السلام عليكم ورحمة الله وبركاته

مساء الخير / صباح الخير


سبب الموضوع

كل شي نسويه خطأ في اعتقادهم

امس كنت مار في شارع تفحيط ووقفت اتفرج وشوي الا والحكومه شافتني

الجوال : ترن ترن

انا : هلا

الثاني : لا لا لا يالي فيك ما يخطيك يا .. يا ... زين اوريك ... بسحب السياره منك <<< عمه

اثاريه مار مع الشارع وشاف السياره

رجعت لم البيت حدود الساعه 12 الليل ابي انام الا والوالد الله يحفظه جايني ويقول لي هات المفتاح

قلت له ابشر وعطيته المفتاح واخذت لي زفتين قبل النوم وبلعت العافيه وطلعت انام

واليوم جاني الوالد يبي يكلمني عن التفحيط وليش وليش وحرام ... ومن الكلام هذا

عاد انا ما اقدر ارد على الوالد سكت ورحت وعيوني صايره 24 بوصه .

وش نسوي لازم نرضي والدينا

عاد انا برد على الوالد هنا من دون ما يدري

وراح افرض انكم انتوا اللي قلتوا لي (( لا لا ياللي فيك ما يخطيك ... هات المفتاح ))

نجي لردي عليكم وهذا يعتبر وجهة نظري احتمال اكون على صواب او خلافه .


اولاً :

التفحيط في الاساس رياضه والاسلام لا يحرم الرياضه اوكي

^^^^^
انا متأكد انكم معي في كلامي

ولو جينا للتفحيط من فكرته

هو الاستعراض بالسيارات والترويح عن النفس اعتقد ان هذي مو حرام

الحرام في طريقة تنفيذه

لو كان عندنا نوادي للتفحيط مثل الكويت كان ما عليه كلام من ناحية الشرع

مثله مثل اي رياضه


ثانياً :-

والله من زين الاماكن اللي نروح لها في الرياض

اما دوراً بالشوراع ولا على النت 24 ساعه ولا ان طالت الثمامه يا سنايدي

يعني بدال ما يكون التفحيط عشوائي ليش ما يكون فيه نوادي لها


والله فيه شباب من المملكه لو تمت رعايتهم وتطوير مستواهم ليخلون مايكل شوماخر الاخير .

ومن يقول لي ان التفحيط :

فيه قتل النفس .. الموت وكفى به ضرراً
فيه تعدي على الآخرين .. بإتلاف أرواحهم .. وتحطيم أبدانهم .. وترويعهم في طرقاتهم
فيه الخسائر المادية في الممتلكات العامة والخاصة بسبب الحوادث الناتجة عن التفحيط .
أن في التفحيط مفتاح لجرائم متعددة .. من سرقات .. وأخلاقيات .. ومسكرات ومخدرات .

ارد عليه اذا كان التفحيط عشوائي بدون تظيم يسبب كل هالكلام



والله العظيم وزارة الداخليه متعبه نفسها

بما اني خبير بالتفحيط اقول والله ما يقدرون يوقفون التفحيط
اول شي الرياض 60كيلو في 60 كيلو
وكل يوم شارع جديد

كل ما حصلنا شارع جابوا دوريه تسنتر فيه ويحسبون انه حل

اذا انا مره سمعت عن تفحيط بيصير في الشرقيه بعد ساعه وانا بالرياض

يعني الشغل منظم وفيه جوال مثل جوال الزعيم دق عليه واخذ اخبار التفحيط ووين الطبه الليله وانحاشوا الحكومه جايتكم


بعدين العسكر المساكين اخذ استهبال عليهم ورجم بالحصا

اذكر مره كنت رايح لتفحيط واشوف لي دوريه واقفه قلت خلني بشوف اذا يدرون ان فيه تفحيط ولا لا

وقفت عنده قلت له يا الحبيب فيه تفحيط قدام رد علي بنفس شينه قال داري

قلت وليش ما تروح لمه

قال جاني تعميم بس وش اسوي لحالي خلهم في حريقه


رسالتي للظباط الكبار في السن

كيف تقدرون توصلون للشباب وانتوا باقين على تفكيركم

اللي يفحط داشر اللي يطلع بعد الـساعه 12 داشر


يقول لي واحد من العيال انه كان مره يمشي في حي النسيم على رجوله ومعاه (( راوخ )) هذا مشروب غازي مثل الفرز واذا تبونه تحصلونه في البقالات الكبيره بـ 2.5 المهم قفت جنبه دورية الحرس الوطني وبدوا ضرب فيه وركبوه في الجيب ومسكوا العلبه وقعدو يشمونها يحسبونها ... (( عصير برتقال )) حاول يفهمهم ما قدر وهم ماشين قالهم وقفوا عند البقاله بدلكم على اللي يبيعها لي ووقفوا ونادو العامل وقل له خويي جيب راوخ وراح الهندي وجابه بعدها الحريسان نزلوه بعد ما صارت وجيههم بالارض

يعني بالله هذا رجل امن ؟؟؟


نعود لمحور حديثنا

يا وزارة الداخليه العلاج لا يكون بالقرارات الصارمه ليش ما تحاولون تكسبون قلوب الشباب وتظبطون رياضة التفحيط وتجدون الحل الامثل بدال سجن وغرامه وما ادري ايش بعد

شوفوا لنا حل يرضينا ويرضيكم



وهذا الموضوع بين يديكم

س/هل عقوبات المرور بتحد من التفحيط ولا بتزيده

انا اقول بتزيده
لكم حرية الراي

وااسف على الاطاله والكلام الغير منظم

لان الموضوع من قلبي نازل فريش

اخيراً

اشكر كل من سئل عني

ترا ماهو زعل ولا تغلي

بس رحله مكوكيه لمدة اسبوع وبعدها الاختبارات

في حفظ الله