|
هذا ماحصل في المنصة الملكية
هذي قصتي مع النهائي العجيب الغريب ...... كنت متفائل ... مادخلت في نقاشات مالها داعي مع أي صديق لي من مشجعي الفرق الأخرى كانت اجايتي لهم ... يوم الجمعة موعدنا !!!! يوم الخميس قبل النهائي بيوم كنت جالس في استراحة مع الشباب .. واحد من الشباب كان معه دعوة خاصة لحضور المباراة يعني في المنصة الملكية لما شفتها انجنيت قلت وش تبي فيها وانت ماتشجع الهلال قال جتني الدعوة وقلت استفيد منها وابيعها قلت لها وبدون تردد انا شاريها قال كم تدفع قلت كم تبي انت فيها قال الفين ريال ( 2000) . قلت له راتبي كلها ثلاث الاف ريال وانت صديقي يعني تقدر ضروفي قال .... صاجنا كل ليله بالزعيم والزعيم ... اذا تشجع الزعيم وتبي تكون قريب من اعضاء الشرف واللاعبين وتبارك لهم من قريب ادفع ياخي ....!!!! بصراحة كان صديقي خبيث ويعرف من اين تأكل الكتف . قلت له طيب بعطيك الف ريال الحين والف مع الراتب الشهر الجاي قال موافق وفعلا اعطاني الدعوة وطمرت لأقرب صرافه وسحبت له الي بالصرافه كله الف ريال وعطايته المبلغ وهو من زود الحرص شهد علي الشباب الي موجودين كلهم قال ترى باقي لي في ذمته الف ريال . مشيت من الاستراحة وكنت اتخيل شكلي وانا ابارك للامير بندر بن محمد والامير عبدالله بن مساعد واسلم عليهم واتخيل الزحمة على الممر الي يمر معه الفريق وهو طالع للمنصه وهم رايحين يجيبون الكاس ويدي تتخطف بشت الأمير محمد بن فيصل وسامي ونواف وياسر والله اني كنت طاير من الفرحة ومافكرت بالخسارة نهائيا . وصلت للبيت وكانت بنتي قمر عمرها سنه واقف ولابس كاب كنت مجهزه عشان المباراة . وطرت علي فكرة جهنميه ....!!!! قلت يمكن من الزحمه ماراح اقدر اسلم وابارك لاعضاء الشرف كلهم احسن شي اني اسوي بروشور بالكمبيوتر واطبعه 100 نسخه واول ماتنتهي المباراة بوزعه او اطيره فوق المنصه واكيد انه بيوصل لهم وفعلا صممت وتعبت وانا اصمم فيه حطيته فيه باسم بنتي قمر لاني سميتها قمر على اسم الهلال ... تبغون باقي القصة او خلاص الى هنا وانتم تعرفون الباقي . لا لا بكمل القصة الدراميكيه جاء موعد الحسم ورحت وكشخت ولبست وانا طاير من الفرحة لاني بكون قريب من كل حبايبي وفرحتي اكيد بتكون فرحتين بالفوز وشوفت رجال الهلال من قريب . لكن ولكن ولكن جاء النتيجة المرة وطلعت من الملعب اسف طلعت من منصة التتويج الي وصلها الزعيم كثير وانا ماوصلتها الا هذي المره ولاظنيت اني بوصلها مره ثانيه . رجعت للبيت لقيت البنت تصيح وامها تقول ترى حليبها خلص ومن اليوم اتصل عليك عشان اقولك تجيب معك حليب وانت راجع لكن مافيه تغطيه عندك كالعادة لما تكون في الملعب . تدرون وش صار . فتحت المحفظة ولقيت فيها 50ريال بس قلت الحمد لله اني ماشريت فيها شي وطمرت لصيدلية واخذت حليب لبنتي قمر وعلبة بندول . النهاية | 