--------------------------------------------------------------------------------

دق جرس جوالي وناظرت الشاشه قبل أرد علشان أشوف من اللي يتصل الا هذا أسم عادل .. وعادل هذا نصراوي موت وفي نفس الوقت صديق عزيز ومقرب لقلبي جدا جدا رديت عليه وبدون تردد : السلام عليكم .
وما أمداني أكمل سلامي الا وهو صايح بأعلى صوته مبرووووووك .. شوي الا ويفجر أذني
قلت له طيب رد السلام

قال بصوت أعلى من اللي من شوي أقول لك مبرووووووووووووك .

قلت على أيش طيب .

قال قل الله يبارك فيك .

قلت وش المناسبه

قال يعني ما تدري

قلت واللي خلقك ما ادري عن شئ
عندها أطلق ضحكه هستيريه قويه سمعها ولد جيرانا

قلت الحمد لله رب العالمين .. الظاهر أنك منتب صويحي

قال أنا اللي منيب صويحي والا انت

قلت أنت اليوم منتب طبيعي .. وش انت شارب ( لحيه )

قال الله يالدنيا معقوله يا ( .... ) ما تدري وش سبب المباركه

قلت حلفت لك والله مدري

قال الا والله انك تدري بس تغيشم

قلت عادل

قال نعم يا ( .... )

قلت ترى راح خمس دقايق من الجوال ما فهمت منك شئ

قال أنا اللي مكلم مهوب انت يعني الفاتوره علي

قلت أنا أحب لك مثل ما أحب لنفسي ولا أرضى لك الخساير

قال برضه بقول لك مبرووووووووك

قلت عادل

قال يا عيون عادل

قلت ممكن تختصر لاني مشغول شوي

قال انت أصلاً متى فضيت دايم مشغول

قلت وش قصدك

قال قصدي أنك دايم مشغول بمتابعة ساميكم

قلت سامينا ؟؟

قال ايه ساميكم

قلت آآآآآآآآآآه هالحين عرفت سبب خبالك اللي من شوي وسبب تبريكاتك تقصد هاتريك سامي

قال يعجبني فيك ذكائك

قلت وانت بعد ياعادل مبروووووووووووك ( صرخت بأذنه بقووووه ) .. وحده بوحده

قال وانا وش دخلني بالموضوع يوم تبارك لي .

قلت أفا ياذا العلم

قال فعلا أنا وش دخلي

قلت أجل أنت باركت لي على أي اساس مهوب على أساس أن الأهداف وطنيه وباسم المنتخب

قال لا

قلت أجل ايش

قال انا أبارك لك لأنكم يالهلاليين ما تشوفون الا سامي وبس ولا همكم المنتخب

قلت هالحين انت وش مزعلك

قال اللي مزعلني أن سامي سجل

قلت شفت وشلون طلعت حقيقة من هو اللي ماهمه المنتخب

قال تبي الصراحه

قلت أكيد ابيها

قال والله مدام سامي بالمنتخب ودي أنهم ينهزمووون

قلت ليه طيب

قال أنا حر

قلت هل الحريه في نظرك أنك تكره منتخب وطنك

قال نعم نعم نعم

قلت وين الانتماء

قال مات ودفنته

قلت وش السبب طيب ؟؟؟

قال مهوب سبب واحد

قلت طيب وش الاسباب

قال يكفي ساميكم

قلت أبا أنزل مستوى تفكيري لمستوى تفكيرك واناقش هالسبب

قال ما يحتاج مناقشه

قلت ليه

قال أنا ما احب سامي وبس

قلت وهل حب لاعب أو كره آخر يسمح لك بأن تتمنى هزيمة منتخب وطنك

قال نعم

قلت الوطنيه عندك ليست ناقصه بل تكاد تكون معدومه

قال أووووه يا ( .... ) ياشينك اذا بديت تفلسف

قلت هل حبي لمنتخب وطني تسميه فلسفه

قال نعم فلسفه وبقوه في ضل وجود سامي حقك

قلت الظاهر أنك متأثر جدا بهاتريك أمس اجل .

قال والله تمنيت هزيمة المنتخب بخمسه بس ما يجيب سامي ولا هدف

قلت أنت مشغول هالحين ؟؟

قال لا منيب مشغول بس ليه.

قلت باخذك وأعرضك على طبيب

قال هههههه طبيب نفسي ؟؟؟

قلت لا والله مهوب طبيب نفسي .. انا بعرضك على طبيب مخ واعصاب علشان يغسل مخك من هالترسبات البليده واللي معشعشه داخلك ومن ثم غيرت مستوى وطريقة تفكيرك

قال أووووووووه رجعنا للفلسفه مره ثانيه.

قلت انا ما اتفلسف انا أصور حالتك واعريها أمامك لكي تشاهد بنفسك ما وصل أليه عقلك الخاوي

قال ههههههههههه والله يحق لك تتفلسف وتستعرض عضلاتك مدام سامي هاتريك

قلت عندك اسباب ثانيه لعدم ولائك لمنتخب وطنك

قال أووه عد وأغلط

قلت مثل أيش ؟؟

قال أعتزال ماجد

قلت وش دخل هاذي بالوطنيه ؟؟

قال أنا بعد ماجد لايمكن أقتنع بأي أحد يحمل رقمه ويحتل موقعه
قلت بس بس بس وقف عندك .. قل من أول ياخي ولا تعذبني معك يعني أنت مقهور من سامي علشان كذا .

قال هذا سبب من الاسباب

قلت ليه ورقم ( 9 ) ملك لماجدكم

قال صراحه نعم .

قلت ياقوي وجهك والله انك من جد منتب صويحي يعني تبي ماجد يلبس الرقم مدى الحياه (( ودي أشوف شكل ماجد وهو لابس رقم تسعه وماسك سرا عن تميس ))

قال لا .. بس على الاقل يحجبونه يوم أعتزل
قلت أولا ماجد حقك هذا ما أعتزل عن المنتخب بل عُزل وأُبعد

قال ياشيخ .. أحلف بقوه !!

قلت نعم وعندي الأدله والبراهين ويكون بعلمك كأس العالم بأمريكا 94 لعب ماجدك على الواقف وتاهلنا لدور الستة عشر بالرغم من أن المنتخب كان يلعب ناقص على أعتبار ان ماجد كان مثل التمثال
قال أسكت بس لا يسمعك احد ويضحك عليك

قلت ليه يضحك علي هالواحد اللي بيسمعني وش انا قايل لاسمح الله أنا قلت كلمة حق ماقلت نكته

قال نسيت وش سوى ابو عبد الله .

قلت وش سوى تكفى الله يرحم حالك وحاله.. لايكون سجل هاتريك في هولندا وحنا ماندري بعد

قال تتطنز انت ووجهك

قلت لا والله ما اتطنز بس نورني الله ينور عليك

قال نسيت الكبري اللي جابه على مدافع هولندا ( كويمن ) .

. يوم سمعت هالجمله قفلت الجوال بوجهه لكن أقسم بالله ضحكت ضحك بغيت أموت واخوي طلع لغرفتي يحسبني أنهبلت ما درى أخوي أن المهبول هوصديقي النصراوي اللي أنا قاعدأضحك عليه وعلى كلامه .

وسلامتكم