رجعت لكم بعد انقطاع دام أربع أيام تعرفون لازم الواحد يروح مكة وياخذ عمرة
برمضان وأبشركم هاذي أول مرة أسافر فيها مكة ولا أسوي فيها مشكلة مع أحد يالله لك الحمد والشكر

على العموم ما أبي أروح بعيد نرجع لموضوعنا والي وعدتكم أقولكم قصة المدرس الي بلع طبشورة

ومثل ما تعرفون ويعرف الجميع هذولي طلاب الشرعي ثلاث أرباع الفصل ورا بالزاوية وبأواخر الفصل
فحنا جالسين ورا سواليف والمدرس قاعد يكتب على السبورة طبعا عادي هذا المدرس مدرس نفس
يعني نفسية يكتب لنفسه ويشرح لنفسه وحنا قاعدين نسولف وهو يكتب ما درينا إلا التفت ورمى طبشورة
على مين ؟؟ رماها علي أنا زعيم الصف الخلفي والزوايا في فصول الشرعي وياليتها مارماها لأني أنتفضت وقمت أبي أتوطأ بطنه لكن خويي الي مهب
رفيق سوء أبد قالي أقعد ما عليك خنا ناخذ حقك منه اجلس ولا تشيل هم هد اللعب أنت بس عاد أنا قلت
للإستاذ تراي تعبان ومالي نفس أتناقش معك وهو من النوع الي إذا فتح فمه ما صكره لين تخلص الحصة
بس عادي مدرس نفس ما أحد يشره عليه ..

رجعنا من جديد للسواليف وهو يكتب قالي خويي رح جب طباشير من غرفة الوكيل وأنا أكمل الباقي
عاد أنا إذا صرت زعلان ما أحد يكلمني قمت ومن دون استئذان فتحت الباب وطلعت والمدرس طارت عيونه
عاد هو ماله نفس يكلمني وأرجع أرد عليه لأنه يعرفني ملسون ما أفكه أبد ..
المهم خلاني أروح وجبت تقريبا عشر طباشير ، ولما جيت أدخل قالي ليه تطلع من دون استئذان قلتله
يابن الحلال مضطر لا تقعد تسويلي سالفة ، وبعدين سكت ( والسكوت علامة الرضى ) قمت دخلت بأجلس
مكاني قالي من قالك ادخل صكيته بالمثل على طول السكوت علامة الرضى قال هذا المثل مب عند مدرسين
علم النفس قلتله ليش يعني مدرسين النفس نفسية ويعصب ويتنرفز ويقولي أقعد اقعد والطلاب ما في إلا ضحك
وبعدين قلت لخويي الي وعدني انه ينتقم لي والله ونعم من خوي قلتله تكفى الصاع بصاعين وأعبيلك تانكي
البنزين فل أول ما نطلع (على فكرة ترى البنزين مشكلة طلاب الثانوي لأن أبوه يعطيه عشرة يعبي
بنزين ما يبيه يدور بالشوارع وهو هاوي دوران ) نرجع عاد يوم قلتله فل صار خويي يشوف المدرس واحد
من أخوياه عطيته الطباشير كسرهن أوصال صغيرة شوي وبدت عملية رجم الجمرات وكل شوي يتلفت
مين قليل الحياء مين الي يرمي طبعا طلاب الشرعي يعجبونك ما في أحد يتكلم كل واحد نفسي نفسي
كان عندنا دبوس بالفصل ودبس مرة وانعلك بالطلعة علك بعدها مافتح فمه أبد ..
المهم وطبشورة ورا طبشورة لين المدرس طلعت جنيته بدى يصارخ وأنا مبسوط وحتى كنت أضحك أبي
أنرفزه وشوي شكله قرر بنفسه أنه إذا حس ان في طبشورة جايه يلتفت حتى يعرف من الي يرمي عاد خويي
قرر هالمرة يجدع ثلاث طبشورات مع بعض ، يازين الصدف بعض الأحيان المهم خويي جدع الطبشورات الثلاث
وهذا المدرس التفت وهو فاتح فمه يبي يصارخ على الي يرمي الطباشير وما درى إلا وحدة بفمه والظاهر انه بلعها
والثانية فوق عينه ربك ستر ماجت بعينه والثالة ما أدري وين صارت طلع المدرس راح يغسل ويتمضمض
من الطباشير الي أكله ومر الوكيل وشاف المدرس مغطي فمه بيده سأله سلامات في شي كويس أن المدرس
صرف وقال لا بغيت آكل علك أكلت طبشورة ولا بغينا نجييب العيد دخل المدرس وتصدقون أنه للحين ما عرف
من الي رمى الطبشور عاد قال أنا أعرف الي رمى الطباشير يطلع اللحين ولا ألطعه وأنا أدري أنه خراط
لأن هذا أسلوب كل المدرسين عاد أنه أرد عليه وراه ما تطلعه وتفكنا بدال ما تقول أنا أعرفه وهو يطلع أحسن له
عاد اقفلت اخلاقه وقال اطع بره وبدى يصارخ وميزته إذا صارخ عيونه تتصكر وهو يصارخ جته طباشيرة على الجبهة
جعلته يترك الفصل بلا عودة ..
وهذي قصة المدرس الي بلع الطبشورة



وترقبوا المدرس الي لففناه شوارع الرياض بالظهرية بعز الشمس