مشاهدة مشاركة بصفحة مستقلة
  #1  
قديم 09/11/2006, 01:29 AM
هلالي الظهران هلالي الظهران غير متواجد حالياً
زعيــم مميــز
تاريخ التسجيل: 18/03/2005
المكان: سّــــــــــــــــــــواح
مشاركات: 2,772
انـــا وأبــــله سعـــاد والحـــظ الـــردي!!



يا أمة الله اذا سألوك ..
وهل تقبلين بزوج يلبس نظارات؟؟!!
اقول تلايطي ولايكثر !!يعني من جدكم تشرطون هو فيه رجال علشان تقولون يلبس نظارات او لا؟!
العوض ولاالقطيعه ولايكثر واحمدوا ربكم و اول واحد يطق الباب قولي موافقه وماجاكم علي ..

يا عبد الله اذا سألوك..
وهل تقبل ان تتزوج امرأه لاتعرف عنها شيء؟؟!!
اقول لا تكثر بربستك!! يعني تبي تقنعني انك بتتزوج وحده تعرفها !
الله يطول باعمار اميماتكم وادعوا ان الله يبارك وتطلع المره نقوه زينه ..




تمهيد ..



ختاما وقبل سرد التفاصيل اتمنى اتباع الاتي للاستمتاع بالقصه لاخر وهله ..

1- حاول تصرف اي واحد جالس جنبك وفي حالة كان اللي جنبك اكبر منك اغلق النافذه حالا ..

2- يمنع تناول المأكولات والمشروبات منعا باتا .. كما ان التدخين مسموح بجميع انواعه وحبذا لو كانت الغرفه مقفله حتى تعجعج زين ..

3- حاول ان تبتعد عن الشاشه قدر الامكان وفي حالة الطوارئ ستسقط عليكم اكياس الاوكسجين اجحدوها ولا تخافون حتى لو انكتمتوا عادي مافيه طلعه الين تكملوا القصه

4- نتمنى لكم اسعد الاوقات برعاية بسكوت ابو ولد فخر الصناعه اليمنيه ..

5- مافي شي بس تلايط انت وياها خلاص بنبدأ ..




نبذه سريعه..



اخوكم ابو لمخه .. شاب عشريني العمر .. توني خارج من فترة مراهقه .. وكأي شاب توه طالع من تلك الفتره وتشوهاتها ..الخشم منتفخ على مصرعية تقل شكامين همر و حبوب الشباب لاعبة في الوجة صح والجسم ما تدري وش يبي ! اليد اليمنى اطول من اليسرا والركب كلها جايه يمين!!

ابو لمخه انسان خجول وحياوي وفي حاله عايش .. حياته مقضيها بين الكليه والبيت والاستراحه ..

في الكليه .. ابو لمخه ماشي في حال سبيله لايعرف شلل ولا قروبات ومعروف بالكليه باسم الوحش لانه مشعر بطريقه عجيبه تخليه يطق لسيد زيان باصبع ..

في البيت .. حياته هادئه جدا مع اسرته الصغيره المكونه من ابوه مدرس الرياضيات وأمه مدرسة العلوم واخته الصغيره ..

ابو لمخه جديد على الاستراحه ومازال في طور تلقي اصول البلوت وحركات الشباب .. في الاستراحه ماينادونه الا العجل لانه كلما جاء الا ستراحه يقعد على المركى ويقول اناعجل ودايم هو آخر من يمشي ..




حــــــياة الشـــــــــــقا..



كعادة خويكم ابو لمخه تعشى مع اهله وطلع لاخوياه بالاستراحه ..

دخل ابو لمخه الاستراحه والشباب ملتفين حول ناصر وهو يسولف..

ناصر.. تصدقون ياشباب اليوم الهيئه بغت تقفطني وانا مطلع خويتي بس ربك ستر وانحشت منهم..

خالد يقاطعه .. بلاك غشيم والا احد يدور مع خويته بالسياره شوفني انا ازبن في ملحق بيتنا ولا احد درى ..

ويدخل معه راشد ..تصدقون شباب انا مره واقف عند الصراف يوم صرفت وجيت امشي..اللين ذيك البنت اللي عليها عبايه فراشه ومخصره جايه تمشي من بعيد ومسرعه قلت وشفي ذا البنت؟

يمكنها توها شارية ذا العبايه وتجربها ..ومادريت الا وهي فاتحة باب سيارتي وراكبه ..

