السلام عليكم ورحمة الله وبركاته

مساكم /صبحكم الله بالخير شباب وبنات

تراني ماعرف للمقدمات وذا الخرابيط نسلم همن ندخل بالموضوع تلقائيا<<<لاحظوا تلقائيا

الزبده اننا مره من المرات<<< وده يقول مرة من المراريت بس انها قديمة


الزبدة سافرنا سافرنا للقصيم


عارف بيجيني واحد ملقوف وبيقولي وين رحت بالقصيم؟ وبقوله رحت لم رياض الخبراء :p

وعارف بيجي واحد ثاني ملقوف وبيقولي وين رحت برياض الخبراء عند خوالك ولا عمانك؟


وبقوله رحت لم خوالي يابثرررر ياقرمبع


الزبده من الحكي اني كنت تاكي<<<كنت تاكي ولا هرفي <<اطلع برااااااااااا

الزبدة كنت جالس بلحالي احتري عيال خوالي السرابيت يجون


وكنت جالس في القهوه حقت خوالي<<<< لحد يفهم غلط ترا خوالي يسمون الملحق قهوه


على طاري القهوه ذي مره واحد من الشباب دق علي قالي وينك يابو الشباب


قلتله والله قاعد في القهوه مع جدي قال اخسسسسسسس جدك يعسل


قلتله لا وازودك من الشعر بيت يحشش بعد


عاد في الاخير فهمته ان خوالي يسمون الملحق قهوه:p
^
^
تبهييييير

المهم وانا قاعد في القهوه وبهدووووء تام وبسعة صدر وانواع الهواجيس


الا ويجيني ذاك الجيش اللي عددهم حوالي 77 دولار واحد ماشاء الله


الجيش هذا مزود بأشد اسلحة الازعاج والبثارة والحوسه


طبعا الاسلحه هذي من نوع طراطيع وصواريخ وكور ....الخ


وقاموا يطرطعون ويلعبون ويحوسون فوق راسي


وانا صار وجهي كذا من الزعاج والقرف


طبعا الجيش هذا هم بزارين خوالي كلهم اعمارهم تقريبا ماتعدوا العشر سنوات


طبعا صعبه اني امسكهم واكوفنهم واسطرهم كلهم واطردهم من القهوه


قلت ياولد ليه ما اجمعهم واقعد اقصلهم قصص


المهم اني جمعتهم كلهم وقصيت لهم قصة ام العنزين


وقصه ام العنزين هذي مأخوذه من الادب القصمنجي القديم


ابقصها لكم بأختصار واللي يبيها كامله يراجع اقرب عجوز قصمنجيه تقولها له


القصه تقول: (ام العنزين جابت تيسين واحد حسن وواحد حسين قالتلهم امهم بأروح لم البقاله وانتبهوا تفتحون لاي احد


المهم ان العنز طلعت وبعد ماطلعت طق واحد الباب طبعا التيوس ماسمعوا كلام امهم وفتحوا الباب ويوم فتحوا


بيشوفون من اللي يطق طلع الذيب ومسكهم اثنينهم وزرفهم وانحاش من البيت


ويوم رجعت الام من البقالة ومالقت عيالها عرفت ان الذيب اخذ عيالها عاد طلعت ولحقت الذيب ودبجته ورجعت عيالها )


هذي هي القصه بأختصار ولا هي فيها اكشن كثير وحماس


وطبعا البزران وانا اقولهم القصه انوااااع الحماس والانسجام احس انهم عقب ذا القصه ودهم يصيرون غنم



اللي بغيت اوصله لكم ترا الطق والتدبيج ماينفع مع البزران


اذا ازعجوك وسوولك قلق العب عليهم بكم قصة وياحبذا يكون في القصه مضاربات


وراح تستفيد من ناحيتين


الفايده الاولى انك خليت البزران يسكتون


والفايدة الثانيه انهم بيحبونك لانك عطيتهم وجه وقعدت تسولف معهم ;)


ولاتفوتكم سواليف البزران تراها بعض المرات احسن من سواليف الكبار بمية مره


في الختام احب اقولكم تراني كاتب ذا القصة بمنتدى ثاني بعد لحد يقولي لاطشها

عموما اسف اذا كان في القصة اخطاء املائية او سوء تنسيق


واتمنى ان القصه تحوز على رضاكم ولكم خالص تحياتي....