مشكور اخوي الرهـــيـــب على هالموضوع ..

1 - أنا معاك تماماً في مسألة عدم لعب المباريات التجريبية وأضيف على كلامك .. أعتقد ان الجوهر كان خايف يلعب أمام الارجنتين أو ما يبي يكشف نقاط الضعف للألمان لأن الارجنتين مؤكد كانت تبي تكشف المنتخب السعودي وبصراحة كان متوقع تسوي فيهم زي ما سوت ألمانيا .. والجوهر غلطان مائة بالمائة من هالناحية كان من الأفضل ناكل ثمانية في مباراة ودَية بدل ما ناكلها في كاس العالم ..

2 - أولاً الشلهوب غير مناسب إطلاقاً أمام الألمان ( انت شفت أجسامهم بالنسبة للسليمان موب الشلهوب ؟ .. ثانياً صحيح نواف أفضل في اليمين لكن بصراحة نواف قدم أسوأ مستوياته وكان ممكن يقدم أفضل من كذا بكثير لو فكر بخدمة الفريق أكثر من إنه يحاول إظهار لمحات فنَية استعراضية .. وربَما لأن خطة الجوهر كانت فاشلة ومكشوفة كالكتاب المفتوح أمام فولر ولاعبيه .. ربما لهالسبب ظهر نواف وغيره بهالصورة المتهالكة .. أقول ربما ..
3 - اسمحلي أعارضك تماماً بالنسبة لسامي .. وماهو لأني هلالي أو معجب بسامي أقول هالكلام وأتمنى تصدقني .. سامي لعب معظم فترات المباراة في خط الوسط رغماً عنه .. لكن سامي في الهجوم ما وصلته أي كورة وبيني وبينك شريط المباراة .. ورغم سوء مستوى سامي في المباراة الا أنه أفضل من بقيَة اللاعبين بمراحل وهو الوحيد اللي تحس انه لاعب كورة في المنتخب مع الأسف صنع بعض الهجمات ( اللي لليامي وشاتها في الساعة , واللي للخثران وشاتها برَا ) . وتسبب بأربع فاولات ( من أصل عشرة للمنتخب ) وأخذ لاعبين من ألمانيا كروت صفر بسببه .. يعني فيه أشياء تنحسب له .. لكن البقية مافيه ولا شي ..
4 - بالنسبة لخليل .. المشكلة ماهي عدم وجود خليل .. المشكلة في تكر اللي ماهو معقول أبداً وهو أحد أهم أسباب الفضيحة .. خليل أو الشريدة أو الداوود أو حتى محسن الحارثي كانوا بيلعبون أفضل منَه .. لاعب فريق درجة أولى ( أحد ) وما سبق وشارك المنتخب لا في التصفيات ولا حتى بدورة الخليج وتلعبه في كاس عالم وأمام ألمانيا !!!! هذا تكر بصراحة سقطة كبرى للجوهر .. ( حتى تراه فالاصل ظهير أيسر للي ما يدري .. لكن الجوهر الله يسامحه !! ) ..

5 - هالنقطة أهمَ أسباب الهزيمة على الاطلاق .. وأشكرك على ذكرها ولو انك ما تطرقت لأسبابها .. استهانة اللاعبين جميعهم ومعهم الجوهر وإدارة المنتخب .. ويمكن حتى الجميع من جماهير وسعوديين وأنا منهم سببها خدعة ألمانية مرسومة وطويلة المدى .. بعد إعلان قرعة كأس العالم قبل عدة أشهر أعلن الالمان ارتياحهم واستهانتهم بالمنتخب السعودي في البداية لكن تداركوا أنفسهم وبدأوا يثنون على السعودية ولاعبينها وينفخون فيهم واحد واحد وبالأسامي .. وفي نفس الوقت يحاولوان إيهامنا والعالم ان فريقهم في أسوأ حالاته .. ونجحت مخططاتهم تماماً لدرجة انك لو سألت أي واحد محب للمنتخب ومتحمس له تجده متفائل تماماً وصافط المانيا في جيبه .. بس مشكلته وشلون يلحقهم الكاميرون .. بينما هم ( الألمان ) درسوا المنتخب ولاعبينه بشكل كامل وتام وتابعوا لاعبينه واحد واحد ( ياخي واضح في المباراة عارفين اللاعبين وعارفين أدق عيوبهم .. سامي مراقبينه ويحدون من خطورته بالفاولات ولا يعطونه فرصة ولا يباصي .. وعازلينه عن اللي حوله .. ونواف يتجمع عليه ثلاثة لأنهم عارفين انه يبي يسوي شي قبل ما تطلع الكورة من رجله .. والدوخي مركزين على خانته لأنهم عارفين ومتوقعين انه بيهاجم ويعطونه مساحات علشان يتقدم بعدين يمشون الكورة بسرعة في خانته الفاضية .. وعبد الغني عارفين انه بأسوأ حالاته من بعد الاصابة ولذلك يمرَون من عنده كثير كأنهم عارفين انه عاجز عن تخليص الكورة .. والكلام ينطبق على كل اللاعبين وعلى خطط الجوهر المكشوفة كلها بالنسبة لهم ) بعدين فولر قايلها ما يبي مفاجأآت ودارس الفريق السعودي من كل الجوانب الصغيرة والكبيرة .. وفي نفس الوقت تخدير ( وهذي سياسة قمَة في الخبث .. فريق جديد على العالميَة خدره ونم همه ) ..

أما فيما يجب على الجوهر فأنا أايدك تماماً ولا أزيد على كلامك ..

أما كيف نفوز على الكاميرون فأخالفك في بعض ما قلته .. لكن أحس اني طولتها ولذلك أكتفي بما قلت ..
وأعذرني على الإطالة ..
وتسلملي ..