المهم يوم توني ماشي بالسياره يوم طلعت ذاك المسدس وقالت اطلع للبر ..قلت نعم !1قالت البر

المهم طلعتها للبر في مكان مافيه الا انا وهي والمسدس بينا ..وكنت توي شاري جوال n73 جديد.. المهم قالت لي فصخ ملابسك!!. قلت اكيد ناويه تسرقين الجوال ..


ويدخل عليهم ياسر بسالفه ثانيه وخويكم ابو لمخه يسمع سوالف الشباب ولاهي بعالم ثاااااااني وكل من قال سالفه يقول ياحظك والله ..

رجعت البيت ودخلت غرفتي وانا بس افكر بكلام الشباب والعن بحظي الردي اللي ماخلاني اعرف ولا بنت .. قمت افكر بالمنتدى واتحسف انا اللي ذابح نفسي تميلح عند البنات ومافي الخاص إلا رسالة واحدة من بنت ..


وما صدقت يوم شفتها ..بغى يغمى علي .. وبدون تفكير فتحت الرساله …تقول البنت في الرسالة :

" ياملحك وياملح سواليفك … يابخت الي بتاخذك … والله اني ما استانس الا اذا شفت موضوع لك … وبصراحه انا ودي اشوف صورتك احس انك رومانسي وحبوب وو...و ما اقول الا ياحبي لك وبس "


قريت الرسالة وانا ابتشقق وتسندت على الكرسي وقعدت اتخيل انا اصيح وينك يابعد عمري ارجوك تعالي ارجوك ردي علي بسرعه بسرعه ماعاد اتحمل انا احبك بعد ..


وبعد ماعشت هالحلم الرومانسي الجميل … قلت يابوكمخه كمل الرساله يمكن تلقاها مرسله رقمها ولا ايميلها!!


وياليتني ما كملت الرساله ياليتني مت وانا اعيش حلمي الجميل..شوفوا تكملة رسالة بنت الذين ..


" انتظر ردك بفارغ الصبر حبيبي ابو ساره "



آآآآه يابو كمخه انت وحظك الردي .. بس خلاص من بكره يابو كمخه تطلع الراشد وبترقم بالطيب ولا بالغصب ..


ومن بكره قمت وتكشخت على سنقة عشره ..ودخلت السوق يوم دخلت الين ذيك البنت الي تشق شق الجبهة قاعدة في مدخل السوق جسم وعيون مكحله ناعسه .. عاد هذي النوعيه ماتلقاها دايم هي حبه وحده تجي في كل كرتون ..

وكان قريب من عند البنت صندوق تبرعات .. قلت زين يابوكمخه توك مستلم المكافأه خل أكشخ عندها .. وطلعت ذيك ام لون موفي وحطيتها في الصندوق وهي تناظرني ومستغربة !!

الظاهر اول مره في حياتها تشوف ولد نعمه … بس الوضع صار غير طبيعي البنت قامت تضحك بصوت عالي ..والناس الي جنبها قامو يضحكون واناظر وش السالفة وش صاير … يوم ناظرت الا وانا حاط الخمسمية في صندوق مسابقات ..



طلعت من السوق بسرعه وانا متفشل ومطنقر على الاخر .. اول مانزلت من السوق الا وذيك البنت تناديني!!
التفت عليها واِشرتلي! والشباب اللي حولي يناظروني بحقد ليه هو بالذات؟! وانا اضحك في نفسي واخيرا ضبطت معك يابو لمخه ..

ويوم قربت من البنت .. قالت اسفه انا غلطانه كنت احسبك السواق ..



ضحكوا علي الشباب وطقتني البكوه وانا ناصي سيارتي والا اشوف ذيك المره اللي عمرها هه بين الخمس واربعين هه والخمس والاربعين وواقفه بالشارع وسياره رايحه باتجاها .. وتنغزني النخوه وانقز لها بانقذها وادفها بعيد عن السياره .. لكن ما امداني ادفها الا والسياره خابطتني ..


