نادي الهلال السعودي - شبكة الزعيم - الموقع الرسمي - مشاهدة مشاركة بصفحة مستقلة - && ِكَِــوَالِــيٌــسُ مُــنُــتَــدَِىَِ الَِــمَــِجـَـلِـُـسَ الـُـعَـٍـامَِ &&

الـمـشـاغـب · #1 12/06/2007, 11:21 AM

بسم الله الرحمن الرحيم

السلام عليكم ورحمة الله وبركاته

وبعد:

بمناسبة تخلصي من الاختبارات الغثيثة في هذا اليوم .. أهدي هذا الموضوع إلى جميع الطلاب الذين ما زالوا يختبرون

العنوان واضح .. وجميع ما يدور في الموضوع لا يعني أني مررت بهذه المواقف.. ولكني سمعتها من الكثير..!

وأعتقد أن السيناريو الذي سأكتبه هو حقيقة ً مايدور في كواليس المجلس العام .. والله يستر من الفضايح

نقطة أخرى هامة أريد توضيحها قبل البدء: عند وضعي للشخصيات تجنبت وضع أسماء العضوات.. ووضعت بدلاً عنها

أسماء وهمية..!! أما الأعضاء فاخترت أسماء من أمون عليهم أو من صدره وسيع وما يزعلشي..!!

---------------------------------------------------------------------------

** في منزل القيصر رهيب **

كلي هلالي: القيصر رهيب وينك ما نشوفك بالمنتدى؟ يا ولد والله لك وحشة...!!

القيصر رهيب: وش أسوي؟ ما عندي جديد أقدر أضيفه للمنتدى.. ما عندي أفكار..!

والنهاية.. : حتى لو ما عندك أفكار يا أخي شارك وتفاعل مع المواضيع وبتجيك الأفكار إن شاء الله..

القيصر رهيب: والله ما أدري وش فيني هالأيام كل ما حاولت أشارك ضاق صدري وما قدرت أرد على المواضيع..!

كلي هلالي: بسيطة.. أنت بس أكتب موضوع بس.. ومع الردود اللي بتجيك بترجع معنوياتك.. واسأل مجرب..!! ;)

---------------------------------------------------------------------------

** عبر الجوال **

حصة: هلا ريم .. ما شفتي اليوم رد المشاغب؟

ريم: بأي موضوع؟

حصة: بموضوع كيف تكونين جميلة..!!

ريم: إيييييه شفته .. يا هو ثقيل طينة من جد

حصة: أظنه حاقد على البنات.. ليه؟ مدري

ريم: لا هو بس علباله أنه بيلفت انتباهنا.. ويبينا نعطيه وجه.. معروفة حركات المراهقين..!!

( والله يا جماعة غلطانين.. لا تصدقونهم )

----------------------------------------------------------------------

في الماسنجر:

leo missi : شباب .. شباب .. شباب..الحقووووا علي !!

هامور: خير خير وش فيك؟

بريماكس: سلامات.. قرصتك عقرب؟

leo missi : شباب.. أضافتني اليوم بنت

هامور: بالله؟ وفرحان أنت ووجهك؟ بتتشقق؟ :p

بريماكس : حرام عليك.. وش تبي بالبنت أنت؟

leo missi : بلا حركات مطوعة يا بريماكس.. لو فتشنا ماسنجرك لقيناه كله بنات

هامور: ما عليك منه يا مسموسي :p عطني أول إيميلها خلني أشوف إذا هي عندي أو لا..!!

leo missi : أول إيميلها (duig) والباقي ما تغير :p

هامور: أففففف.. لا يكون تكملة الإيميل (f3r) .. والله أنها عندي من زمان.. والنصابة تقول أنها تحبني

leo missi : أجل بأحذفها لعيونك يا هموري.. وش أبي فيها اللي تضيف كل خلق الله..!!

هامور: لا خلها.. بأصكها أنا بلوك بعد ما أسألها عن اللي أضافتهم..!!

