور اهل العلم من ها المشايخ واهل العلم الي اعرفهم مالقية اجابة شافيه ...
سألة امام مسجدنا وقال فيه بعض شركات التامين حلال .. لانها اصبحت ضروره وارى انه لاباس
من دفع قسط سنوي او شهري من تأمين ضد الغير للسياره وغيره .. وان ولاة الامر اقرو بتاسيس شركات تامين بعد ماتاكد لهم ان مصالحه اكثر من مفاسده ... قلتله جزاك الله خير
طيب ياشيخ شراء سهم التأمين يجوز قال لايجوز ... قلت وراك هونت ياشيخنا
توك وانت تقول ضروره ومصالحه اكثر من مفاسده ويجوز تدفعلهم سنوي رسوم والحين تقول ابتعدعن السهم مايجوز
وشلون يعني بس الحلال ان حنا ندفع ياشيخ للشركه ولانستثمر فيها قال هذي وجهة نظري ...
قلتله جزاك الله خير عاد احبه ها المطوع وامون علية بس الله يصلحه مامسكن جاده ... يوم قضيت مشاور الامام وانا اروح وامسك المؤذن قلت يمكن يجي منه شي ينفع ...
يومني سالته على طول وبانفعالية قال التامين حرام وبغى يضربن الا شوي وقالي انت ابو عيال وخف ربك... قلتله جزاك الله خير ...
سألة الهندي الي عند البراده يشرب قلتله التامين حلال والا حرام قال مافي معلوم بابا قلت والله انا
الي مافي معلوم يابو فسية ضعنا بين ناس تقول حلال وناس تقول حرام واذا وصلة اسعار اسهم التامين 1000 افتو انها حلال وانها اسلمة معاملاتها... حتى في المنتدى اقرا كلام لمشايخ حرمو ومشايخ حللو ...
عطونا الزبده والا عطونا رقم تلفون لشيخ يرد على الجوال والا عندي لستة ارقام مشايخ بس مايردون على التلفون غير الشيخ صالح السدلان الي حسب ماقريت انه اجاز تداول اسهم التامين...
بصراحه ناوي اغير التردد وابيع نص من الراجحي الحلال ونص من صافولا ها المحترم واشتري سهم ولاء
ولا ملاذ ولا الدرع من ها الاسهم الي اساميها تفتح النفس بس ودي تنوروني عن شرعية المضاربه باسهم التامين ...
ملطوش من ابو فهد
| 