اخر شي اذكره صدام الكابريس موديل 79 ومع الصدمه طار الباقي .. صحيت والناس حولي يصفقوني ويتكلمون عند راسي اللي يقول هذا مات واللي يقول يحتضر.. فتحت عيني ولقيت امم كانهم ماقد شافوا سوبرمان وهو ينقذ البنات
..
ولقيت المره اللي دفيتها تضغط على صدري وتسويلي تنفس اصطناعي وتسمي علي .. وصراحه حسيت بحنان اول مره احسه بحياتي وطقيتها بكوه ..واصرت هالمره الا تاخذني المستشفى مع سواقها تطمن علي .. ماقصرت والله دخلتني الطوارئ واخذت معلوماتي علشان تطمن علي ..




حيــــاة الهـــــنا



جلست في المستشفى يومين وطلعت بصحه وعافيه تامه ولله الحمد..لكن فيه تغير في حياتي اني بديت احب ..

حبي الجديد كانت اللي انقذتني من الموت اللي ضحيت بروحي علشانها وطلعت هي اللي موقفه قدام السياره علشان تركب مع سايقها وانا اللي احسبها بتصدمها السياره وهان علي اموت معها ولا تموت قدامي..


عشت حياة ميب طبيعيه .. لا من جد حياة مختلفه صرت اروح عند البحر واتهيض وانا اسمع الحريبي وهو يقول.."جبتها على الجرح وكنك مادريت ..." وفي احد تهيضاتي دق الجوال..

قلت الوووو بصوت ناااعم (تاثير الاغنيه ) ..وقفل الخط بوجهي ..واتصل مره ثانيه .. ورديت باقل نعومه من المره الاولى ..

جاء الصوت من سماعة الهاتف (لاياشيخ ) ..قال(ت) من معي؟!

قلت انت اللي متصل ياحمار ..

ضحكت ضحكه ينقصها الدلع (طلعت بنيه )..ضحكت معها شوي وقلت من انتي وايش تبين؟!

قالت خليني احزر من انت من صوتك واسلوبك(ابو الذكاء ) ..

انت ابو لمخه .. هنا ضحكت بعنف وبصوت عالي (خلاص تعرفني ولازم ابين اني رجال )..

رجعت وقالت ابو لمخه ماعرفتيني؟!

قلت تصدقين يوم قلت انك حمار تحسفت بس الحين اكيد انتي بغله شلون اعرفك من صوتك وانا ما اشوفك ..

قالت .. انا ابله سعاد .. اللي شلتك للمستشفى ..

قلت .. اهاااااا انتي اللي انقذتك من قدام السياره (<<مازال مقتنع انه هو اللي انقذها ) ..


تصدقين توني افكر فيك واتذكر الموقف واتخيلك .. تعرفين اني حسيت بحنان عمري ماحسيته وانتي تنقذيني .. ماتتخيلين وش كثر حبيتك .. تعرفين اني كنت اسمع بالحب لكن الحين عرفت طعمه ..
سعاد انتي اللي قلبي حبها واختارك .. سعاد انا كلي لك .. سع....


بس يابو لمخه كافي .. قطعت قلبي .. ما اقدر اتحمل هالكلام اللي عمري ماسمعته زيه .. ابو لمخه وانا بعد من هذاك اليوم وانا معجبه في شجاعتك وفي وسامتك .. ابو لمخه ممكن تسمع هالاهداء..


كذاا من ربي حبيته
بسرعه يوم لاقيته
حبيبي اللي تمنيته
اخيرا صار محبوبي


ابو لمخه : ابله سعاد ..

ابله سعاد: لاعاد تقول ابله ناديني باسمي ..

ابو لمخه: سعاد .. انا احبك ..
.
.
.
(مافي رد .. الظاهر انها فطست ) ..


استمرت العلاقه بيني انا ابو لمخه وبين الابله سعاد .. وكبر حبنا مع الايام وتعلقنا في بعض اكثر ..


ابو لمخه: حبيتي انتي عمرك خمس واربعين سنه ليه ماتزوجتي؟

ابله سعاد: اييييييييه ياقليبي .. تقدمولي واجد لكن كل مره كنت ارفض لسبب .. مره اقول هذا شكله يبي راتبي ومره اقول هذا شكله ماعجبني ومره اقول انا مدرسه وكلن يبيني وارفض واحيانا اقول هذا مدخن وهذا يلبس نظارات اليين فاتني الئطر (لاتدققون امها مصريه )..

ابو لمخه: احسن ياعمري لو مارفضتيهم كان ماعرفتك .. سعسوعتي .. وش تتمنين؟

ابله سعاد: كنت اتمنى ياخذني واحد جيزاني!! والله الوناسه وسعة الصدر كان ما ادوام ابد بتصير حياتي كلها اجازة امومه ..