-----------------------------------------------------------------

** في الجامعة **

نورة: ما دريتي يا سعدى؟

سعدى: وش عندك؟ اخلصي علي..!!

نورة: جاتني رسالة خاصة أمس.. من واحد ما تتوقعينه..!!

سعدى: من مين؟ لا يكون سهل

نورة: فال الله ولا فالك.. رسايل سهل كلها إيقافات ولا إنذارات

.. الرسالة جاتني من ماجد مقبل

سعدى: ياااااااي ياااااااي ياااااااي يا حظك يا نورة... وش قال لك فيها؟

نورة: يطلب مني أعدل ردي في موضوع العنا لأنه كان قاسي شوي ويجرح مشاعر العنا الرقيقة

سعدى: أفااا .. يعني ما يبي يتعرف؟

نورة: إلا يالغبية.. هو بس يبي يجس النبض.. وإذا شاف مني تجاوب ورديت عليه.. بيفهم أني أبي أتواصل معه فيرد علي
......... وهكذا تستمر بيننا الرسايل الخاصة لحد ما نوصل للماسنجر..!!

سعدى: والله عندك خبرة بحركات المراهقين يالخطيرة

-------------------------------------------------------------------------

** في الشات **

الكناري الأزرق: يالحبايب.. ما تلاحظون شي بالمنتدى؟

زعيموفيتش: وش نلاحظ يا كناري هولمز؟ :p

الكناري: ما تلاحظون أن مستر قوول متزاعل مع البارق؟

هلالي القرعاء: طس مناك بس.. وين اللي متزاعلين وهم أخويا؟

الكناري: والله ما عندك سالفة.. شف ردودهم في موضوع أبو طلال... وموضوع سام 6 وبس..!!

زعيموفيتش: عادي .. اختلاف في وجهات النظر بس..!!

هلالي القرعاء: تصدق أنك طلعت ذكي؟ والله فيك رجاء ما شاء الله..!!

الكناري: واضح أنهم متزاعلين.. حتى أنهم ما يردون على مواضيع بعضهم..!

زعيموفيتش: خلونا من المشرفين الحين.. مليت خششهم في قسم المشرفين

.. ما تلاحظون أن هلالي الظهران
.................و ناجية مشبكين بعض؟

هلالي القرعاء: كيف عرفت؟

زعيموفيتش: شوف ناجية ترد أول واحدة على مواضيع هلالي الظهران وتهتم بردودها على مواضيعه.. ردودها على
................. مواضيعه تختلف عن ردودها العادية.. تحس أنها تحبه من قلب..! وهو بعد تلميحاته لها قوية..!!

الكناري: أنا كان قلبي حاس أن ناجية خوية هلالي الظهران ... واضحة أصلاً..!!

هلالي القرعاء: ما عليكم منهم.. إن شاء الله نحصل أطلق من ناجية..!! شباب بأقول لكم شي ما بتصدقونه..!!

الكناري: أنا بأصدق..

زعيموفيتش: أنا ما بأصدق :p

هلالي القرعاء: اليوم سألت واحدة معنا بالمنتدى توني متعرف عليها.. عن اللي أرسلوا لها بالخاص أو يبون يتعرفون..!

الكناري: الله يستر لا تكون من اللي أنا أرسلت لهم

هلالي القرعاء: لا... اللي أرسلوا لها ناس ما تتوقعون أنهم يرسلون لبنت..!! أهمهم القاضي

زعيموفيتش: والله أنك مريض أنت واللي يصدق هالنصابة... القاضي رجل فاضل وكبير عن حركات المراهقين.. تجي تقول
................. لنا أنه يبي يتعرف على بنت؟

الكناري: زعيموفيتش صادق.. ترى هالحركة منتشرة بالمنتديات.. الحين الولد يجي يفتخر قدام أخوياه أن العضوة
............. الفلانية تبي تتعرف عليه... أو البنت تفتخر قدام خوياتها أن العضو أو المشرف الفلاني يبي يشبكها..!!
............. وكل هالكلام كذب.. وتشويه سمعة لأعضاء محترمين..!! والمشكلة اللي يصدقون ويطيرون بالعجة..!!

