| ((السلسال))
على الهون ياجرح المفارق وضيق البال..
على الهون ياهم سطابي وقدرته!
اعزك لو انك جرح ومجاهدك قتال..
وروضت جسمي لاجل سقمك وصبرته!
لاجل من ملك قلبي من الجال لين الجال
وفجيت له بابٍ عن الناس سكرته!
وحطيت له عن شمس قيظ الغرام اظلال..
وشيدت له بيت بقلبي وعمرته!
عشقته ودللته وجريت له موال..
وتخيرت قربه ليتني ماتخيرته!
رعى ريف قلبي لين صارالحشا مدهال..
وعن مدهله جنبت غيره وذيرته!
سقيته من عدود الغلا والغرام زلال..
بعد ماجذب من دم قلبي وصدرته!
اداري عليه من الزعل وازعل العذال..
وخطاه ان كبر في عين غيري تصاغرته!
ترافقت انا وياه من يوم كنا اطفال..
تكون غلاه بوسط قلبي وكبرته!
قبل مايغطي ليله المنتثر بالشال..
سرقت الكرى من نون عينه وسهرته!
نقش كل حرفٍ من حروفي على السلسال..
تباهى بها واغاظ ناسٍ مجاكرته!
وكتبت القصايد في عيونه على اليامال..
وليامرني صوت النواخذ تذكرته!
تكاثر علي الله يجازيه كيف الحال..
وانا يوم اسوق العمر له ماتكاثرته!
وبعد كل هالتقدير والحب والاجلال..
تغير وهقواته عليه مغيرته!
لبسته ثياب الغطرسه لين جا يختال..
وكبر في عيونه يوم الاوهام غررته!
واذا السالفة ضحك ومهازل ولعب اطفال..
خبطت الغصن لين ابرق الريش طيرته!
خلصنا وقفلنا الصناديق بالاقفال..
ومن جور حكمه كامل القلب حررته!
* تركي الميزاني *
..........................................
مانيب مجازيك في صدك وهجرانك ودعتك الله وتلقى وحدا ثاني
اتعبت الاعيان والاقدام من شانك وانته ولاشي سويته على شاني
فزيت لك يوم قلت اسمك وعنوانك لوكان ماتنتمي لأسمي وعنواني
ماجيت ادورك ولا اطق بيبانك ولا اترجاك مثل فلان وفلاني
انت الذي جيتني واعلنت بالسانك انك على شوفتي جايع وعطشاني
صدقت هرجك ومنطوقك من لسانك وقبلتلك من دفع من كل وجداني
ماكنت افكر يجي في يوم نسيانك وانساك وانت معاهدني ما تنساني
الى بعد ما قريت الكذب با اعيانك حاولت اوادعك وانسى كل ماكاني
خلاص ماني متعني على شانك ودعتك الله وتلقى واحدا ثاني
..............................................................
هذا بعض قصائدشاعر الوطن تركي الميزاني  | 