بس الحين مابيك الا انت لموختي.. طيب انت وش رايك بالمرأه؟

ابو لمخه: بصراحه المرأه عندي كالجزمه في بستان مليء بالشوك..فالجزمه تجعلك تتجاهل وجود الشوك (<< ابو اللي يسألك مرتن ثانيه )..
المرأه هي نصف المجتمع هي امي واختي وزوجتي والمرأه يجب ان تختار صديقاتها جيدا علشان مايخربونها وعلشان سمعتها ترا البنت مالها الا سمعتها وبدون سمعتها والله ماحد يتقدملها (ويقولون مااعرف اعبر ;) )..



دارت الايام واستمرت علاقتنا..وصرت اقولها مره بطني يعورني ومره ضرسي يالمني ومره خدي.. وهي تققولي روح للدكتور!!

وانا اقولها انتي ماتفهمين! قلت طيب قولي انتي بطني يعورني !

قالت.. لا انا بطني مايعورني..

قلت.. انتي قولي بس ومايصير لك شي..

قالت.. لا الفال شين ويجي مع الطاري ..

جلست اقنع فيها اسبوعين بدون فايده .. الين جاء ذاك اليوم وقالت بطني يعورني وهو صدق يعورها ..

قلت..اموووووووووووووووووووووووه على بطنك على شان يطيب ..

قالت هذي وشي!! قلت بوسه!

قامت سفلت فيني وقالت هذي اخرتها ياقليل الحيا تقول لي كلام وصخ وقفلت بوجهه وقاطعتني اسبوعين..


بعد اسبوعين دقت علي وقالت.. قلبي ماطاوعني ابعد عنك..

وانا اقول.. سامحيني والله ما اعودها وما عاد اقول كلام وصخ ..

قالت.. احلف انك تتوب قل قسم ..

وانا اطق ذيك الايمان واتوسلها تسامحني وقلتلها..ما عاد اقوى على فراقك خلاص اليوم العصر امي بتجي تخطبك!!

وهي اللي تتقطع من الفرحه وتقول .. خلاص سامحتك وانا بانتظرك انت وخالتي ( مسرع يا المشفوحه )..



ابو لمخه : يمه انا خلاص قررت ابي اخطب وأتزوج ..

امي: الساعه المباركه ياولدي.. تبيني ادور لك؟!

ابو لمخه: لا يمه .. انا خلاص حطيت عيني على البنت وهي مدرسه ..

ام ابو لمخه: ماشاء الله مدرسه(ايه متعصبين لبعضهم المدرسات ) .. اجل زين مااخترت..

ابو لمخه: خلاص يمه عقب صلاة العصر بنمر انا وياك نشوف البنت واذا اعجبتك نخطبها..

ام ابو لمخه: زين ياولدي..


ومن عقب صلاة العصر تسنع خويكم ابو لمخه على سنقة عشره وازعج امه الين جهزت ورواحوا يخطبون ابله سعاد اللي تجهزت من عقب صلاة الظهر للزياره ..

دخلوا ابو لمخه وامه للمقلط بانتظار دخول العروس ..

ابله سعاد وبعد عدة محاولات دخلت الغرفه وبيدها العصير ..


وفجأه ..


جات عينها بعين ام ابو لمخه ويطيح من يدها تبسي العصير !!

أم ابو لمخه وبعد صراااخ وسب وتهزيء قالت .. مابقى الا هي ولدي يتزوج مديرة المدرسه اللي ادرس فيها ..




مايستفاد من القصه ..


1- يابنات تلاحقوا على اعماركم ولا تشرطون واجد وحتى لو طلع اللي تقدم مامعه الا رابع ابتدائي وافقوا تراه ازين من العنوسه ..


2- ياشباب ارفقوا على نفسكم يعني مو بلازم تصير لك خويه .. وارفقوا على اهاليكم بعد مايكفي انك تبيهم يدخلونك مدرسه اهليه ويطلعلون لك سياره وفوق هذا تبيهم يزوجونك ..


3- ليه كأس العالم مايصير كل سنتين!!


4- هالقصه كلها من بنات افكاري يعني لاحد ينضرب بمخه ويصدق وتتشوه السمعه عقبها تروا اهم شي السمعه بعدين محد يزوجني ..
اضافة رد مع اقتباس