--------------------------------------------------------------------

** في المدرسة المتوسطة **

نجوى: شفتي يا كريمة رد الكلاسيكي على ردي؟

كريمة: ايوه.. وش فيه؟

نجوى: ما لاحظتي أنه يحاول يحتك فيني؟

كريمة: وش دراك؟

نجوى: وشلون وش دراني؟ أنا ملاحظة أنه يرد على كل مواضيعي ويرد على ردودي.. مدري وش يبي بالضبط؟

كريمة: والله أنك مغرورة وما عندك سالفة.. الكلاسيكي يرد على كل الأعضاء.. فلا تاخذين بنفسك مقلب..!!

نجوى: المهم ما علينا.. بأسألك عن أبوراس... يقولون أنه متزوج حنان اللي معنا بالمنتدى؟

كريمة: حتى أنا مثلك سمعت.. يقولون أنها كانت مخطوبة منه وسجلت بالمنتدى ثم تزوجوا..!!

نجوى: والله معاد ندري من كثر الإشاعات بهالمنتدى..!!

-------------------------------------------------------------------------------

**في غرفة البلاي ستيشن **

حفيد مؤسس الهلال: يا عيال البنات الجدد كثروا بالمنتدى.. يكون بعلمكم سارة لي أنا حاجزها لا أشوف أحد يقرب صوبها

عابر القارات بالريوس: موب على كيفك تحجز.. سارة لي.. شف ردها علي كيف؟ واضح أنها معجبة فيني ;)

حفيد مؤسس الهلال: ترى ما لك داعي يا عابر.. لا تخلي بنت تفرق بيننا..!!

عابر القارات بالريوس: يا حبيبي أنت وشطارتك.. ما فيها حجز ولا هم يحزنون..!!

حفيد مؤسس الهلال: ما يكفيك هند والعنود وشمعة اللي تضحك عليهم أنك تحبهم؟ خل هذي لي تكفى..!!

بلد الوليد: خخخخخخ الله يرجكم يالخرفان... أولاً سارة ولد موب بنت خخخخخخ

حفيد وعابر: أفاااااااا

وش دراك؟

بلد الوليد: لأنها أضافتني من زمان وأنا اللي توسطت له بالتفعيل... واستمرينا 4 شهور وقصة حب خطيرة.. وبالأخير
.............. ملت مني واعترف لي أنه ولد مهوب بنت وسمعني صوته.. بشعععععع !!!

عابر القارات بالريوس: الله يستر.. لا يكون هند والعنود وشمعه تماسيح وأنا مصدق نفسي مطيح البنات

حفيد مؤسس الهلال: أقول خلونا نكمل اللعب واتركوا عنا طاري البنات.. أنا خلاص اعتزلتهم :p

------------------------------------------------------------------

يكفي إلى هنا.. والله تعبت..!!

أعرف الموضوع مهوب مرتب ولا مضبط... بس والله الفكرة لها أكثر من أسبوع في راسي.. وتوني أكتب الموضوع

بدون تحضير ولا مراجعة.. من الراس للكراس على طول :p فالعذر منكم إن كان فيه أي أخطاء في الموضوع..!!

الأهم أن الفكرة وصلت وما يهم الطريقة..!! (بس وش رايكم بالتنسيق؟)

فيه سلوكيات خاطئة نتبعها في المنتدى وخارجه.. وتتسبب في تشويه سمعتنا إما بسبب طريقتنا في الردود.. وإما

بسبب أعضاء لا يخافون الله..!!

------------------------------------------------

ملاحظة كبر رأس هامور:

كل الشخصيات اللي طرحت في هذه المواقف غير حقيقية ... وإنما استخدمتها لتخدم السيناريو..!!

لاحظت أن بعض الشباب فهم غلط واعتقد أن المواقف حصلت للأعضاء أنفسهم.. وهذا غير صحيح..!!

تراك يا هامور أشرف من الشرف فديتك

سي يو ..!!